ఉగ్ర కుట్ర చేధింపు.. పాక్‌కు సాయం చేస్తున్న ఇద్దరు అరెస్ట్

తాము సోషల్ మీడియా ద్వారా పాకిస్థాన్‌లోని ఐఎస్ఐ మద్దతుగల షాజాద్ భట్టి ముఠాతో సంప్రదింపులు జరిపామని చెప్పినట్లు అధికార వర్గాలు తెలిపాయి. లారెన్స్ బిష్ణోయ్ గ్యాంగ్‌తో జరిగిన ఘర్షణల కారణంగా ఇటీవల వార్తల్లో నిలిచిన పాకిస్థాన్‌లోని షాజాద్ భట్టి గ్యాంగ్‌కు దిల్లీ, గ్రేటర్ నోయిడాలోని పలు ప్రాంతాల ఫొటోలు, వీడియోలు, లొకేషన్‌లను పంపినట్లు పేర్కొన్నాయి. 

గత శనివారం గాజియాబాద్‌లోని కౌశాంబి పోలీసులు ఆరుగురు యువకులను అరెస్టు చేశారు. దేశవ్యాప్తంగా 50 ప్రదేశాలలో రహస్య సీసీటీవీ కెమెరాలను ఏర్పాటు చేయడానికి వారు ప్రణాళికలు వేసినట్లు దర్యాప్తులో తేలింది. ఈ కెమెరాలలో ఒకటి హరియాణాలోని సోనిపత్ రైల్వేస్టేషన్‌లోని ప్లాట్‌ఫామ్ నంబర్ 3 దగ్గర ఉన్న హై వోల్టేజ్ విద్యుత్ లైన్‌ స్తంభానికి నిందితులు అమర్చారు.

ఈ క్రమంలో ఐబీ, ఎన్ఐఏ, ఇండియన్ రైల్వేస్ అధికారుల పర్యవేక్షణలో గాజియాబాద్ పోలీసులు బుధవారం ఆ స్తంభం నుంచి రహస్య సీసీటీవీ కెమెరాను స్వాధీనం చేసుకున్నారు. ఈ మొత్తం నెట్‌వర్క్‌లో ప్రమేయం ఉన్న వ్యక్తులందరినీ గుర్తించడానికి, ఈ ఆపరేషన్ వెనుక ఉన్న కచ్చితమైన ఉద్దేశ్యాన్ని నిర్ధారించడానికి ఆర్పీఎఫ్, గాజియాబాద్ పోలీసులు, నిఘా సంస్థలు ప్రస్తుతం దర్యాప్తు చేపడుతున్నాయి.

సోనిపత్ రైల్వే పోలీసులకు తెలియకుండా గాజియాబాద్‌కు చెందిన నిందితుడు తన ముగ్గురు సహచరులతో కలిసి సీసీటీవీ కెమెరాను ఫిబ్రవరి 26న ఏర్పాటు చేసినట్లు తెలుస్తోంది.