ఇరాన్‌పై సైనిక చర్య నాలుగు వారాలు కొనసాగవచ్చు

ఇరాన్‌పై సైనిక చర్య నాలుగు వారాలు కొనసాగవచ్చని అమెరికా అధ్యక్షుడు డొనాల్డ్ ట్రంప్ తెలిపారు. “ఇరాన్ ఒక పెద్ద దేశం కాబట్టి ఇది నాలుగు వారాలు లేదా అంతకంటే తక్కువ సమయం పడుతుంది” అని పేర్కొన్నారు.  అమెరికా-ఇజ్రాయెల్ సంయుక్తంగా చేపట్టిన ‘ఆపరేషన్ ఎపిక్ ఫ్యూరీ’లో ఇరాన్ కీలక నేతలు హతమైనట్లు డొనాల్డ్ ట్రంప్ ధ్రువీకరించారు. తమ లక్ష్యాలను సాధించే వరకు ఇరాన్​పై అమెరికా చేపట్టిన ఆపరేషన్​ను కొనసాగిస్తామని స్పష్టం చేశారు.

ఆపరేషన్ ఎపిక్​ ఫ్యూరీని పూర్తి శక్తితో కొనసాగిస్తామని ప్రకటించారు.  “ఒక్క దెబ్బకు 48 మంది ఇరాన్ అగ్రనేతలను లేపేశాం.. ఇది మాకు అద్భుత విజయం” అంటూ ప్రకటించారు. .టెహ్రాన్ నడిబొడ్డున అమెరికా, ఇజ్రాయెల్ దళాలు విరుచుకుపడ్డాయి. దాదాపు 1,200కు పైగా బాంబులు, ఆయుధ సామగ్రితో ఇరాన్‌పై దాడి చేశాయి. ఈ విధ్వంసంలో ఇరాన్ అగ్రనాయకత్వం కుప్పకూలింది. ఇరాన్ ఒకవేళ ప్రతీకారానికి దిగితే, ఇంతకంటే భారీ మూల్యం చెల్లించుకోవాల్సి వస్తుందని ట్రంప్ తీవ్ర హెచ్చరికలు జారీ చేశారు. 

అటు ఇజ్రాయెల్ ప్రధాని బెంజమిన్ నెతన్యాహు కూడా ఇది తమ ఉనికి కోసం జరుగుతున్న యుద్ధమని, దాడులను మరింత ఉద్ధృతం చేస్తామని స్పష్టం చేశారు.  ఇంతలో, అవసరమైతే తమ ప్రయోజనాలను, గల్ఫ్ మిత్రదేశాల ప్రయోజనాలను కాపాడుకోవడానికి ఇరాన్‌పై “రక్షణాత్మక చర్య” తీసుకోవడానికి సిద్ధంగా ఉన్నామని ఫ్రాన్స్, జర్మనీ, యుకె ఆదివారం తెలిపాయి. అదే సమయంలో, గల్ఫ్ దేశాలలో ఆందోళనలు పెరుగుతున్నాయి. 

బహ్రెయిన్‌లోని సల్మాన్ ట్రేడింగ్ జోన్‌లో ఒక విదేశీ నౌక క్షిపణి శిథిలాలతో ఢీకొన్న తర్వాత సంభవించిన అగ్నిప్రమాదంలో ఒక ఆసియా వ్యక్తి మరణించగా, మరో ఇద్దరు గాయపడ్డారు. ఖమేనీ హత్యకు ప్రతీకారంగా ఇరాన్ అమెరికా సైనిక స్థావరాలపై దాడులను తీవ్రతరం చేసిన తర్వాత మొత్తం గల్ఫ్ ప్రాంతం యుద్ధం అంచున ఉంది. ఆదివారం, ఇరాన్ దుఖ్మ్ ఓడరేవుపై దాడి చేసి, ఒమన్‌కు తన దాడులను విస్తరించింది. మలయాళీలు సహా ప్రవాసులు తీవ్ర ఆందోళన చెందుతున్నారు.

