సభా కార్యక్రమాలు సజావుగా జరగడానికి నిబంధనలు పాటించడం చాలా అవసరం అని ఓం బిర్లా చెప్పారు. “సభ నిబంధనల ప్రకారమే నడుస్తుంది. ఈ నిబంధనలను ప్రభుత్వమో లేదా ప్రతిపక్షమే రూపొందించలేదు. నిబంధనలు అనేవి సభ్యులందరికీ సమానంగా వర్తిస్తాయి” అని ఆయన స్పష్టం చేశారు. “ఏ అంశం మీదనైనా మాట్లాడాలని అనుకుంటే, ప్రధాన మంత్రైనా, మరెవరైనా ముందుగా నోటీసు ఇవ్వాలి. ఆ తర్వాతే వారికి అనుమతి లభిస్తుంది. కనుక ఈ సభలోని ఏ సభ్యునికి కూడా నిబంధనలకు విరుద్ధంగా, అనుమతి లేకుండా మాట్లాడే హక్కు ఉండదు” అని స్పీకర్ ఓం బిర్లా తేల్చిచెప్పారు.

కొంత మంది ప్రతిపక్ష సభ్యులు మాట్లాడాలని అనుకున్నప్పుడు, వారి మైక్​లను కట్ చేస్తున్నారనే ఆరోపణలపై ఓం బిర్లా తనదైన శైలిలో స్పందించారు. సభలోని ప్రతి ఒక్కరికీ వాక్ స్వాతంత్ర్యం ఉంటుందని, అయితే వారు నియమ, నిబంధనలను కచ్చితంగా పాటించాల్సి ఉంటుందని చురకలు అంటించారు.  “మైక్​ను ఆన్​ చేయడానికి, లేదా ఆఫ్ చేయడానికి నా దగ్గర ఎటువంటి స్విచ్​ ఉండదు. సభాధ్యక్షులు ఒక సభ్యునికి మాట్లాడడానికి అనుమతి ఇచ్చినప్పుడు మాత్రమే ఆ మైక్ ఆన్ అవుతుంది” అని స్పష్టం చేశారు.

కాగా, ఓం బిర్లా గురువారం లోక్​సభకు వచ్చిన సమయంలో, విపక్షాలు ఆయనకు వ్యతిరేకంగా నినాదాలు చేసి, నిరసన వ్యక్తం చేశాయి. దీనితో ఆయన ప్రశ్నోత్తరాల సమయంలో సభ సజావుగా సాగేలా సహకరించాలని ఇండియా కూటమి ఎంపీలను కోరారు.

“ప్రశ్నోత్తరాల సమయం అనేది పార్లమెంటరీ కార్యకలాపాల్లో అత్యంత కీలకమైనది. దీనిని కొనసాగినివ్వాలని నేను కోరుతున్నాను. ఎంపీలు తమ సమస్యలను ప్రశ్నోత్తరాల సమయంలో లేవనెత్తి ప్రభుత్వం దానికి జవాబుదారీగా ఉండేలా చేయవచ్చు. గత రెండు రోజులుగా జరిగిన చర్చపై మధ్యాహ్నం నా అభిప్రాయాలను చెబుతాను” అని తెలిపారు. అయినప్పటికీ విపక్షాలు శాంతించకపోవడం గమనార్హం. దీనితో తన ప్రసంగం ముగిసిన వెంటనే బిర్లా సభను వాయిదా వేశారు.