ఏఆర్ రెహమాన్ ‘మతపరమైన’ వ్యాఖ్యలపై మండిపడ్డ కంగనా!

“నేను నా దర్శకత్వంలో తెరకెక్కిన ‘ఎమర్జెన్సీ’ సినిమా కథను మీకు వినిపించాలని ఎంతగానో ఆశపడ్డాను. కానీ మీరు కథ వినడం దేవుడెరుగు, కనీసం నన్ను కలవడానికి కూడా నిరాకరించారు. నేను కేవలం ప్రాపగండా (ప్రచార) సినిమాలు మాత్రమే తీస్తానని, అందుకే మీరు నా సినిమాలో భాగం కాకూడదని అనుకున్నట్లు నాకు తెలిసింది” అని కంగనా పేర్కొన్నారు.

తన సినిమాను విమర్శకులు మెచ్చుకున్నా రెహమాన్ మాత్రం ద్వేషంతో ఉన్నారని కంగనా మండిపడ్డారు. “ఎమర్జెన్సీ సినిమాను విమర్శకులు సైతం ‘మాస్టర్ పీస్’ అని కొనియాడారు. చివరికి ప్రతిపక్ష పార్టీల నాయకులు కూడా నాకు ఫ్యాన్ లెటర్లు రాశారు. సినిమా చాలా సమతుల్యంగా, మానవీయ కోణంలో ఉందని ప్రశంసించారు. కానీ మీరు మాత్రం ద్వేషంతో కళ్లు మూసుకుపోయి ప్రవర్తిస్తున్నారు. మీ పరిస్థితి చూస్తుంటే జాలేస్తోంది” అని ఆమె రాసుకొచ్చారు. 

రెహమాన్ వ్యాఖ్యలను ప్రముఖ రచయిత్రి శోభా డే తప్పుబట్టారు. “రెహమాన్ చేసింది చాలా ప్రమాదకరమైన వ్యాఖ్య. ఆయన ఎందుకు అలా అన్నారో ఆయన్నే అడగాలి. నేను 50 ఏళ్లుగా బాలీవుడ్‌ను చూస్తున్నాను. ఇక్కడ మతపరమైన ఉద్రిక్తతలు అస్సలు ఉండవు. బాలీవుడ్ అనేది అత్యంత లౌకికవాద ప్రదేశం. ఇక్కడ ప్రతిభ ఉంటే అవకాశాలు వస్తాయి” అని ఆమె స్పష్టం చేశారు.  “మతం అనేది ఇక్కడ అర్హత కాదు. రెహమాన్ లాంటి పరిణతి చెందిన వ్యక్తి, అంత విజయవంతమైన వ్యక్తి ఇలా మాట్లాడటం సరికాదు” అని ఆమె అభిప్రాయపడ్డారు.

ప్రముఖ గాయకుడు షాన్ కూడా రెహమాన్ వ్యాఖ్యలను ఖండించారు. “నేను ఎన్నో ఏళ్లుగా పాడుతున్నాను. నాకూ ఇప్పుడు పని తగ్గింది. అంత మాత్రాన దానికి మతం రంగు పులమలేం కదా? ఎవరికి ఎంత పని దొరకాలనేది మన చేతుల్లో ఉండదు. ఒకవేళ బాలీవుడ్‌లో మత వివక్షే ఉంటే, గత 30 ఏళ్లుగా షారుఖ్, సల్మాన్, ఆమిర్ ఖాన్‌లు ఇక్కడ సూపర్ స్టార్లుగా ఎలా వెలుగొందుతున్నారు? వాళ్లు మైనారిటీలే కదా?” అని ప్రశ్నించారు. “వాళ్లకు మిగతా వారి కంటే ఎక్కువ మంది ఫ్యాన్స్ ఉన్నారు. సంగీతానికి మతం, కులం ఉండవు. రెహమాన్​కి ఇప్పటికీ ఆదరణ తగ్గలేదు” అని షాన్ హితవు పలికారు.

ప్రముఖ గీత రచయిత జావేద్ అక్తర్ మరో కోణాన్ని వినిపించారు. “ముంబయిలో రెహమాన్ అంటే అందరికీ గౌరవం ఉంది. ఆయన చాలా పెద్ద మనిషి. పెద్ద స్థాయి సంగీత దర్శకుడు. అందుకే చిన్న నిర్మాతలు ఆయన దగ్గరకు వెళ్లడానికి భయపడుతుంటారు. అంతేకానీ ఇందులో మతపరమైన అంశం ఉందని నేను అనుకోవడం లేదు. ఎవరు పిలిచినా ఆయన కచ్చితంగా వస్తారు” అని జావేద్ అక్తర్ పేర్కొన్నారు.