`మానస’లో ప్రత్యేక పిల్లలతో ఒరాకిల్ ఉద్యోగుల బృందం

ఒరాకిల్, ఇండస్ట్రియల్ గ్లోబల్ ఇన్వెస్ట్మెంట్ యూనిట్, హైదరాబాద్‌కు చెందిన 30 మంది ఉద్యోగుల బృందం తమ కార్పొరేట్ వాలంటీరింగ్ కార్యక్రమంలో భాగంగా హైదరాబాద్ కొత్తపేటలోని మానస చిన్నారుల ఆరోగ్య వైకల్యాల అధ్యయన సంస్థను సందర్శించారు. ఈ సందర్భంగా వారు పిల్లలతో కలిసి ఆర్ట్ & క్రాఫ్ట్ కార్యకలాపాలు, ఆటపాటలు, తోటపనులు,  వంటి కార్యక్రమాల్లో పాల్గొన్నారు.

ప్రత్యక తరగతులు, ఫిజియోథెరపీ, స్పీచ్ థెరపీ, బిహేవియర్ థెరపీ విభాగాలను తిలకించారు. ఈ సందర్భంగా సీనియర్ డైరెక్టర్, ప్రతీక్ పరాశర్ మాట్లాడుతూ మానస ప్రత్యేక పాఠశాల  పిల్లలతో గడిపిన సమయం తమ బృందానికి మానసిక దివ్యంగ పిల్లల సామర్థ్యాలు, ప్రత్యేక అవసరాలు, సవాళ్లను అర్థం చేసుకునే విలువైన అవకాశాన్ని కల్పించిందని పేర్కొన్నారు. 

మేనేజర్ వై. మురళీధర్ మాట్లాడుతూ పిల్లలు ప్రతిరోజూ తోట పనుల్లో పాల్గొనడం ఎంతో ఆనందకరమని పేర్కొంటూ మానస  తోటపనిలోని చికిత్సాపరమైన విలువను గుర్తించి పిల్లల్లో నైపుణ్య అభివృద్ధి చేసేందుకు చేస్తున్న కృషిని అభినందించారు. ఒరాకిల్‌ ఉద్యోగి వినీత్ రెడ్డి మాట్లాడుతూ ప్రత్యేక పిల్లలతో కలిసి ఆటలు, తోటపని మరియు ఇతర కార్యక్రమాల్లో గడిపిన ఆనందభరిత క్షణాలకు తమ బృందం ఎంతో సంతోషంగా ఉందని చెప్పారు.

`మానస’ను సందర్శించిన ఒరాకిల్ ఉద్యోగుల  బృందంలో  మేనేజర్లు గురుగేందర్ సింగ్, డి. వాహీద్, టీం లీడర్ ఎం. రామపండరినాధన్, నమ్రతతో పాటు ఇతర ఉద్యోగులు ఉన్నారు. పిల్లల కోసం వారు వివిధ ఆట వస్తువులు, క్రీడా సామగ్రి, తోట పనిముట్లు వంటి అవసరమైన వస్తువులను కొనుగోలు చేసి బహుమతిగా అందించారు.  ఈ సందర్భంగా మానస  పిల్లలు అందించిన సాంస్కృతిక కార్యక్రమాలు కార్యక్రమానికి మరింత అందం, ఉత్సాహాన్ని తీసుకువచ్చాయి. భవిష్యత్‌లో ఇలాంటి వాలంటీరింగ్ కార్యక్రమాలను కొనసాగించి మనస సంస్థకు చేదోడుగా ఉండాలనే  ఆశాభావం బృందం సభ్యులు  వ్యక్తం చేశారు.