. * ప్రత్యర్ధులు, మిత్రపక్షాల విమర్శలతో సోషల్ మీడియా హెడ్ తొలగింపు
బీహార్, బీడీలను లింక్ చేస్తూ సోషల్ మీడియా పోస్ట్ తొలగించిన ఒక రోజు తర్వాత, ప్రత్యర్థులు, మిత్రపక్షాల నుండి విమర్శలు ఎదుర్కొన్న కాంగ్రెస్ పార్టీ కేరళ యూనిట్ శనివారం తన సోషల్ మీడియా సెల్‌ను పునర్నిర్మించనున్నట్లు తెలిపింది. కాంగ్రెస్ కేరళ యూనిట్ ఎక్స్ హ్యాండిల్‌లోని పోస్ట్‌లో, “బీడీలు, బీహార్‌ను బితో ప్రారంభిస్తాయి. ఇకపై పాపంగా పరిగణించలేము” అని పేర్కొనడం దుమారం రేపింది.
ఈ పోస్ట్ తో పాటు ప్రస్తుత, ప్రతిపాదిత జీఎస్టీ రేట్లను పోల్చిన గ్రాఫిక్ ఉంది. బీడీలపై పన్నులు 28% నుండి 18% కి తగ్గించారు. సిగరెట్లపై పన్నులు 28% నుండి 40%కి పెరిగాయి. పొగాకు ఉత్పత్తులపై కేంద్రం జీఎస్టీ విధానాన్ని విమర్శించే లక్ష్యంతో ఇది ఉన్నప్పటికీ, బీహార్‌ను బీడీలతో అనుసంధానించే దాని భాషను కాంగ్రెస్, దాని మిత్ర పక్షాల నాయకులు సహా అనేక మంది రాజకీయ నాయకులు అభ్యంతరం వ్యక్తం చేశారు.
ఆర్జేడీ నాయకుడు, కీలకమైన కాంగ్రెస్ మిత్రపక్షం మరియు బీహార్‌లో ప్రతిపక్ష నాయకుడు తేజశ్వి యాదవ్ క్షమాపణ చెప్పాలని కోరారు. శనివారం, కాంగ్రెస్ కేరళ రాష్ట్ర అధ్యక్షుడు సన్నీ జోసెఫ్ కూడా ఈ పోస్ట్‌ను ఖండించారు. చర్యలు తీసుకుంటున్నట్లు తెలిపారు. “ఆ పోస్ట్‌ను ఉపసంహరించుకున్నాం. అలాంటి పోస్ట్ చేయడం తప్పు. ఆ హ్యాండిల్ అడ్మిన్ విచారం వ్యక్తం చేశారు, కాంగ్రెస్ దానిని ఎప్పటికీ ఆమోదించదు. కేరళలో పార్టీ సోషల్ మీడియా సెల్‌ను పునర్నిర్మించాలని మేము నిర్ణయించుకున్నాము” అని ప్రకటించారు.
“దాని ప్రస్తుత ఇన్‌చార్జ్ వీటీ బలరామ్ రాజీనామా చేయాలనే ఉద్దేశ్యాన్ని వ్యక్తం చేశారు. వివాదాస్పద పోస్ట్ తనకు తెలియదు. సోషల్ మీడియాను నిర్వహించిన వారి తప్పిదం జరిగింది” అని జోసెఫ్ పేర్కొన్నారు.మరో రెండు నెలల్లో బీహార్‌లో జరగనున్న అసెంబ్లీ ఎన్నికలకు ముందే ఈ విషయం వెలుగులోకి వచ్చింది.
ఈ పోస్ట్‌ను ఖండిస్తూ, ఆర్జేడీకి చెందిన తేజస్వి యాదవ్ శుక్రవారం మాట్లాడుతూ, “నేను ఆ పోస్ట్‌ను చూడలేదు, కానీ అలాంటి ప్రకటన చేస్తే, అది చాలా దురదృష్టకరం, క్షమాపణ చెప్పాలి. ఎవరూ అలాంటి వ్యాఖ్యలు చేయకూడదు” అని స్పష్టం చేశారు. తర్వాత మీడియాతో మాట్లాడుతూ, ఆ పోస్ట్ వెనుక ఉద్దేశ్యం ఏదైనా కావచ్చు, అది తప్పు అని చెప్పారు. “మేము దానిని సమర్థించము” అని ఆయన తేల్చి చెప్పారు.
మరోవైపు, భారతీయ జనతా పార్టీ (బిజెపి) ఈ అవకాశాన్ని ఉపయోగించుకుని కాంగ్రెస్‌పై దాడి చేసి, బీహార్ ప్రజలను అవమానించిందని ధ్వజమెత్తింది. “మొదట, మన గౌరవనీయ ప్రధానమంత్రి నరేంద్ర మోదీ తల్లికి జరిగిన అవమానం, ఇప్పుడు మొత్తం బీహార్‌కు జరిగిన అవమానం – ఇది కాంగ్రెస్ నిజమైన లక్షణం, ఇది దేశం ముందు పదే పదే బయటపడుతోంది” అని బిజెపి నాయకుడు, బీహార్ ఉప ముఖ్యమంత్రి సామ్రాట్ చౌదరి ‘ఎక్స్’ పోస్ట్‌లో మండిపడ్డారు.
ముఖ్యమంత్రి నితీష్ కుమార్ నేతృత్వంలోని జనతాదళ్-యునైటెడ్ (జెడి-యు) కూడా కాంగ్రెస్‌ను విమర్శిస్తూ, ఈ పోస్ట్‌ను ‘చాలా సిగ్గుచేటు’ అని అభివర్ణించారు. ‘ఎక్స్’ పోస్ట్‌లో, జెడి-యు జాతీయ వర్కింగ్ ప్రెసిడెంట్ సంజయ్ కుమార్ ఝా మాట్లాడుతూ, కాంగ్రెస్ బీహార్ ప్రజలను అవమానించడమే కాకుండా, దేశ ‘ఉజ్వలమైన’ చరిత్రను కూడా అపహాస్యం చేసిందని ఆగ్రహం వ్యక్తం చేశారు.
కాంగ్రెస్ రాజ్యసభ ఎంపి సయ్యద్ నసీర్ హుస్సేన్ కూడా ఈ పోస్ట్‌ను విమర్శించారు, “ఏ రాష్ట్రాన్ని లేదా ఏ రాష్ట్ర నివాసితులను అలాంటి వాటితో పోల్చకూడదు. ట్వీట్ లేదా అది పోస్ట్ చేసిన సందర్భాన్ని నేను చూడలేదు, కానీ అది జరిగితే, దానిని ఉపసంహరించుకోవాలని మేము వారిని అడుగుతాము. ఏ రాష్ట్ర ప్రజల కోసం మేము దీనిని సహించము.” అని చెప్పారు. లోక్ జనశక్తి పార్టీ (రామ్ విలాస్) నాయకుడు చిరాగ్ పాశ్వాన్ ఈ పోలికను “బీహార్, కోట్లాది మంది బీహారీలకు తీవ్ర అవమానకరం” అని అభివర్ణించారు.
More Stories
రైతులకు మరో రెండు పథకాలు ప్రారంభించిన ప్రధాని మోదీ
చొరబాట్లేతోనే ముస్లిం జనాభా అసాధారణంగా పెరుగుదల
మహిళా జర్నలిస్టులు లేకుండా ఆఫ్ఘన్ మీడియా సమావేశం