కీల‌క‌మైన‌ అమెరికా రేడార్‌ను పేల్చేసిన ఇరాన్‌

పశ్చిమాసియాలో కొనసాగుతున్న ఇరాన్-ఇజ్రాయెల్ పోరులో అగ్రరాజ్యం అమెరికాకు కోలుకోలేని దెబ్బ తగిలింది. జోర్డాన్‌లో మోహరించిన అమెరికాకు చెందిన అత్యంత శక్తివంతమైన మిసైల్ డిఫెన్స్ రాడార్ వ్యవస్థను ఇరాన్ క్షిపణులు ధ్వంసం చేశాయి. జోర్డాన్‌లోని కీలకమైన మువాఫ్ఫక్ సల్టి ఎయిర్ బేస్ లక్ష్యంగా జరిగిన ఈ దాడిలో  ఏఎన్-టీపీవై-2 రాడార్ పూర్తిగా నాశనమైనట్లు తాజా శాటిలైట్ చిత్రాలు స్పష్టం చేస్తున్నాయి.

యుద్ధం ప్రారంభమైన తొలి రోజుల్లోనే ఈ విధ్వంసం జరిగినట్లు అమెరికా రక్షణ శాఖ అధికారులు ఇప్పుడు ధృవీకరిస్తున్నారు.  ఏఎన్‌-టీపీవై-2 రేడార్‌ను థాడ్ క్షిప‌ణి బ్యాట‌రీగా వాడుతారు. శ‌త్ర దేశ క్షిప‌ణులు, డ్రోన్ల రాక‌ల‌ను ఈ రేడార్ ప‌సిక‌ట్టి మిస్సైల్ వ్య‌వ‌స్థ‌కు స‌మాచారం ఇస్తుంది. అయితే జోర్డాన్‌, సౌదీ అరేబియా, యూఏఈ దేశాల్లో ఉన్న అమెరికా మిస్సైల్ ఇంట‌ర్‌సెప్టార్ రేడార్ కేంద్రాల‌ను ఇరాన్ ధ్వంసం చేసిన‌ట్లు శాటిలైట్ ఇమేజ్‌ల ద్వారా అంచ‌నా వేస్తున్నారు. 

సౌదీ అరేబియాలోని ప్రిన్స్ సుల్తాన్ ఎయిర్‌బేస్ వ‌ద్ద ఉన్న రేడార్ వ్య‌వ‌స్త‌ను ధ్వంసం చేసిన‌ట్లు తెలుస్తోంది. దీంతో పాటు యూఏఈలోని స‌ద‌ర్‌, రువాయిస్‌లో ఉన్న అమెరికా రేడార్లు కూడా ధ్వంస‌మైన‌ట్లు శాటిలైట్ పిక్స్ ద్వారా భావిస్తున్నారు. టార్గెట్ దిశ‌గా వ‌స్తున్న బాలిస్టిక్ క్షిప‌ణుల‌ను రేడార్లు ప‌సిక‌ట్ట‌డం వ‌ల్లే యాంటీ మిస్సైల్ వ్య‌వ‌స్థ యాక్టివేట్ అవుతుంది. 

ఈ రాడార్ ధ్వంసం కావడం అనేది అమెరికాకు కేవలం ఆర్థిక నష్టం మాత్రమే కాదు, వ్యూహాత్మకంగా పెద్ద షాక్. సుమారు 300 మిలియన్ డాలర్ల (దాదాపు రూ. 2,500 కోట్లు) విలువైన ఈ రాడార్, అమెరికా గర్వకారణంగా చెప్పుకునే ‘థాడ్’ మిసైల్ డిఫెన్స్ సిస్టమ్‌లో అతి ముఖ్యమైన భాగం. శత్రువుల బాలిస్టిక్ క్షిపణులను అవి లక్ష్యాన్ని చేరుకోకముందే అంతరిక్షంలోనే గుర్తించి, వాటిని కూల్చివేయడంలో ఈ రాడార్ కీలక పాత్ర పోషిస్తుంది. ఇది అందుబాటులో లేకపోవడంతో గల్ఫ్ ప్రాంతంలో అమెరికా, దాని మిత్రదేశాల రక్షణ వలయంలో పెద్ద రంధ్రం పడినట్లయింది.