పహల్గాం ఉగ్రదాడిని ఖండించిన ఎస్సీఓ సభ్యదేశాలు

ఐరాస గ్లోబల్ కౌంటర్-టెర్రరిజం స్ట్రాటజీని పూర్తిగా అమలు చేయడంలో ఐక్యరాజ్యసమితి ముఖ్య పాత్ర పోషిస్తుందని ఎస్​సీఓ పేర్కొంది. ఉగ్రవాద గ్రూపులను సంయుక్తంగా ఎదుర్కోవడానికి ఐరాస చార్టర్, అంతర్జాతీయ చట్ట సూత్రాలకు అనుగుణంగా సంబంధిత ఐరాసభద్రతా మండలి తీర్మానాన్ని అమలు చేయాలని తెలిపింది.  ఉగ్రవాదాన్ని ఎదుర్కోవడం ప్రధాన సవాల్‌గా మారిందని ఎస్​సీఓ విడుదల చేసిన ప్రకటన పేర్కొంది. స్వార్థ ప్రయోజనాల కోసం ఉగ్రవాదం, వేర్పాటువేదాన్ని ఉపయోగించుకోవటం ఆమోదయోగ్యం కాదని తేల్చిచెప్పాయి. ఉగ్రవాదాన్ని, వేర్పాటువాదాన్ని అణచివేసేందుకు సభ్య దేశాలు చేస్తున్న ప్రయత్నాలను గుర్తిస్తున్నామని వెల్లడించాయి.

“2025 ఏప్రిల్ 22న పహల్గాంలో జరిగిన ఉగ్రదాడిని ఎస్​సీఓలోని సభ్యదేశాలు తీవ్రంగా ఖండిస్తున్నాయి. ఈ ఉగ్రదాడిలో మరణించిన, గాయపడిన వారికి ప్రగాఢ సానుభూతి ప్రకటించాయి. ఈ దాడికి పాల్పడిన ఉగ్రవాదులను, అందుకు సహకరించిన వారిని చట్టం ముందుకు తీసుకవచ్చి శిక్షించాలి. ఉగ్రవాదం, వేర్పాటువాదం, తీవ్రవాదానికి వ్యతిరేకంగా జరిగే పోరాటానికి మద్దతు ఇస్తాం. ఉగ్రవాదం ఏ రూపంలో ఉన్నా దానిని అడ్డుకుంటాం. ఉగ్రవాదంపై ద్వంద్వ విధానాలు అనుసరించడం అమోదనీయం కాదు” అని ఎస్​సీఓ డిక్లరేషన్​లో పేర్కొంది.

కాగా, అంతకుముందు ఈ ఏడాది చైనాలో జూన్‌లో జరిగిన షాంఘై సహకార సంస్థ సభ్యదేశాల రక్షణ మంత్రుల సదస్సులో ఉమ్మడి ప్రకటనపై సంతకం చేసేందుకు భారత్ నిరాకరించింది. పాక్‌ ప్రేరేపిత సీమాంతర ఉగ్రవాదం, పహల్గాం ముష్కర దాడులను ప్రస్తావించకపోవడంపై తీవ్రంగా పరిగణించింది. దీంతో భారత్​ తరఫున హాజరైన రక్షణ మంత్రి రాజ్‌నాథ్‌ సింగ్‌ ఉమ్మడి ప్రకటనపై సంతకం చేసేందుకు నిరాకరించారు. ఫలితంగా ఎలాంటి ఉమ్మడి ప్రకటన లేకుండానే నాటి చర్చలు ముగిశాయి.