ఆరావళిపై సుప్రీం  తీర్పును స్వాగతించిన కేంద్రం

ఆరావళి పర్వతాల్లో గనుల తవ్వకాలపై సుప్రీంకోర్టు కీలక ఆదేశాలను కేంద్ర పర్యావరణ శాఖ మంత్రి భూపేందర్ యాదవ్ స్వాగతించారు. ఆరావళి పర్వతాల పరిరక్షణ, పునరుద్ధరణకు కేంద్రం కట్టుబడి ఉందని వెల్లడించారు. ఈ సమస్యను అధ్యయనం చేసేందుకు కొత్త కమిటీని నియమించడాన్ని ఆయన స్వాగతించారు. అటు సుప్రీంకోర్టు తీసుకున్న నిర్ణయం పట్ల కాంగ్రెస్ ఎంపీ జైరాం రమేశ్, రాజస్థాన్ మాజీ ముఖ్యమంత్రి అశోక్ గహ్లోత్ హర్షం వ్యక్తం చేశారు.

“గత కొన్ని రోజులుగా ఆరావళి పర్వతాలపై రాజకీయాలు చేస్తున్నారంటూ నన్ను, మూడు సార్లు రాజస్థాన్ ముఖ్యమంత్రిగా చేసిన అశోక్ గహ్లోత్ను కేంద్ర పర్యావరణ మంత్రి తీవ్ర ఆరోపణలు చేశారు. ఈ విషయంపై ఈరోజు సుప్రీం కోర్టు క్లారిటీ ఇచ్చింది. ఆరావళి పర్వతాలపై ఇచ్చిన నిర్వచనంపై సుప్రీం కోర్టు స్టే విధించింది” అని తెలిపారు.