బెంగాల్ ముఖ్యమంత్రి మమతా బెనర్జీ, సీనియర్​ పోలీసు అధికారులు, ఇతరులపై సీబీఐ విచారణ కోరుతూ ఎన్​ఫోర్స్​మెంట్ డైరెక్టరేట్​ (ఈడీ) కోల్​కతా హైకోర్టును ఆశ్రయించింది. పొలిటికల్ కన్సల్టెన్సీ సంస్థ ఐ-ప్యాక్​పై, దాని డైరెక్టర్​పై తాము చేసిన దాడు​లను వీరు ఉద్దేశపూర్వకంగా అడ్డుకున్నారని ఈడీ ఆరోపించింది.  ఈడీ తన రిట్​ పిటిషన్​లో, ‘ఐ-ప్యాక్​ ప్రాంగణం నుంచి తాము స్వాధీనం చేసుకున్న డిజిటల్​ పరికరాలు, ఎలక్ట్రానిక్​ రికార్డులు, స్టోరేజ్​ మీడియా, ఇతర పత్రాలను పోలీసులు చట్ట విరుద్ధంగా, బలవంతంగా తీసుకెళ్లారు’ అని ఆరోపించింది.

‘వాటిని తక్షణమే స్వాధీనం చేసుకుని, సీల్​ చేసి, ఫోరెన్సిక్ భద్రత కల్పించి, తిరిగి ఈడీ కస్టడీకి అప్పగించాలని’ కోరింది. “దర్యాప్తులో లభించిన పక్కా ఆధారాల ప్రకారం, కనీసం రూ.20 కోట్లు అక్రమ నగదు చలామణి ద్వారా ఐ-ప్యాక్​కు బదిలీ అయ్యాయి. అందుకే దీనిపై దర్యాప్తు ప్రారంభించాం. నిధుల మూలాలను గుర్తించేందుకు ఐ-ప్యాక్​, బొగ్గు స్మగ్లింగ్​ కేసుతో సంబంధం ఉన్న ఇతర సంస్థలపై సోదాలు ప్రారంభించాం” అని ఈడీ తన పిటిషన్​లో పేర్కొంది.

మరోవైపు, ఐ-ప్యాక్​ దాడుల్లో ఈడీ స్వాధీనం చేసుకున్న పత్రాల దుర్వినియోగం కాకుండా ఈడీని నియంత్రించాలని టీఎంసీ శుక్రవారం కోల్​కతా హైకోర్టును ఆశ్రయించింది. రానున్న ఎన్నికల కోసం టీఎంసీ సిద్ధం చేసుకున్న రహస్య రాజకీయ, ప్రచార వ్యూహాలు, అంతర్గత అంచనాలు, పరిశోధన్​ ఇన్​పుట్​లు, ఓటర్ల జాబితాకు సంబంధించిన అత్యంత సున్నితమైన సమాచారాన్ని ఈడీ స్వాధీనం చేసుకుందని టీఎంసీ ఆరోపించింది. 

‘ఇది ఏకపక్షంగా, దురుద్దేశపూర్వకంగా, అధికార దుర్వినియోగం చేయడమే’నని పేర్కొంది. ఈ పత్రాలకు, మనీలాండరింగ్​ కేసుతో ఎలాంటి ప్రత్యక్ష, పరోక్ష సంబంధం లేదని టీఎంసీ తన పిటిషన్​లో తెలిపింది. ఈడీ దర్యాప్తు ముసుగులో తమ పార్టీకి చెందిన రహస్యాలను చట్టవిరుద్ధంగా చూడడానికి ప్రయత్నిస్తున్నారని, ఇది స్వేచ్ఛాయుత, పారదర్శక ఎన్నికల ప్రక్రియను దెబ్బతీయడమేనని తృణమూల్ కాంగ్రెస్​ ఆరోపించింది.