2027 రాష్ట్ర అసెంబ్లీ ఎన్నికలకు ముందు పార్టీలో కుల ఆధారిత వర్గపోరును అరికట్టే ప్రయత్నంలో భాగంగా, ఉత్తరప్రదేశ్ పార్టీ శాసనసభ్యులు తమ కుల సమూహాల ఆధారంగా ఎలాంటి సమావేశాలు నిర్వహించవద్దని బీజేపీ నాయకత్వం హెచ్చరించినట్లు కనిపిస్తుంది. రాష్ట్రంలో బ్రాహ్మణ సమాజంపై వివక్ష చూపుతున్నారనే ఆరోపణలపై చర్చించడానికి పార్టీకి చెందిన పలువురు బ్రాహ్మణ ఎమ్మెల్యేలు, ఎమ్మెల్సీలు లక్నోలోని కుషీనగర్ ఎమ్మెల్యే పి.ఎన్. పాఠక్ నివాసంలో సమావేశమైన రెండు రోజుల తర్వాత ఈ పరిణామం చోటుచేసుకుంది.
కొత్తగా నియమితులైన యూపీ బీజేపీ అధ్యక్షుడు పంకజ్ చౌదరి గురువారం బహిరంగంగా ఈ హెచ్చరిక జారీ చేశారు. ఒక కఠినమైన ప్రకటనలో, అటువంటి భేటీలు “పార్టీ రాజ్యాంగం, విలువలకు విరుద్ధం” అని స్పష్టం చేశారు. భవిష్యత్తులో ఇలాంటి సంఘటనలు పునరావృతమైతే దానిని “క్రమశిక్షణా రాహిత్యంగా” పరిగణిస్తామని ఆయన హెచ్చరించారు.
బ్రాహ్మణ వర్గానికి చెందిన పార్టీ ఎమ్మెల్యేలు, ఎమ్మెల్సీల ఒకే ఒక్క సమావేశం కారణంగానే నాయకత్వం స్పందించాల్సి రాలేదని ఒక బీజేపీ నాయకుడు చెప్పారు. మంగళవారం రాత్రి బ్రాహ్మణ శాసనసభ్యుల విందు సమావేశానికి ముందు, అదే రోజు మధ్యాహ్నం లక్నోలోని ఒక హోటల్లో పశ్చిమ యూపీకి చెందిన బీజేపీ ఎమ్మెల్యేలు, కార్యకర్తల మరో సమావేశం జరిగిందని పేర్కొన్నారు.
ఈ సమావేశానికి హాజరైన వారిని పశ్చిమ యూపీకి చెందిన ఒక సీనియర్ జాట్ పార్టీ నాయకుడి ప్రత్యర్థులుగా భావిస్తున్నారు. ఆ సమావేశానికి సంబంధించిన ఫోటోలు బయటకు రాకపోవడంతో దానికి పెద్దగా ప్రచారం లభించలేదు. 2027 రాష్ట్ర అసెంబ్లీ ఎన్నికలకు ముందు పార్టీలో కుల ఆధారిత వర్గపోరును అరికట్టే ప్రయత్నంలో భాగంగానే, ఉత్తరప్రదేశ్ పార్టీ శాసనసభ్యులు తమ కుల సమూహాల ఆధారంగా ఎలాంటి సమావేశాలు నిర్వహించవద్దని బీజేపీ నాయకత్వం హెచ్చరించినట్లు కనిపిస్తుంది.
మంగళవారం జరిగిన సమావేశాన్ని తూర్పు యూపీకి చెందిన కొందరు బ్రాహ్మణ పార్టీ శాసనసభ్యులు తమ “బల ప్రదర్శన”గా నిర్వహించారని బీజేపీ వర్గాలు తెలిపాయి. దీనిని ‘బాటీ చోఖా’ విందు సందర్భంగా ఏర్పాటు చేశారు. ఈ సమావేశంలో భూమిహార్, కుర్మీ వర్గాలకు చెందిన కొందరు బీజేపీ శాసనసభ్యులు కూడా ఉన్నారని ఆ వర్గాలు తెలిపాయి.
“మంగళవారం రాత్రి విందు సమావేశంలో పాల్గొన్న బీజేపీ ఎమ్మెల్యేలు, ఎమ్మెల్సీల పేర్లు, సంప్రదింపు వివరాలు ఉన్న రెండు పేజీల చిత్రాలు సోషల్ మీడియాలో వైరల్ అయ్యాయి. బ్రాహ్మణ పార్టీ శాసనసభ్యులతో ఒక వాట్సాప్ గ్రూపును ఏర్పాటు చేయడానికి ఈ వివరాలను సేకరించారు,” దానితో ఈ భేటీపై కలకలం రేగిన్నట్లు పార్టీ వర్గాలు పేర్కొంటున్నాయి.
