వివేకానంద స్మారక చిహ్నం ఏర్పాటులో కీలక పాత్రధారి పి. లక్ష్మణన్ శివైక్యం

కన్యాకుమారిలోని సుప్రసిద్ధ వివేకానంద స్మారక చిహ్నం ఏర్పాటులో కీలక పాత్రధారి, రాష్ట్రీయ్ స్వయంసేవక్ సంఘ్ సీనియర్ కార్యకర్త  పి. లక్ష్మణన్ (86) జనవరి 22న కన్నుమూశారు. అనేక సంవత్సరాలుగా తన కుటుంబంతో కలిసి నివసిస్తున్న కన్యాకుమారి వివేకానంద కేంద్రంలో మధ్యాహ్నం 3:00 గంటలకు తుది శ్వాస విడిచారు.

కేరళ కోజికోడ్‌లోని వెల్లైయిల్‌కు చెందిన లక్ష్మణన్‌ 1962లో శ్రీపాదపార (వివేకానంద శిల)ను తిరిగి పొందేందుకు చేసిన ఉద్యమంలో కీలక పాత్ర పోషించిన వ్యక్తుల్లో ఒకరు.  నాటి ఆ ఉద్యమమే నేటి సుప్రసిద్ద వివేకానంద స్మారక చిహ్నం ఏర్పాటుకు పునాది వేసింది.

1962 మిషన్: వివేకానంద శిల తిరిగి స్వాధీనం
పి. లక్ష్మణన్ పేరు చెబితే 1962లో కన్యాకుమారిలో చేపట్టిన సాహసోపేతమైన ఉద్యమం స్ఫురణకు వస్తుంది. కన్యాకుమారి సముద్ర తీరంలో ఉన్న రాతిశిలను క్రైస్తవ మిషనరీలు చట్టవిరుద్ధంగా ఆక్రమించారు.  వెంటనే ఆ ప్రదేశంలో ఒక శిలువ ఏర్పాటు చేశారు. ఆ ప్రాంతం పేరును ‘కన్యాకుమారి’ నుండి ‘కన్య మేరీ’గా మార్చేందుకు ఒక పథకం ప్రకారం మొదలైన కుట్రను రాష్ట్రీయ్ స్వయంసేవక్ సంఘ్ సకాలంలో గుర్తించింది.