బాలికల విద్య దేశ అభివృద్ధిలో కీలక పాత్ర పోషిస్తుంది

బాలికల విద్య సామాజిక మార్పుకు నాంది అని పేర్కొంటూ అది దేశ అభివృద్ధిలో కీలక పాత్ర పోషిస్తుందని ఒడిశా రాష్ట్ర గవర్నర్ కంభంపాటి హరిబాబు తెలిపారు. ఉంగుటూరులో నివేదిత గురుకులం నూతన భవనం ప్రారంభోత్సవం, ద్వితీయ వార్షికోత్సవ కార్యక్రమంలో ముఖ్య అతిథిగా పాల్గొంటూ గురుకులం అనేది కేవలం విద్యను అందించే సంస్థ మాత్రమే కాదని, అది ఒక సంపూర్ణ జీవన విధానాన్ని బోధిస్తుందని, క్రమశిక్షణ, వ్యక్తిత్వం, ఆత్మవిశ్వాసాన్ని పెంపొందిస్తుందని తెలిపారు.

బాలికల విద్యకు అంకితమైన గురుకులం సామాజిక మార్పుకు శక్తివంతమైన కేంద్రంగా నిలుస్తుందని చెప్పారు. బాలికల విద్యా అనేది ఒక అవకాశం కాదని, అది దేశ భవిష్యత్తును నిర్మించే మౌలిక అవసరమని బలంగా గుర్తించాల్సిన అవసరం ఉందని సూచించారు.  ఒక బాలిక విద్యను పొందితే ఒక కుటుంబం అభివృద్ధి చెందుతుందని, ఆ కుటుంబాలు అభివృద్ధి చెందితే సమాజం బలపడుతుందని, సమాజం బలపడితే దేశం ప్రగతి సాధిస్తుందని పేర్కొన్నారు.

సిస్టర్ నివేదిత ఒక అసాధారణమైన మహనీయురాలు అని, ధైర్యం, అంకిత భావం, స్వార్థరహిత సేవ ఆమె జీవన తత్వానికి ప్రతిరూపాలని గవర్నర్ కొనియాడారు. ఆమె పాశ్చాత్య దేశంలో జన్మించినప్పటికీ, భారతదేశాన్ని ఆమె తన ఆధ్యాత్మిక, సామాజిక కర్మభూమిగా స్వీకరించిందని, మహిళలు, బాలికల విద్య సాధికారతకు తన సంపూర్ణ జీవితాన్ని అంకితం చేశారని ఆమె సేవలను కొనియాడారు.