శ్రీవారి సేవలో పట్టుకు బదులు పాలిస్టర్‌ శాలువాలు

శ్రీవారి ఆలయ అవసరాల కోసం ‘పట్టు శాలువాల’ కొనుగోలుకు తిరుమల తిరుపతి దేవస్థానం టెండర్లు పిలిచింది. శ్రీవారి సేవలతోపాటు వీవీఐపీలకు వేదాశీర్వచనం, దాతలను సత్కరించడానికి వాటిని వినియోగిస్తారు. ఇందులో భాగంగా నగరికి చెందిన మెసర్స్‌ వీఆర్‌ఎస్‌ ఎక్స్‌పోర్ట్‌ అనే సంస్థకు 15,000 శాలువాల సరఫరా కాంట్రాక్టును అప్పగించారు. 

ఒక్కోటి రూ.1,389.15 చొప్పున ధర నిర్ణయించారు. నాణ్యతపై అనుమానాలు రావడంతో, గత బోర్డు సమావేశంలో దీనిపై సమగ్ర విచారణ జరపాలని సీవీఎస్వోను ఆదేశించారు. విజిలెన్స్‌ అధికారులు తిరుపతిలోని గోదాము, తిరుమలలోని వైభవోత్సవ మండపం నుంచి తాజా స్టాకు నమూనాలు సేకరించారు. వీటిని బెంగళూరు, ధర్మవరంలోని సెంట్రల్‌ సిల్క్‌బోర్డులకు పంపి పరీక్షించగా విస్తుపోయే వాస్తవాలు వెల్లడయ్యాయి. 

టెండర్‌ నిబంధనల ప్రకారం స్వచ్ఛమైన పట్టు ఉండాలి. పరీక్షల్లో అది వందశాతం పాలిస్టర్‌ అని తేలింది. ఆ శాలువాలపై ‘సిల్క్‌ హోలోగ్రామ్‌’ కూడా లేదని అధికారులు గుర్తించారు. ఈ వ్యవహారంలో టిటిడిలోని కొందరు అధికారుల తీరుపై విజిలెన్స్‌ నివేదికలో తీవ్ర అభ్యంతరాలు వ్యక్తమయ్యాయి. గతంలో డిప్యూటీ ఈవో (వేర్‌హౌస్‌) పంపిన నమూనాలను కాంచీపురం ల్యాబ్‌లో పరీక్షిస్తే అవి నాణ్యమైనవేనని నివేదిక వచ్చింది. 

కానీ అదే స్టాకు నుంచి విజిలెన్స్‌ సేకరించి పంపినవి మాత్రం పాలిస్టర్‌ అని తేలింది. దీన్నిబట్టి ల్యాబ్‌కు పంపేటప్పుడు మార్చేయడమో, లేదా నివేదికలు తారుమారు చేయడమో జరిగి ఉంటుందని విజిలెన్స్‌ స్పష్టం చేసింది. ప్రస్తుత టెండర్‌లోనే కాకుండా కొన్నేళ్లుగా ఈ అక్రమాలు సాగుతున్నట్లు అనుమానిస్తున్నారు.  వీఆర్‌ఎస్‌ ఎక్స్‌పోర్ట్, దాని సోదర సంస్థలైన తిరుమల ఫ్యాబ్రిక్స్, నన్నా కాటేజెస్, వీఎం రాజా పవర్‌లూమ్‌ యూనిట్‌ సంస్థల నుంచి 2015-25 వరకు దాదాపు రూ.54.95 కోట్ల విలువైన వస్త్రాలను టీటీడీ కొనుగోలు చేసినట్లు విచారణలో తేలింది. 

తిరుమల తిరుపతి దేవస్థానానికి పట్టు శాలువాలకు బదులు పాలిస్టర్‌ శాలువాలను సరఫరా చేసిన స్కాంపై ప్రస్తుత పాలకమండలి సమగ్ర విచారణ ప్రారంభించిందని టీటీడీ ఛైర్మన్‌ బీఆర్‌ నాయుడు బుధవారం ‘ఎక్స్‌’లో పోస్ట్‌ చేశారు. 2019 నుంచి ఇప్పటివరకు రూ.80-90 కోట్ల అవినీతి జరిగి ఉండవచ్చని అంచనా వేశామని తెలిపారు.