“ఐ లవ్ మహ్మద్” వివాదం మధ్య శుక్రవారం ప్రార్థనల తర్వాత ఉత్తరప్రదేశ్‌లోని బరేలీలో పెద్ద ఎత్తున అల్లర్లు చెలరేగాయి. మౌలానా తౌకీర్ రజా మద్దతుదారులు ఒక మెమోరాండం సమర్పించడానికి గుమిగూడినప్పుడు జనం అకస్మాత్తుగా హింసాత్మకంగా మారారు. ఒక వర్గం వారు పెద్దఎత్తున గుమిగూడి పోలీసులపై రాళ్లు రువ్వడంతో వారిని చెదరగొట్టేందుకు పోలీసులు లాఠీచార్జ్ జరిపారు. దీంతో తీవ్ర ఉద్రికత్తలు నెలకొన్నాయి.
‘ఐ లవ్ మహమ్మద్’ ప్రచారానికి మద్దతుగా ప్రదర్శన నిర్వహించేందుకు స్థానిక మౌలానా, ఇత్తెహాద్-ఎ-మిల్లత్ కౌన్సిల్ చీఫ్ మౌలానా తౌకీర్ రజా పిలుపునిచ్చారు. దీంతో శుక్రవారం ప్రార్థనలు ముగియగానే ఆ వర్గానికి చెందిన ప్రజలు పెద్దఎత్తున బరేలిలోని ఇస్లామిక్ గ్రౌండ్ సమీపంలో గుమిగూడారు. ముందస్తుగా పోలీసులు భారీగా మోహరించారు. కొందరు అభ్యంతరకరమైన నినాదాలు చేయడంతోపాటు పోలీసులపై రాళ్ల దాడికి దిగారు. దీంతో పరిస్థితిని అదుపుచేసేందుకు పోలీసులు లాఠీచార్జ్ జరిపారు.
పోలీసులు ఫ్లాగ్ మార్చ్ నిర్వహించి నమాజ్ పూర్తికాగానే ఇళ్లకు చేరుకోవాలని ప్రజలను కోరామని, అయితే గుంపులోని కొందరు రాళ్లు రువ్వుతూ కాల్పులకు దిగారని పుజోలీసులు చెప్పారు. ఘటన స్థలిలో కొన్ని ఆయుధాలు స్వాధీనం చేసుకున్నామని పేర్కొంటూ ఇది ముందస్తు కుట్రగా కనిపిస్తోందని స్పష్టం చేశారు. ఉత్తరప్రదేశ్ ప్రభుత్వం ఒక ప్రకటనలో బరేలీ హింసను పశ్చిమ యుపిలో అశాంతి సృష్టించడం, నోయిడా ఇంటర్నేషనల్ ట్రేడ్ షోతో సహా పెట్టుబడులు, పారిశ్రామిక అభివృద్ధి కోసం రాష్ట్రం సాధిస్తున్న పురోభివృద్ధిని అణగదొక్కడం లక్ష్యంగా “బాగా ప్రణాళికాబద్ధమైన కుట్ర” అని అభివర్ణించింది.
శాంతిభద్రతలను కాపాడటానికి, 12 కంపెనీల ఆర్ఏఎఫ్, ఆర్ఆర్ఎఫ్ దళాలను ఆ ప్రాంతంలో మోహరించారు. ఈ సంఘటనలో 10 మంది పోలీసులు కూడా గాయపడ్డారు. అదనంగా, పరిస్థితిని సమీక్షించడానికి ఐజి, ఏపీ, డిఎం సున్నితమైన ప్రాంతాలలో ఫ్లాగ్ మార్చ్‌లు నిర్వహించారు. కొంతమంది దుండగులను బరేలీలోని కొత్వాలి పోలీస్ స్టేషన్‌కు తీసుకువచ్చి, అక్కడ వారిని విచారిస్తున్నారు. అశాంతిని రేకెత్తించడంలో వారి పాత్ర ఉందా? అని పోలీసులు నిర్ధారించుకోవడానికి ప్రయత్నిస్తున్నారు. శుక్రవారం ప్రార్థనల దృష్ట్యా తగిన ఏర్పాట్లు చేసినట్లు బరేలీ ఐజి అజయ్ సాహ్ని తెలిపారు. ఈ ప్రాంతంలో శాంతిని కాపాడటానికి మత పెద్దలను కూడా అప్రమత్తం చేశారు.
