శ్రీశైలం రిజర్వాయర్‌లో ప్రస్తుతం కేవలం 44 టీఎంసీల నీరు మాత్రమే అందుబాటులో ఉంది. డెడ్ స్టోరేజ్ స్థాయికి నీరు చేరువ కావడంతో విద్యుత్ ఉత్పత్తి చేయడం సాంకేతికంగా వీలుపడదు. గత కొద్ది నెలలుగా వర్షాలు తగ్గడం, ఎగువ నుంచి ఇన్ ఫ్లో లేకపోవడంతో జలాశయం వెలవెలబోతోంది.  తాగునీటి అవసరాలకు ప్రాధాన్యత ఇవ్వాల్సి ఉండటంతో, విద్యుత్ కోసం నీటిని వాడకూడదని అధికారులు నిర్ణయించారు. దీంతో శ్రీశైలం కుడి, ఎడమ గట్టు జలవిద్యుత్ కేంద్రాలు ఇప్పుడు నిశ్శబ్దంగా మారిపోయాయి.

నీటి నిల్వలు తగ్గకముందు, గత పది నెలల కాలంలో ఇరు రాష్ట్రాలు శ్రీశైలం సాక్షిగా రికార్డు స్థాయిలో విద్యుత్‌ను ఉత్పత్తి చేశాయి.  ఆంధ్రప్రదేశ్ కుడిగట్టు కేంద్రం ద్వారా 2,060 మిలియన్ యూనిట్లు, తెలంగాణ ఎడమ గట్టు కేంద్రం ద్వారా 2,725 మిలియన్ యూనిట్ల విద్యుత్‌ను జనరేట్ చేశాయి. రాష్ట్ర విభజన జరిగిన తర్వాత ఈ స్థాయిలో భారీగా విద్యుత్ ఉత్పత్తి కావడం ఇదే మొదటిసారి కావడం విశేషం. 

గతంలో ఉమ్మడి ఆంధ్రప్రదేశ్‌లో 2007-08 ఆర్థిక సంవత్సరంలో గరిష్టంగా 2,544 మిలియన్ యూనిట్లు ఉత్పత్తి కాగా, ఇప్పుడు ఆ రికార్డులు కనుమరుగయ్యాయి. శ్రీశైలంలో జలవిద్యుత్ నిలిచిపోవడం వల్ల గ్రిడ్‌పై ఒత్తిడి పెరిగే అవకాశం ఉంది. జల విద్యుత్ అనేది ఖర్చు తక్కువతో కూడినది.  డిమాండ్ ఉన్నప్పుడు వెంటనే అందుబాటులోకి తెచ్చే వనరు. 

ఇప్పుడు అది అందుబాటులో లేకపోవడంతో, ఇరు రాష్ట్రాలు థర్మల్ విద్యుత్ లేదా బయటి మార్కెట్ నుండి కొనుగోలు చేసే విద్యుత్ పై ఆధారపడాల్సి వస్తుంది. ఎండలు ముదురుతున్న తరుణంలో ఏసీలు, కూలర్ల వాడకం పెరగడం వల్ల లోడ్ పెరిగి, రాబోయే రోజుల్లో విద్యుత్ కోతలు తప్పవేమో అన్న భయం వినియోగదారుల్లో నెలకొంది.