రాష్ట్రాలకు మరో 20 శాతం వాణిజ్య గ్యాస్ కేటాయింపులు 

వాణిజ్య సిలిండర్ల కొరత కారణంగా చాలా హోటళ్లు, రెస్టారెంట్లు, ధాబాలు, క్యాంటీన్లు మూతపడటంతో కేంద్రం ఈ నిర్ణయం తీసుకున్నట్లు తెలుస్తోంది. మరోవైపు, వలస కూలీలకు ఉచితంగా 5 కిలోల గ్యాస్‌ సిలిండర్లు సరఫరా చేయనున్నట్లు కేంద్రం వెల్లడించింది. ఎల్లుండి నుంచి వాటిని సరఫరా చేస్తామని ప్రకటించింది.

పశ్చిమాసియాలో నెలకొన్న ఉద్రిక్త పరిస్థితుల నేపథ్యంలో భారత్లో ఇంధన సరఫరాలపై తాత్కాలిక ఒత్తిడి ఏర్పడింది. ఈ ప్రభావంతో ముఖ్యంగా వాణిజ్య సిలిండర్ సరఫరాలు తగ్గుముఖం పట్టడంతో హోటళ్లు, రెస్టారెంట్లు, ఫుడ్ ప్రాసెసింగ్ యూనిట్లు ఇబ్బందులు ఎదుర్కొన్నాయి. అయితే ఆ పరిస్థితులు ప్రస్తుతం సాధారణ స్థితికి చేరుకుంటున్నాయని కేంద్ర ప్రభుత్వం తెలిపింది. 

ఈ నేపథ్యంలో వాణిజ్య సిలిండర్ కేటాయింపును మరింతగా పెంచుతూ కేంద్రం ఈ నిర్ణయం తీసుకుంది. వాణిజ్య అవసరాలకు కేటాయించిన సిలిండర్లలో ముందుగా కోత విధించిన ప్రభుత్వం, ఆ తర్వాత దశలవారీగా వాటిని పునరుద్ధరించింది. తాజాగా మరో 20 శాతం అదనపు కేటాయింపులు జరపడంతో మొత్తం వాణిజ్య సిలిండర్ కేటాయింపు 50 శాతానికి చేరింది.

అయితే ఈ అదనపు కేటాయింపుకు కొన్ని షరతులు విధించారు. వాణిజ్య సంస్థలు చమురు కంపెనీలతో నమోదు చేసుకోవాలి. అలాగే పైప్‌డ్ నేచురల్ గ్యాస్ కనెక్షన్ కోసం దరఖాస్తు చేసుకుంటేనే ఈ అదనపు కేటాయింపు సాధ్యమవుతుంది. ఇదిలా ఉండగా, దేశంలో గృహ వినియోగ సిలిండర్ సరఫరా స్థిరంగా ఉందని, పంపిణీ కేంద్రాల వద్దనుంచి ఎలాంటి కొరత లేదని ప్రభుత్వం ఓ ప్రకటనలో పేర్కొంది. 

సాధారణ డెలివరీ కార్యకలాపాలు కొనసాగుతున్నాయని అధికారులు తెలిపారు. అదేవిధంగా, ప్రజలు ఆందోళనలతో చేసే బుకింగ్స్ చాలా వరకు తగ్గుముఖం పట్టాయని పేర్కొన్నారు. వినియోగదారులు సిలిండర్ కోసం పంపిణీ కేంద్రాల వద్ద అనవసరంగా గుమికూడవద్దని, హోం డెలివరీపై ఆధారపడాలని సూచించారు.