పాకిస్తాన్‌లోని పాలక షెహబాజ్ షరీఫ్ ప్రభుత్వంపై సోమవారం నుండి పాకిస్తాన్ ఆక్రమిత కాశ్మీర్ (పిఓకె)లో చెలరేగిన ఆగ్రవేశాలు భారీ అశాంతికి దారితీస్తున్నాయి. షట్టర్-డౌన్, వీల్ జామ్ సమ్మెలో భాగంగా జమ్మూ కాశ్మీర్ జాయింట్ అవామీ యాక్షన్ కమిటీ (జెకెఏసీసీ) నేతృత్వంలోని నిరసనకారులు ఈ ప్రాంతం అంతటా భారీ ర్యాలీలు నిర్వహించగా  హింసకు దారితీశాయి.

స్థానిక మీడియా నివేదికల ప్రకారం, వాణిజ్య కేంద్రాలు, రవాణా, పాఠశాలలు మూసివేశారు.  ల్యాండ్‌లైన్‌లను నిలిపివేయడం సహా కమ్యూనికేషన్ బ్లాక్‌అవుట్ ఈ ప్రాంతం అంతటా విధించారు. ప్రధాని షెహ్‌బాబ్‌ షరీఫ్‌ ప్రభుత్వానికి వ్యతిరేకంగా మౌలిక సంస్కరణలు కోరుతూ అవామీ యాక్షన్‌ కమిటీ (ఏసీసీ) నిరసనలకు పిలుపునిచ్చింది.  జాయింట్ అవామీ యాక్షన్ కమిటీ ప్రతిపాదించిన డిమాండ్లను ప్రభుత్వం పరిష్కరించడంలో విఫలమైనందుకు ఆగ్రహం పెరుగుతుంది. 

మీర్పూర్, కోట్లి, ముజఫరాబాద్‌లతో సహా ఈ ప్రాంతం అంతటా ప్రదర్శనలు, ర్యాలీలు చెలరేగాయి. ముజఫరాబాద్‌లో, పోలీసులు నిరసనకారులపై కాల్పులు జరిపినట్లు సమాచారం, ఫలితంగా ఇద్దరు వ్యక్తులు మరణించారు. 22 మందికి పైగా గాయపడ్డారు.  ఈ విషాద సంఘటన ప్రజల ఆగ్రహాన్ని మరింత పెంచింది. నిరసన ఉద్యమం పట్ల దృఢ నిశ్చయాన్ని కఠినతరం చేసింది. వేల సంఖ్యలో ప్రజలు నిరసనల్లో పాల్గొన్నారు.  కోట్లిలో, సెంట్రల్ చౌక్ వద్ద బహుళ ర్యాలీలు సమావేశమయ్యాయి.  ఉద్యమాన్ని అణగదొక్కడానికి రాజకీయ ప్రయత్నాలపై నిరసనకారులు నిరాశ వ్యక్తం చేశారు.

పీవోకేలో మౌలిక సంస్కరణలు తీసుకురావాలని కోరుతూ ఏఏసీ పలు డిమాండ్లను ప్రభుత్వం ముందు ఉంచింది. తమ ఆందోళనలు ఏ సంస్థకూ వ్యతిరేకం కాదని ఏఏసీ కీలక నాయకుడు షౌకత్ నవాజ్ మీర్ అన్నారు. 70 ఏళ్లకుపైగా పీవోకేలోని ప్రజలకు ప్రాథమిక హక్కులు కూడా కల్పించలేదని ఆగ్రహం వ్యక్తం చేశారు.  ప్రజలకు హక్కులను అందించడం ప్రభుత్వం బాధ్యత అని స్పష్టం చేశారు.  పాక్‌ ప్రభుత్వం దశాబ్దాలుగా తమను రాజకీయంగా, ఆర్థికంగా అణగదొక్కుతున్నట్లు ఆవేదన వ్యక్తం చేశారు.

‘మా హక్కులు మాకు కల్పిస్తారా.. ప్రజల ఆగ్రహాన్ని ఎదుర్కొంటారా..?’ అంటూ హెచ్చరించారు. ప్రభుత్వం తమ డిమాండ్లను పట్టించుకోకపోతే నిరసనలను మరింత తీవ్రం చేస్తామని హెచ్చరించింది. ఈ నిరసనలతో పాక్‌ ప్రభుత్వం అప్రమత్తమైంది. ఆందోళనకారులను చెదరగొట్టేందుకు పీవోకేలో పెద్ద సంఖ్యలో పోలీసులను మోహరించింది. ఆందోళనల నేపథ్యంలో పీవీకే ఆదివారం అర్ధరాత్రి నుంచి ఇంటర్నెట్‌ సేవలను కూడా నిలిపివేశారు. చెక్‌ పోస్టులు, ప్రధాన ప్రాంతాల్లో పోలీసులు భారీ సంఖ్యలో మోహరించారు.

పాకిస్తాన్‌లో స్థిరపడిన కాశ్మీరీ శరణార్థులకు రిజర్వ్ చేసిన 12 అసెంబ్లీ స్థానాలను రద్దు చేయడం; జల విద్యుత్ ఒప్పందాలపై తిరిగి చర్చలు జరపడం, పెరుగుతున్న ద్రవ్యోల్బణం భారాన్ని తగ్గించడానికి తక్షణ పిండి సబ్సిడీలను అందించడం, నివాసితులకు ఇంధన ఖర్చులను తగ్గించడానికి స్థానిక ఉత్పత్తి రేట్లకు విద్యుత్ సుంకాలను అనుసంధానించడం వంటి బహుళ డిమాండ్లపై పెరుగుతున్న పౌర ఆగ్రహం కారణంగా ఈ నిరసనలు ప్రారంభమయ్యాయి.