వలసలపై ఆంక్షలతో నష్టపోయేది ఆ దేశాలే

అమెరికా, ఐరోపా దేశాల్లో వలసలపై ఆంక్షలతో ఆ దేశాలే నష్టపోతున్నాయని విదేశాంగశాఖ మంత్రి ఎస్‌ జైశంకర్‌ స్పష్టంచేశారు. వలసలు, నైపుణ్యం కలిగిన ఉద్యోగుల రాకపోకలపై మితిమీరిన ఆంక్షలు విధిస్తే ఆ ఆంక్షలు విధించిన దేశాల సొంత ప్రయోజనాలే దెబ్బతినే అవకాశం ఉందని ఆయన పేర్కొన్నారు. చివరకు ఆ దేశాలే నష్టపోతాయని హెచ్చరించారు.ఢిల్ల్లీలో నిర్వహించిన ఓ కార్యక్రమంలోపాల్గొంటూ చాలా సందర్భాల్లో అమెరికా, ఐరోపా దేశాల వాళ్లే ఈ సమస్యను సృష్టించారని, కాబట్టి స్వయంగా పరిష్కరించుకోవాల్సిన అవసరం ఉందని ఆయన చెప్పారు.

వలసలకు సంబంధించి అమెరికా, ఐరోపా దేశాల్లో ఏమైనా ఆందోళనలు ఉంటే అవి ఆ దేశాలు అమలు చేసిన దీర్ఘకాలిక విధానాల ఫలితమేనని స్పష్టం చేశారు. గడిచిన రెండు దశాబ్దాల్లో ఉద్దేశపూర్వకంగా అన్నీ తెలిసే తమ వ్యాపారాలను విదేశాలకు విస్తరించారని, ఇది వారి వ్యూహమని, కాబట్టి ఈ సమస్యలకు స్వయంగా పరిష్కార మార్గాలను వారే కనుగొనాలని వ్యాఖ్యానించారు. నైపుణ్యం కలిగిన ఉద్యోగుల రాకపోకలనేవి ఇరుపక్షాలకు ప్రయోజనమని పాశ్చాత్య దేశాలు గుర్తించాలని సూచించా రు.