రష్యా అమ్ములపొదిలో అపరిమిత పరిధిలో ‘బూరెవెస్ట్‌నిక్‌’

ఈ క్షిపణిని అక్టోబర్ 21నే పరీక్షించినట్టు రష్యా తెలిపింది. ప్రపంచవ్యాప్తంగా ప్రస్తుతం ఉన్న అన్ని క్షిపణి రక్షణ వ్యవస్థలను తప్పించుకుని దాడి చేసే సామర్థ్యం దీని సొంతమని తెలుస్తోంది. రష్యా తయారు చేసిన బురెవెస్ట్నిక్‌ క్షిపణి న్యూక్లియర్‌ టర్బోజెట్‌ ఇంజిన్‌తో పనిచేస్తుంది. ఒక్కసారి ప్రయోగించిన తర్వాత ఇంధనంతో నిమిత్తం లేకుండా ఎంతదూరమైనా, ఎన్ని రోజులైనా నిరంతరాయంగా ప్రయాణించే శక్తి ఉంటుంది. 

గంటకు 850 నుంచి 1300 కిలోమీటర్ల వేగంతో ప్రయాణించే సామర్ధ్యం దీని సొంతం. వెర్టికల్‌గా, హారిజాంటల్‌గా ఎలాగైనా సరే లక్ష్యాలపై దాడి చేసే సత్తా ఉంటుంది. దాడి చేసే క్రమంలో ప్రయోగించిన తర్వాత మధ్యలోనే ఉపగ్రహ సిగ్నల్స్ ఆధారంగా దాడిచేసే మార్గాన్ని మళ్లించేందుకు, కొత్త లక్ష్యాలను ఎంచుకునేందుకు ఆస్కారం ఉంది.

అంతకుముందు సైనిక ఉన్నతాధికారులతో పుతిన్‌ భేటీ అయ్యారు. రష్యా సాయుధ బలగాల చీఫ్‌ ఆఫ్‌ జనరల్‌ స్టాఫ్‌ జనరల్ వాలెరీ గెరాసిమోవ్ నేతృత్వంలోని కమాండర్లతో సంభాషించారు. సుమారు 10 వేల మందికిపైగా ఉక్రెయిన్‌ సైనికులను తాము చుట్టుముట్టామని గెరాసిమోవ్‌ తెలిపారు. 31 బెటాలియన్లతో కూడిన ఉక్రెయిన్‌ సాయుధ దళాల బృందాన్ని తాము అడ్డుకున్నామని చెప్పారు.