మేడారం జాతరకు జాతీయ హోదా సాధ్యం కాదు

మేడారం సమ్మక్క–సారక్క జాతరకు జాతీయ హోదా ఇవ్వడం సాధ్యం కాదని కేంద్ర మంత్రి జి. కిషన్ రెడ్డి తెలిపారు.  దేశంలో ఏ పండుగకైనా లేదా జాతరకైనా జాతీయ హోదా అనేది ఇచ్చే వ్యవస్థ లేదని, మేడారం జాతర కూడా అదే పరిధిలోకి వస్తుందని ఆయన తెలిపారు. అయితే ప్రతి ఏడాదిలానే ఈసారి కూడా కేంద్ర ప్రభుత్వం నుంచి అవసరమైన నిధులు కేటాయిస్తామని, జాతర నిర్వహణలో భాగస్వామ్యమవుతామని హామీ ఇచ్చారు.

తెలంగాణ ముఖ్యమంత్రి రేవంత్ రెడ్డి గతంలో మేడారం జాతరను జాతీయ పండుగగా గుర్తించి ప్రత్యేక గుర్తింపు ఇవ్వాలని కేంద్రానికి లేఖ వ్రాసారు. ఈ డిమాండ్‌పై కేంద్ర మంత్రి కిషన్ రెడ్డి సమాధానం ఇస్తూ దేశంలో ఇప్పటివరకు ఏ వేడుకకూ జాతీయ స్థాయి హోదా ఇవ్వలేదని, అందువల్ల మేడారానికి కూడా అలాంటి గుర్తింపు ఇవ్వడం సాధ్యం కాదని తెలిపారు.

అయితే, రాష్ట్ర ప్రభుత్వం కోరుకుంటే పర్యాటక అభివృద్ధి, మౌలిక వసతుల పెంపు, రోడ్ల అభివృద్ధి వంటి అంశాల్లో కేంద్రం సహాయం చేసేందుకు సిద్ధంగా ఉందని ఆయన వెల్లడించాయిరు. సమ్మక్క–సారక్క జాతర ప్రపంచంలోనే అతిపెద్ద గిరిజన ఉత్సవాల్లో ఒకటని కిషన్ రెడ్డి గుర్తుచేశారు.  ప్రతీ రెండేళ్లకోసారి లక్షలాది మంది భక్తులు తరలివచ్చే ఈ జాతరకు కేంద్రం ఎప్పటికప్పుడు ఆర్థిక సహకారాన్ని అందించిందని చెప్పారు. జాతర రవాణా సదుపాయాలు, భద్రతా ఏర్పాట్లు, తాగునీరు–వసతి వంటి అవసరాలకు కేంద్ర నిధులు ఉపయోగపడతాయని వివరించారు. ఈసారి కూడా రాష్ట్ర ప్రభుత్వంతో కలిసి సమన్వయం చేస్తూ అన్ని ఏర్పాట్లను పర్యవేక్షిస్తామని చెప్పారు.

కాగా, అమృత్‌ పథకం కింద వరంగల్‌ జిల్లాకు రూ.874 కోట్లు మంజూరు అయ్యాయని, హృదయ్‌ పథకం కింద పురాతన ఆలయాల పునరుద్ధరణకు కేంద్రం నిధులు ఇచ్చిందని చెప్పారు. రామప్ప ఆలయం అభివృద్ధి కోసం కేంద్రం రూ.146 కోట్లు ఖర్చు చేస్తోందని తెలిపారు. కబ్జాలకు గురవుతున్న వరంగల్‌ ఖిల్లా భూములను రక్షించాలని కోరారు. 

పత్తి కొనుగోళ్లపై సీసీఐ అధికారులతో చర్చించామని, గత సంవత్సరం 41 లక్షల పత్తి బేళ్లను సీసీఐ కొనుగోలు చేసిందని, గత సంవత్సరం కంటే ఈసారి పత్తి కొనుగోలు కేంద్రాలను పెంచామని, పత్తి కొనుగోలు కేంద్రాలు 113 నుంచి 127కు పెంచామని ఆయన వివరించారు.  కాజీపేట రైల్వే కోచ్‌ ఫ్యాక్టరీ పనులు పరిశీలించిన కేంద్రమంత్రి కిషన్‌ రెడ్డి షెడ్యూల్‌ ప్రకారమే పనులు పూర్తవుతున్నాయని స్పష్టం చేశారు. ఇంటిగ్రేటెడ్‌ ప్రాజెక్టు నిర్మాణం జరుగుతుందని, ఆధునిక పద్ధతిలో నిర్మాణాలు జరుగుతున్నాయని, దశాబ్దాలుగా పెండింగ్‌లో ఉన్న ఆర్వోబీలు, ఆర్‌యూబీలు పూర్తి చేస్తున్నామని వివరించారు.

“రైల్వే మ్యానుఫ్యాక్చరింగ్ యూనిట్ కోసం మొదటి ఫేజ్లో భాగంగా 521 కోట్లు ఖర్చు చేస్తున్నాం. ఇంకా దీనికి కావాల్సిన పరికరాలు రావాల్సి ఉంది. చాలా అత్యాధునిక సాంకేతికతను ఉపయోగించి ఈ యూనిట్ నిర్మాణం చేపడుతున్నాం. ఇక్కడ ఇప్పటికే 75 శాతం పనులు పూర్తయినందున సంతోషంగా ఉంది. వచ్చే ఏడాదిలో దీన్ని పూర్తి చేసేలా లక్ష్యంగా పెట్టుకుని ముందుకెళ్తున్నాం” అని తెలిపారు.

పీఎం మిత్ర పథకం కింద టెక్స్‌టైల్‌ పార్క్‌ చేపడుతున్నామని కిషన్‌ రెడ్డి తెలిపారు. వరంగల్‌ విమానాశ్రయం నిర్మాణాన్ని వేగవంతం చేయాలని నిర్ణయించామని, తెలంగాణ రాష్ట్ర ప్రభుత్వం త్వరగా భూమి అప్పగిస్తే త్వరగా నిర్మాణం జరుగుతుందని తెలిపారు.