రిపబ్లిక్‌ డే వేళ 10,000 కిలోల పేలుడు పదార్థాలు స్వాధీనం

గణతంత్ర దినోత్సం వేళ రాజస్థాన్‌లో భారీగా పేలుడు పదార్థాలను పోలీసులు స్వాధీనం చేసుకున్నారు. నాగౌర్‌ జిల్లాలోని హర్సౌర్‌ గ్రామంలో ఆదివారం రాత్రి దాదాపు పదివేల కేజీల అమ్మోనియం నైట్రేట్‌ను స్వాధీనం చేసుకున్నట్లు పోలీసులు తెలిపారు. వాటితోపాటు డిటోనేటర్లు ఫ్యూజ్​ వైర్లను కూడా సీజ్​ చేశారు. 187 బస్తాల్లో 9,550 కేజీల అమ్మోనియం నైట్రేట్‌ను గుర్తించి సీజ్‌ చేశారు.

రాజస్థాన్​లో నూతన సంవత్సరం వేళ కూడా పెద్దఎత్తున పేలుడు పదార్థాలు లభ్యమయ్యాయి.  ఓ కారులో 150కిలోల అమ్మోనియం నైట్రేట్‌, ఇతర పేలుడు పదార్థాలను పోలీసులు స్వాధీనం చేసుకున్నారు. వాహనంలో యూరియా సంచుల్లో 150 కిలోల అమ్మోనియం నైట్రేట్ నింపి ఉంచినట్లు గుర్తించారు. అదేవిధంగా 200 కాట్రిడ్జ్‌లు, ఆరు కట్టల (1,100 మీటర్లు) సేఫ్టీ ఫ్యూజ్‌ వైర్‌ స్వాధీనం చేసుకున్నారు.

గతేడాది దేశవ్యాప్తంగా కలకలం సృష్టించిన దిల్లీలో ఎర్రకోట పేలుడు ఘటనలో కూడా అమ్మోనియం నైట్రేట్​ను ఉపయోగించారు. ఆ పేలుడులో రెండు కిలోల అమ్మోనియం నైట్రేట్​తో పాటు పెట్రోలియం, ఇతర పదార్థాలు వాడినట్లు తెలిసింది.