హిందూ కార్యకర్తలు ఏదేశంలోనైనా ధర్మానికి అనువుగా జీవించాలి

శ్రీ విశ్వ నికేతన్ తరపున స్వాగతం పలికిన  శ్యామ్ పరాండే మాట్లాడుతూ ప్రతి ఐదేళ్లకు ఒకసారి ముఖ్య కార్యకర్తలు ఒకచోట చేరి, పరస్పరం అనుసంధానమై తమ అనుభవాలను పంచుకుంటూ, సామూహిక సంకల్పాన్ని బలోపేతం చేసుకునే ఒక విశిష్టమైన వేదిక ఈ విశ్వ సంఘ్ శిబిరం అని పేర్కొన్నారు. “ఇది కేవలం ఒక కార్యక్రమం మాత్రమే కాదు, మన ఉమ్మడి లక్ష్యాన్ని, నిబద్ధతను పునరుద్ఘాటించే ఒక ఆనందదాయకమైన సమ్మేళనం” అని చెప్పారు.

హార్ట్‌ఫుల్‌నెస్ మూవ్‌మెంట్ అంతర్జాతీయ ఆధ్యాత్మిక మార్గదర్శి దాజీ గౌరవ అతిథిగా పాల్గొన్నారు. భారతీయ విద్యాభవన్ అధ్యక్షులు, అస్సాం, పంజాబ్, తమిళనాడు రాష్ట్రాల మాజీ గవర్నర్ గౌరవనీయ బన్వరీలాల్ పురోహిత్  శిబిరాధికారిగా అధ్యక్షత వహించారు. హిందూ స్వయంసేవక్ సంఘ్ (హెచ్ఎస్ఎస్) అంతర్జాతీయ సమన్వయకర్త  సౌమిత్ర గోఖలే స్వాగతం పలుకుతూ ప్రపంచవ్యాప్తంగా హిందూ ధర్మాన్ని ఆచరించడానికి, విస్తరించడానికి అంకితమైన కార్యకర్తల కుటుంబాల కలయికే ఈ శిబిరం అని తెలిపారు. శిబిర కార్యవాహ డాక్టర్ సిద్ధేష్ షెవాడే వేదికపై ఉన్న ప్రముఖులను పరిచయం చేశారు.

శిబిర నేపథ్యమైన “ధర్మే సర్వం ప్రతిష్ఠితం” పై రూపొందించిన ఒక ప్రత్యేక స్మరణికను స్వామి గోవింద దేవగిరి ఆవిష్కరించారు. ఇందులో మన జీవితంలోని వివిధ రంగాలలో సమకాలీన పరిస్థితులను దృష్టిలో ఉంచుకుని ధర్మాచరణను గురించి వివరించే వ్యాసాలు ఉన్నాయి. ఈ సందర్భంగా ప్రముఖ రచయిత డాక్టర్ రతన్ శారదా రచించిన నాలుగు పుస్తకాలను కూడా విడుదల చేశారు. ఇవి, వివిధ దేశాల్లో హిందూ సంఘటనా కార్య చరిత్రను విస్తృత పరిశోధనలు, ఇంటర్వ్యూల ద్వారా నమోదు చేసినవి.