బిహార్ ఎన్నికల్లో వికాసానికి, వినాశనానికి మధ్య పోరు

“గ్యాంగ్స్టర్ నుంచి రాజకీయ నాయకుడిగా మారిన దివంగత ఎండీ షాబుద్దీన్ కుమారుడు ఒసామాకు ఆర్జేడీ టికెట్ ఇవ్వడం అనేది బిహార్ పట్ల ఆ పార్టీ ఎంత శ్రద్ధ వహిస్తుందో తెలుస్తోంది. అవినీతి, నేరాల పట్ల సానుభూతి ఉన్న పార్టీగా ఆర్జేడీ మరోసారి తేలిపోయింది”  అని జేపీ నడ్డా ఆరోపించారు. బిహార్లో 20 సంవత్సరాల చీకటి యుగం గురించి తనకు తెలుసని జేపీ నడ్డా చెప్పారు. ‘నేను బిహార్‌లోని పట్నాలో జన్మించానని చాలా తక్కువ మందికి తెలుసు. నేను నా బాల్యం నుంచి 20 సంవత్సరాలు బిహార్‌లో గడిపాను. ఆ చీకటి యుగం గురించి నాకు తెలుసు. అలాగే ప్రస్తుత ఈ వెలుగు యుగాన్ని కూడా చూస్తున్నా’ అని తెలిపారు. 

“ఈ ఎన్నికలు అభివృద్ధికి, విధ్వంసానికి మధ్య జరిగే పోరు. ఎన్డీఏ అభివృద్ధి ప్రభుత్వం. ఈ కొత్తగా ప్రకటించిన ముఖ్యమంత్రి అభ్యర్థి, ఆ పార్టీ బిహార్ వినాశనానికి తప్ప మరొకటి కాదు. లాలూ ప్రసాద్‌ పాలనలో బిహార్ ప్రజలు వలస వెళ్లే పరిస్థితి ఎదుర్కొన్నారు” అని హెచ్చరించారు. “గత 20 ఏళ్లల్లో నీతీశ్ కుమార్, 11 సంవత్సరాల్లో ప్రధాని మోదీ ఆశీర్వాదంతో బిహార్ వేగవంతమైన పురోగతి వైపు పయనించింది. ఇటీవల బిహార్ కోసం ఎన్డీఏ ప్రభుత్వం చాలా చేసింది. రైల్వే బడ్జెట్‌ను 10 రెట్లు పెంచింది. దేశంలోని 44 వందే భారత్ రైళ్లలో 26 బిహార్ నుంచి నడిచేవి ఉన్నాయి” జేపీ నడ్డా వివరించారు.