మున్సిపల్ ఎన్నికల్లో బిజెపికి పవన్ కళ్యాణ్ ప్రచారం

* బిజెపి జాతీయ అధ్యక్షుడు నితిన్ నబిన్ తొలిసారి తెలంగాణాలో నేడే పర్యటన

తెలంగాణాలో జరుగుతున్న మునిసిపల్ ఎన్నికలలో బిజెపి అభ్యర్థులకు ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కళ్యాణ్ మద్దతు తెలిపారు. బిజెపి అభ్యర్థుల ఎన్నికల ప్రచారంలో పాల్గొంటానని కూడా చెప్పారు. పవన్ కల్యాణ్​ ఫిబ్రవరి 7,8 తేదీల్లో పలు మున్సిపాలిటీల్లో ఎన్నికల ప్రచారంలో పాల్గొంటారని జనసేన పార్టీ కేంద్ర కార్యాలయం తెలిపింది. 

పవన్ కళ్యాణ్ ను ఆయన నివాసంలో రాష్ట్ర బిజెపి అధ్యక్షులు ఎన్ రామచందర్ రావు కేంద్ర మంత్రి జి కిషన్ రెడ్డితో కలిసి మర్యాదపూర్వకంగా సమావేశమై ఎన్నికల గురించి చర్చించారు.  రాబోయే మున్సిపల్ ఎన్నికల్లో బీజేపీ తరఫున ప్రచారం చేయడానికి ఆయన ఈ సందర్భంగా సానుకూలత వ్యక్తం చేశారు.  వాస్తవానికి తెలంగాణ మున్సిపల్ ఎన్నికల నగారా మోగకముందే జనసేన పార్టీ ఎన్నికల్లో సొంతంగా పోటీ చేసేందుకు ఏర్పాట్లు చేసుకుంది. 

పార్టీ ప్రధాన కార్యదర్శి రామ్ తాళ్లూరి ఆధ్వర్యంలో తెలంగాణ నుంచి భారీ స్థాయిలో చేరికలను ప్రోత్సహించడం, సమన్వయ కమిటీలను నియమించడం వంటి చర్యలతో కేడర్‌లో కొత్త ఉత్సాహం నింపే ప్రయత్నం చేశారు. కానీ, తీరా నామినేషన్ల ప్రక్రియ ముగిసే సమయానికి ఆ హడావుడి కనిపించడం లేదు. ఎన్నికల బరిలో నిలవాలని ఉత్సాహం చూపిన అభ్యర్థులకు పార్టీ తరపున కనీస మార్గదర్శకత్వం కరువైనట్లు కనిపిస్తోంది. దానితో రాష్ట్ర వ్యాప్తంగా ఎన్ని స్థానాల్లో జనసేన పోటీ చేస్తోంది? ఎంతమందికి పార్టీ అధికారికంగా ‘బీ-ఫారాలు’ అందజేసింది? అనే విషయంలో పార్టీ నాయకత్వానికే స్పష్టత లేనట్లుగా కనిపిస్తోంది.