అవినీతి ఆరోపణలపై నెతన్యాహు క్షమాభిక్ష అభ్యర్థన

అవినీతి ఆరోపణలు ఎదుర్కొంటున్న ఇజ్రాయెల్‌ ప్రధాని నెతన్యాహు తనకు క్షమాభిక్ష ప్రసాదించాలని అధ్యక్షుడు ఐజక్‌ హట్జాగ్‌కు విజ్ఞప్తి చేశారు. ప్రధాని కార్యాలయం ఈ విషయాన్ని అధికారికంగా వెల్లడించింది. క్షమాభిక్ష కోసం ఆయన అధ్యక్ష కార్యాలయం న్యాయవిభాగానికి తన అభ్యర్థనను సమర్పించినట్లు తెలిపింది. నెతన్యాహు మూడు వేర్వేరు కేసుల్లో మోసం, నమ్మకద్రోహం, లంచాలు స్వీకరించడం వంటి అభియోగాలు ఎదుర్కొంటున్నారు.

ఇజ్రాయెల్ చరిత్రలో విచారణకు హాజరైన ఏకైక ప్రధానమంత్రిగా ఆయన నిలిచారు. సంపన్న రాజకీయ మద్దతుదారులకు ఆయన అనుకూలంగా వ్యవహరించారనే ఆరోపణలు ఉన్నాయి. అయితే ఆయన ఇంకా ఏ కేసులోనూ దోషిగా తేలలేదు. ఆయన కూడా మొదటినుంచి ఈ ఆరోపణలను ఖండిస్తూ వస్తున్నారు. తనపై విచారణ విషయంలో దేశం ముక్కలుగా విడిపోయిందన్న నెతన్యాహూ, క్షమాభిక్ష ప్రసాదిస్తే దేశ ఐక్యత కోసం పోరాడుతానని పేర్కొన్నారు.

మరోవైపు ఇజ్రాయెల్‌ – హమాస్‌ యుద్ధం మొదలైనప్పటి నుంచి మరణించినవారి సంఖ్య 70,000 దాటిందని గాజా ఆరోగ్యశాఖ వెల్లడించింది. ఇజ్రాయెల్‌ తాజాగా జరిపిన దాడుల్లో ఇద్దరు చిన్నారులు ప్రాణాలు కోల్పోయినట్లు ఆసుప్రతి వర్గాలు పేర్కొన్నాయి. వాస్తవానికి అక్టోబర్‌ 10న కాల్పుల విరమణ అమల్లోకి వచ్చింది. కానీ మరణాల సంఖ్య క్రమంగా పెరుగుతుండడం గమనార్హం.