అల్ జజీరా ప్రకారం, ఇరాన్ దాడిలో యుఎఇలో ముగ్గురు, కువైట్, బహ్రెయిన్‌లలో ఒక్కొక్కరు మరణించారు. మధ్యప్రాచ్యంలో జరిగిన దాడిలో ముగ్గురు యుఎస్ సైనికులు మరణించారు. ఐదుగురు సైనికులు గాయపడ్డారు. ఇంతలో, అరేబియా సముద్రంలో యుఎస్ విమాన వాహక నౌక యుఎస్ఎస్ అబ్రహం లింకన్‌పై నాలుగు బాలిస్టిక్ క్షిపణులతో దాడి చేసినట్లు ఇరాన్ రివల్యూషనరీ గార్డ్ పేర్కొంది. 

భూమి, సముద్రం ఇప్పుడు ఉగ్రవాద దాడి చేసేవారికి శ్మశానవాటికలుగా మారుతుందని కూడా ఆ ప్రకటన హెచ్చరించింది.  మరోవైపు, ఇరాన్ యుద్ధనౌకను ముంచివేసినట్లు అమెరికా పేర్కొంది. విమాన వాహక నౌకపై దాడి జరిగిందని అమెరికా ఖండించింది.  ఇరాన్ సార్వభౌమత్వాన్ని గౌరవించని అమెరికన్ సామ్రాజ్యవాద శక్తుల దాడుల నుండి తనను తాను రక్షించుకోవడానికి ఇరాన్ తన చర్యలను కొనసాగిస్తోంది.

పౌరులను చంపిన యుఎస్-ఇజ్రాయిల్ దాడులకు ప్రతిస్పందనగా ఇరాన్ గల్ఫ్ ప్రాంతంలోని యుఎస్ స్థావరాలను లక్ష్యంగా చేసుకుంది. కాగా, లెబనాన్ రాజధాని బీరూట్‌పై ఇజ్రాయిల్ దాడి చేసింది. ఇరాన్ సుప్రీం నాయకుడు అలీ ఖమేనీ హత్య, పునరావృత ఇజ్రాయిల్ దురాక్రమణలకు ప్రతీకారంగా లెబనాన్ మిలిటెంట్ సంస్థ హిజ్బుల్లా సోమవారం తెల్లవారుజామున ఇజ్రాయిల్ సరిహద్దు దాటి క్షిపణులు ప్రయోగించింది. ఈ మేరకు హెజ్బుల్లా ఒక ప్రకటనను విడుదల చేసింది. 

ఒక సంవత్సరానికి పైగా కాలం తర్వాత హెజ్బుల్లా ఇజ్రాయిల్‌పై దాడి చేసినట్లు ప్రకటించుకోవడం ఇదే తొలిసారి. ఈ దాడిలో ఒక ప్రక్షేపకాన్ని అడ్డుకున్నామని, మరికొన్ని బహిరంగ ప్రదేశాల్లో పడ్డాయని ఇజ్రాయిల్ రక్షణ దళాలు తెలిపాయి. ఈ ఘటనల్లో ఎటువంటి ప్రాణనష్టం లేదా ఆస్తినష్టం జరగలేదని అధికారులు వెల్లడించారు. 2024లో అమెరికా మధ్యవర్తిత్వంతో ఇజ్రాయిల్–లెబనాన్ మధ్య కాల్పుల విరమణ ఒప్పందం కుదిరింది. దీని ద్వారా ఇజ్రాయిల్, హెజ్బుల్లా మధ్య ఏడాదికిపైగా కొనసాగిన ఘర్షణలకు ముగింపు పలికింది. ఆ సమయంలో ఇజ్రాయిల్ దాడులు హెజ్బుల్లాను గణనీయంగా బలహీనపరిచినట్లు విశ్లేషకులు భావించారు.