“ఈరోజు శుక్రవారం ప్రార్థనలు జరుగుతున్నాయి. నేను, గణనీయమైన పోలీసు దళం, ఎస్పీ, ఎస్‌ఎస్‌పీ, డిఎం, ఇతర అధికారులతో కలిసి నగరం అంతటా చురుగ్గా గస్తీ నిర్వహిస్తున్నాను. అనేక ప్రదేశాలలో ప్రార్థనలు శాంతియుతంగా ప్రారంభమయ్యాయి, కొన్ని ఇప్పటికే పూర్తయ్యాయి. ప్రార్థనల తర్వాత ప్రజలు తమ సాధారణ కార్యకలాపాలను తిరిగి ప్రారంభించాలని సూచించారు” అని చెప్పారు.
“ప్రతిదీ సజావుగా జరిగేలా చూసుకోవడానికి మత పెద్దలతో చర్చలు జరిగాయి. ఇక్కడ, ఆర్ఏఎఫ్, ఆర్ఆర్ఎఫ్ నుండి 12 మంది కంపెనీ సిబ్బందిని, పౌర దళాల గణనీయమైన ఉనికిని మోహరించారు,” అని ఆయన పేర్కొన్నారు. ఉత్తరప్రదేశ్‌లోని కాన్పూర్‌లో జరిగిన బరావాఫత్ వేడుకల సందర్భంగా, ముస్లిం యువకులు ప్రవక్త మొహమ్మద్ పట్ల తమ ప్రేమను వ్యక్తపరచడానికి “ఐ లవ్ మొహమ్మద్” అనే ప్రచారాన్ని ప్రారంభించారు.
ప్రవక్త జన్మదినోత్సవాన్ని పురస్కరించుకుని ఉత్సవాల్లో భాగంగా ఈ నినాదాన్ని కలిగి ఉన్న బ్యానర్లు, పోస్టర్లను బహిరంగంగా ప్రదర్శించారు. అయితే, ఈ ప్రచారం త్వరలోనే కొన్ని స్థానిక హిందూ సమూహాల నుండి వ్యతిరేకతను ఎదుర్కొంది. వారు దీనిని కొత్త, రెచ్చగొట్టే ఆచారంగా భావించారు. ఈ అసమ్మతి మత ఉద్రిక్తతలకు దారితీయడంతో పోలీసులు జోక్యం చేసుకున్నారు.
శాంతికి భంగం కలిగించారని, మతపరమైన భావాలను దెబ్బతీశారని ఆరోపిస్తూ అధికారులు బ్యానర్‌లను తొలగించి, అనేక మందిపై ఎఫ్‌ఐఆర్‌లు నమోదు చేశారు. ఈ వివాదం కాన్పూర్‌కే పరిమితం కాలేదు. లక్నో, బరేలీ, నాగ్‌పూర్, కాశీపూర్, హైదరాబాద్ వంటి నగరాల్లో, ముఖ్యంగా శుక్రవారం ప్రార్థనల తర్వాత ఇలాంటి నిరసనలు, ప్రదర్శనలు జరిగాయి.
More Stories
ముస్లిం మ‌త‌గురువు తౌకీర్ రాజా అరెస్టు
మూసీ వరద ఉధృతికి ముంపుకు గురైన ఎమ్‌జీబీఎస్ బస్టాండ్
పాకిస్థాన్ ప్రధాని డ్రామాలను ఐరాస మరోసారి చూసింది