మావోయిస్టుల వద్ద అమెరికా, ఇజ్రాయిల్ తుపాకులు!

మావోయిస్టు అగ్రనేత బర్సే సుక్కా అలియాస్ దేవా, తెలంగాణకు చెందిన రాజి రెడ్డి అతని భార్యతో పాటు 20 మంది సభ్యులు భారీగా ఆయుధాలు, నగదు అప్పగించి తెలంగాణ డీజీపీ శివధర్​రెడ్డి ఎదుట లొంగిపోయారు.  డీజీపీ శివధర్ రెడ్డి తెలిపిన వివరాల ప్రకారం, మావోయిస్టు పార్టీ గెరిల్లా ఆర్మీ ఛీఫ్​గా దేవా పని చేస్తున్నారు.  లొంగిపోయిన వారి నుంచి పెద్ద ఎత్తున ఆయుధాలను, రూ.20 లక్షల నగదును స్వాధీనం చేసుకున్నట్లు ఆయన తెలిపారు.

హెలికాప్టర్లను కూల్చేందుకు వాడే సామగ్రి కూడా స్వాధీనం చేసుకున్నామన్నారు. ఈ లొంగుబాటు పీఎల్​జీఏకు భారీ దెబ్బగా భావిస్తున్నట్లు పేర్కొన్నారు. పీఎల్​జీఏ బెటాలియన్​లో 400 మంది సభ్యులు ఉండగా ప్రస్తుతం 66 మంది మాత్రమే మిగిలారని డీజీపీ శివధర్ రెడ్డి వెల్లడించారు. పీఎల్​జీఏ ప్రస్తుతం పూర్తిగా క్షీణించిందని పేర్కొన్నారు. తెలంగాణలోని పెద్దపల్లి జిల్లా కిష్టంపేట్​కు చెందిన రాజిరెడ్డి లొంగుబాటుతో ఇంకా రాష్ట్రానికి చెందిన ఒక్కరు మాత్రమే స్టేట్ కమిటీలో ఉన్నారని తెలిపారు.