ప్రపంచంలోనే ఎత్తైన శ్రీరాముడి విగ్రహాన్ని ఆవిష్కరించిన మోదీ

అయోధ్యలో బాల రాముడి విగ్రహ ప్రతిష్ఠాపనతో హిందువుల దశాబ్దాల కలను సాకారం చేసిన ప్రధాని నరేంద్ర మోదీ మరో చరిత్రకు నాంది పలికారు. ఇటీవలే అక్కడి రామాలయంపై కాషాయం జెండాను ఎగురేసిన మోదీ ప్రపంచంలోనే అత్యంత ఎత్తైన రాముడి భారీ విగ్రహాన్ని ఆవిష్కరించారు. గోవాలోని చరిత్రాత్మక శ్రీ సంస్థాన్ గోకర్ణ్ జోవోత్తమ్ మఠంలో 77 అడుగుల ఎత్తైన రాముడి కాంస్య విగ్రహాన్ని ఆయన ప్రారంభించారు.

దక్షిణ గోవాలోని ఆధ్యాత్మిక కేంద్రమైన శ్రీ సంస్థాన్ గోకర్ణ్ జోవోత్తమ్ మఠం ఏర్పడి నవంబర్ 28 గురువారం నాటికి 550వ సంవత్సరాలు పూర్తయ్యాయి. ఈ ప్రత్యేక సందర్భంగా పునస్కరించుకొని ప్రధాని మఠంలో 77 అడుగుల ఎత్తైన కోదండరాముడి కాంస్య విగ్రహాన్ని ఆవిష్కరించారు. అనంతరం ప్రధాని మాట్లాడుతూ ‘అయోధ్య రామాలయంపై కాషాయం జెండాను ఎగరేసిన రెండుమూడు రోజులకే రాముడి భారీ విగ్రహాన్ని ఆవిష్కరించే అదృష్టం తనకు దక్కడం చాలా సంతోషంగా ఉంద’ని చెప్పారు.

“భారత్ అద్భుతమైన సాంస్కృతిక పునరుజ్జీవనాన్ని చూస్తోంది. అయోధ్యలో రామమందిర నిర్మాణంతో పాటు వారణాసిలో కాశీ విశ్వనాథ్ ధామ్, ఉజ్జయిన్ మహాకాల్ పునర్అభివృద్ధితో భారత ఆధ్యాత్మిక వారసత్వానికి బలం చేకూరింది. కొత్త సంకల్పాలు, విశ్వాసంతో భారత్ సాంస్కృతిక గుర్తింపును ముందుకు తీసుకువెళుతోంది. యుగాలు మారాయి. కాలాలు గడిచాయి. దేశం, సమాజం ఎన్నో మార్పులను చూసింది” అని చెప్పారు. 

“కానీ ఎన్ని యుగాలు, కాలాలు మారినా ఈ మఠం మాత్రం తన లక్ష్యాన్ని మర్చిపోలేదు. ఇది ఎంతోమందికి మార్గదర్శకంగా నిలిచే గొప్ప కేంద్రంగా మారింది. ఐక్యతతోనే వికసిత్ భారత్ లక్ష్యాన్ని చేరుకుంటాం. సమాజం, ప్రాంతం, అన్ని వర్గాల ప్రజల కలిసి వచ్చి ఐక్యంగా ఉన్నప్పుడు దేశం ఉన్నత స్థానానికి చేరుకుంటుంది. అభివృద్ధి చెందిన భారత్లో మఠం పాత్ర చాలా కీలకమైనది” అని కొనియాడారు.

గుజరాత్‌లో సర్దార్ పటేల్ ఏకతా విగ్రహాన్ని తయారు చేసిన ప్రముఖ శిల్పకారుడు రామ్ సుతార్ ఈ భారీ రాముడి కాంస్య విగ్రహాన్ని సుందరంగా తీర్చిదిద్దారు. ప్రధాని మోదీ  హెలిక్యాప్టర్‌లో మఠం ఆవరణలోని మందిరాన్ని సందర్శించుకొని, విగ్రహాన్ని ఆవిష్కరించాక వేల సంఖ్యలో విచ్చేసిన భక్తులను ఉద్దేశించి ప్రసంగించారు. 

ఈ మహత్తర కార్యక్రమంలో గోవా గవర్నర్ అశోక్ గజపతిరాజు, ముఖ్యమంత్రి ప్రమోద్ సావంత్, కేంద్ర మంత్రి శ్రీపాద నాయక్‌తో పాటు రాష్ట్ర మంత్రులు పాల్గొన్నారు. శ్రీ సంస్థాన్ గోకర్ణ్ జోవోత్తమ్ మఠం 550 సంవత్సరాలు పూర్తి చేసుకున్నందున 11 రోజుల పాటు నవంబర్ 27 నుంచి డిసెంబర్ 7 వరకూ ప్రత్యేక కార్యక్రమాలు నిర్వహించనున్నారు. ఈ సందర్భంగా ప్రతిరోజు 7 వేల నుంచి 10 వేల మంది రాముడి విగ్రహాన్ని దర్శించుకునే అవకాశముందని నిర్వాహకులు చెబుతున్నారు.