ఈ సమావేశంపై బీజేపీ కేంద్ర నాయకత్వం అసంతృప్తిగా ఉందని, ముఖ్యమంత్రి యోగి ఆదిత్యనాథ్ కార్యాలయం కూడా తన అసంతృప్తిని వ్యక్తం చేసిందని ఆ వర్గాలు తెలిపాయి. “ఆ తర్వాత, సీనియర్ బీజేపీ నాయకులు ఆ శాసనసభ్యులను సంప్రదించి వారిని మందలించారు. వారికి హెచ్చరిక కూడా జారీ చేశారు,” అని తెలిసింది.
“రాష్ట్ర బీజేపీ శాసనసభ్యులకు జారీ చేసిన ఈ హెచ్చరిక, పార్టీ నాయకులలో కుల ఆధారిత వర్గాలు ఏర్పడే అవకాశాన్ని నిరోధించడానికి ఉద్దేశించింది. ఈ వర్గాలు భవిష్యత్తులో 2027 అసెంబ్లీ ఎన్నికల సమయంలో టిక్కెట్లు, మంత్రి పదవుల కోసం ఒత్తిడి తెచ్చి బేరసారాలు జరపవచ్చు. ఇటువంటి ఒత్తిడి వర్గాల ఏర్పాటు ఎన్నికలలో పార్టీకి నష్టం కలిగించవచ్చు,” అని మరో పార్టీ నాయకుడు పేర్కొన్నారు.
“బీజేపీ టిక్కెట్ల పంపిణీపై ఠాకూర్ వర్గంలోని ఒక వర్గంలో ఉన్న అసంతృప్తి 2024 లోక్సభ ఎన్నికలలో యూపీలోని అనేక స్థానాల్లో పార్టీకి నష్టం కలిగించింది. అయితే ఠాకూర్ నాయకులతో రోడ్షోలు, ర్యాలీలు నిర్వహించడం ద్వారా పార్టీ దానిని అదుపు చేయడానికి ప్రయత్నించింది,” అని ఈ సందర్భంగా గుర్తు చేస్తున్నారు.
గత ఆగస్టులో లక్నోలో బీజేపీకి చెందిన పలువురు ఠాకూర్ ఎమ్మెల్యేల అనధికారిక సమావేశం జరిగింది. ఈ ఎమ్మెల్యేలకు పార్టీ ఎందుకు ఎలాంటి హెచ్చరిక జారీ చేయలేదని అడగ్గా, ఆ నాయకుడు మాట్లాడుతూ, “అప్పట్లో పార్టీ నాయకత్వం సంస్థాగత ఎన్నికల నిర్వహణలో నిమగ్నమై ఉంది. ఇప్పుడు బీజేపీకి పంకజ్ చౌదరి కొత్త రాష్ట్ర అధ్యక్షుడిగా ఉన్నారు. ఆయన ద్వారా, పార్టీ నాయకత్వం పార్టీలో ఇటువంటి ప్రత్యేక కుల సమూహాల ఏర్పాటును ఆపడానికి ప్రయత్నించింది. ఎవరైనా హద్దులు దాటితే, వారు చర్యను ఎదుర్కోవలసి ఉంటుంది” అని స్పష్టం చేశారు.
రాష్ట్రంలో ఎన్నికల సంఘం (ఈసీ) నిర్వహిస్తున్న ఓటర్ల జాబితా ప్రత్యేక సమగ్ర సవరణ (ఎస్ఐఆర్) ప్రక్రియను పర్యవేక్షించాలని పార్టీ ఎంపీలు, ఎమ్మెల్యేలందరికీ ఆదేశాలు జారీ చేసినప్పుడు, ఈ శాసనసభ్యులు వేరే విషయంపై సమావేశం నిర్వహించి, మీడియా దృష్టిని ఆకర్షించి, బీజేపీ ప్రభుత్వంపై విమర్శలు చేయడానికి ప్రతిపక్షాలకు కొత్త అవకాశాన్ని కల్పించారని, అందుకే బీజేపీ ఆగ్రహం వ్యక్తం చేసిందని ఆయన తెలిపారు.
More Stories
ఛత్తీస్గఢ్లో హింసాత్మకంగా బొగ్గు గనుల ప్రాజెక్ట్ నిరసనలు
ఐఏఎస్, ఐపీఎస్ ల ఆస్తుల వివరాలపై కేంద్ర అల్టిమేటం
తప్పుడు మత దూషణ ఆరోపణలతో బంగ్లా హిందువులపై దాడులు