అనేక పోలింగ్ కేంద్రాల వద్ద బిజెపి కార్యకర్తలపై దాడులు

ఒకవైపు ధన ప్రలోభాలు, మరోవైపు పోలీసు ఒత్తిళ్లు, నాయకుల బెదిరింపులు-ఇవన్నింటిని భరించి కూడా బిజెపి కార్యకర్తలు పార్టీ కోసం అంకితభావంతో కృషి చేశారని ఆయన కొనియాడారు.   ఎన్నికల ముందు రోజు మక్తల్‌లో కాంగ్రెస్ పార్టీ ఓటమి భయంతో తన ఆధిపత్యాన్ని ప్రదర్శించుకునే ప్రయత్నంలో బిజెపి కార్యకర్తలపై బెదిరింపులకు, అధికార దుర్వినియోగానికి, ప్రచార సమయంలో అనేక అరాచకాలకు పాల్పడిందని రామచందర్ రావు మండిపడ్డారు. 

ఈ ఎన్నికల్లో కాంగ్రెస్ అనేక స్థానాల్లో ఓటమి తప్పదని, బీఆర్ఎస్ పార్టీ కూడా అరకొర తప్పితే గెలిచేదేమీ లేదని స్పష్టం చేశారు. ఖచ్చితంగా బిజెపి అనేక కీలక స్థానాల్లో విజయాన్ని సాధిస్తుందని భరోసా వ్యక్తం చేశారు.  పోలీసులను అడ్డుపెట్టుకుని బిజెపి కార్యకర్తలపై దాడులు చేస్తే సహించబోమని ఆయన హెచ్చరించారు. బిజెపి కార్యకర్తలు ప్రతిఘటించి, ఎదురుతిరిగితే పరిస్థితులు దారుణంగా ఉంటాయని తేల్చి చెప్పారు.  బిజెపి కార్యకర్తలు కాంగ్రెస్ పార్టీ నాయకులు వేధింపులకు భయపడి ఆత్మవిశ్వాసం కోల్పోవద్దని చెబుతూ పార్టీ అన్ని విధాలుగా ఆదుకుంటుందని భరోసా ఇచ్చారు.

కాంగ్రెస్ ప్రభుత్వం గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ)ను అశాస్త్రీయంగా మూడు భాగాలుగా విభజించిందని విమర్శించారు. తమ రాజకీయ లబ్ధి కోసం కాంగ్రెస్ ప్రభుత్వం ఒక కార్పొరేషన్‌ను దారుస్సలాం కేంద్రంగా ఉన్న మజ్లిస్ పార్టీకి కట్టబట్టే ప్రయత్నం చేసిందని ఆరోపించారు.  కోర్ హైదరాబాద్‌ను మజ్లిస్‌కు తాకట్టుపెట్టే విధంగా జీహెచ్ఎంసీని విభజించి, జీహెచ్ఎంసీతో పాటు సైబరాబాద్ మున్సిపల్ కార్పొరేషన్, మల్కాజ్‌గిరి మున్సిపల్ కార్పొరేషన్ గా చేశారని తెలిపారు.