ప్రతి బొగ్గు గని కార్మికుడి ప్రాణం విలువైనదే!

“మీ శ్రమ ద్వారా ఈ దేశంలో మారుమూల ప్రాంతాల్లోని అనేక ఇళ్లలో వెలుగులు అందుతున్నాయి. దేశంలో 74% విద్యుత్ బొగ్గు ద్వారానే ఉత్పత్తి అవుతోంది. ఇందులో మీ శ్రమ కారణంగానే వివిధ రంగాల్లో కోట్లాది మందికి  ఉపాధి లభిస్తుంది. గతంలో బొగ్గు వెలికితీత చాలా ప్రమాదకరంగా ఉండేది. అప్పుడు కూడా మీరు ప్రాణాలను లెక్కచేయకుండా పనిచేశారు. ఇవాళ సాంకేతికత పెరిగింది, భద్రతా ప్రమాణాలు పెరిగాయి” అని కిషన్ రెడ్డి తెలిపారు.

సింగరేణిలోని 40, 50వేల మంది కార్మికులు, తమ కుటుంబాలు, అనుబంధ పరిశ్రమల్లో పనిచేస్తున్న వారెందరికో ప్రత్యక్షంగా, పరోక్షంగా ఉపాధి కల్పిస్తున్నామని కేంద్ర మంత్రి చెప్పారు. అయితే, మన సింగరేణి పరిస్థితి ఊహించినత గొప్పగా లేదని, అందుకే ఈ సంస్థను మనం రాజకీయాలకు అతీతంగా కాపాడుకోవాలని ఆయన పిలుపిచ్చారు. సంస్థ బాగుంటేనే మనమంతా బాగుంటామని స్పష్టం చేశారు.

“తెలంగాణ బిడ్డగా, కేంద్ర మంత్రిగా నేను సింగరేణికి అన్నిరకాల సహాయ సహకారాలు అందించేందుకు సిద్ధంగా ఉన్నాను. కార్మికులు ఐకమత్యంతో పనిచేయాలి. సంస్థను కాపాడుకోవాలి. మిగిలిన బొగ్గు ఉత్పత్తి సంస్థలతో పోలిస్తే సింగరేణిలో బొగ్గు ఉత్పత్తి ధర ఎక్కువగా ఉందని విచారం వ్యక్తం చేశారు. అందుకే ఖర్చులను తగ్గించుకుని ముందుకెళ్లాలని సూచించారు.