బీహార్ లో ప్రతిపక్షం గెలిస్తే పిఎఫ్ఐ కార్యకర్తలను జైల్లోనే ఉంచుతారా?

యావత్ బీహార్‌ను ఇస్లామిక్‌ రాష్ట్రంగా మార్చాలనే లక్ష్యంతో ఇక్కడ పురుడు పోసుకున్న పీపుల్స్ ఫ్రంట్‌ ఆఫ్‌ ఇండియా (పీఎఫ్‌ఐ) కార్యకర్తలను మహాగఠ్ బంధన్ బిహార్లో అధికారంలోకి వస్తే జైళ్లలోనే ఉంచుతారా? అని కేంద్ర హోంమంత్రి అమిత్ షా ప్రశ్నించారు. బీహార్ లోని బెగుసరాయ్‌లో జరిగిన ఎన్నికల ప్రచార సభలో పాల్గొంటూ  పట్నాలోని ఫుల్వారీ షరీఫ్‌లో పీఎఫ్‌ఐ కార్యకర్తలు చురుకుగా ఉన్నారని ఆరోపించారు. 

కానీ ప్రధాని నరేంద్రమోదీ దేశవ్యాప్తంగా 100 ప్రదేశాల్లో సోదాలు చేయించి పీఎఫ్‌ఐ సభ్యులను అరెస్ట్ చేయించారని, అందరినీ జైల్లో పెట్టించారని అమిత్‌ షా తెలిపారు. మీరంతా ఆ పీఎఫ్‌ఐ సభ్యులను వదిలిపెట్టాలని కోరుకుంటున్నారా? అని ఓటర్లను ప్రశ్నించారు. పీఎఫ్‌ఐ అనేది జాతి వ్యతిరేక కార్యకలాపాలకు పాల్పడే సంస్థ అని, అందుకే ప్రధాని మోదీ ఆ సంస్థపై నిషేధం విధించారని తెలిపారు.

కానీ ఇప్పుడు లాలూ ప్రసాద్‌ యాదవ్‌ పీఎఫ్‌ఐ సభ్యులను పగటి కలల్లో విహరింప జేస్తున్నారని, తాము అధికారంలోకి రాగానే మిమ్మల్ని జైళ్ల నుంచి విడుదల చేస్తామని వారికి హామీ ఇచ్చారని అమిత్‌ షా ఆరోపించారు. కానీ ప్రధాని మోదీ మాత్రం భారత భూభాగంపైన ఉగ్రవాదాన్ని, నక్సలిజాన్ని తుడిచిపెట్టే పనిలో ఉన్నారని చెప్పారు. వచ్చే ఏడాది మార్చి 31 కల్లా దేశంలో నక్సలిజం అంతం కాబోతోందని స్పష్టం చేశారు.

బీజేపీ చాలా మంది యువకులకు టికెట్లు ఇచ్చిందని చెబుతూ కానీ ఆర్జేడీ, కాంగ్రెస్ పార్టీలు యువతకు టికెట్లు ఇవ్వలేదని ధ్వజమెత్తారు. ఎందుకంటే ఆర్జేడీ అధినేత లాలూ ప్రసాద్ తన కుమారుడు తేజస్వీ యాదవ్ను బిహార్ ముఖ్యమంత్రిగా, కాంగ్రెస్ అగ్రనాయకురాలు సోనియా గాంధీ తన కుమారుడు రాహుల్ను ప్రధానిగా చేయాలని కోరుకుంటున్నారని ఎద్దేవా చేశారు. 

లాలూ ప్రసాద్ దాణా, ల్యాండ్ ఫర్ జాబ్ స్కామ్లో ఉన్నారని, కాంగ్రెస్ రూ. 12 లక్షల కోట్ల అవినీతి కేసుల్లో చిక్కుకుందని పేర్కొంటూ అది మహాగఠ్ బంధన్ కాదు ‘దొంగ బంధన్ అని అమిత్ షా విమర్శించారు. ఇక ప్రతిపక్ష కూటమి మహాగఠ్‌బంధన్‌ సీఎం అభ్యర్థిగా తేజస్వీయాదవ్‌ పేరును ప్రకటించడాన్ని ప్రస్తావిస్తూ ఏ సీట్ ఖాళీ లేదని ఎద్దేవా చేశారు.  కేంద్రంలో ప్రధానిగా నరేంద్ర మోదీ, బీహార్‌ ముఖ్యమంత్రిగా నీతీశ్‌ కుమార్ కొనసాగుతారని స్పష్టం చేశారు