మాతృత్వం అనేది ఒక ఎంపిక మాత్రమే ..జపాన్ మహిళలు

జపాన్‌ లో సంతానోత్పత్తి రేటు  వేగంగా పడిపోతున్న నేపథ్యంలో, ప్రభుత్వం జనాభాను పెంచేందుకు రకరకాల ప్రయత్నాలు చేస్తోంది. కానీ, ఇదే సమయంలో “మాతృత్వం అనేది ఒక ఎంపిక మాత్రమే, బాధ్యత కాదు” అని వాదిస్తూ కొందరు మహిళలు కోర్టు మెట్లెక్కారు. జపాన్ సమాజం మహిళలను కేవలం పిల్లలను కనే యంత్రాలుగా చూస్తోందని 29 ఏళ్ల కజానే కజియా ఆరోపిస్తున్నారు. 

ఆమెకు మాతృత్వంపై ఆసక్తి లేకపోవడంతో, 27 ఏళ్ల వయసులోనే స్వచ్ఛందంగా స్టెరిలైజేషన్ (వంధ్యత్వ ప్రక్రియ) చేయించుకోవాలని నిర్ణయించుకున్నారు. అయితే జపాన్ చట్టాలు దీనికి అడ్డుపడటంతో ఆమె అమెరికా వెళ్లి తన ఫెలోపియన్ గొట్టాలను తొలగించుకున్నారు. జపాన్ లో దశాబ్దాల కాలం నాటి కఠినమైన చట్టాలు అమలులో ఉన్నాయి.

ఒక మహిళ స్టెరిలైజేషన్ చేయించుకోవాలంటే ఈ నిబంధనలు పాటించాలి: ఆమెకు ఇప్పటికే ఇద్దరు లేదా అంతకంటే ఎక్కువ మంది పిల్లలు ఉండాలి. గర్భం దాల్చడం వల్ల ఆమె ప్రాణానికి ముప్పు ఉండాలి.  అత్యంత వివాదాస్పదమైన నిబంధన ఏంటంటే—భర్త లేదా జీవిత భాగస్వామి సమ్మతి తప్పనిసరి. “నా శరీరం కేవలం ప్రసూతి కోసం ఉద్దేశించినది కాదు” అనే నినాదంతో కజియా, మరో నలుగురు మహిళలు జపాన్ కోర్టులో దావా వేశారు.

తమకు సంతానం వద్దు అనుకునే హక్కును ప్రభుత్వం కాలరాస్తోందని వారు వాదిస్తున్నారు.  ఈ చట్టం రాజ్యాంగ విరుద్ధమని వారు పేర్కొంటున్నారు. జపాన్ వంటి సంప్రదాయ దేశాల్లో మహిళలపై ఉండే సామాజిక ఒత్తిడిని ఈ పోరాటం ప్రతిబింబిస్తోంది. వృద్ధాప్యం పెరుగుతున్న దేశంలో ప్రతి మహిళా పిల్లలను కనాలనే నిబంధన ఉండకూడదని, వ్యక్తిగత స్వేచ్ఛకు ప్రాధాన్యత ఇవ్వాలని వీరు డిమాండ్ చేస్తున్నారు. వచ్చే వారం వెలువడనున్న కోర్టు తీర్పు జపాన్ చరిత్రలో మైలురాయిగా నిలవనుంది.