సొంత ఊరికే పికె అపరిచితుడు

ప్రశాంత్ కిషోర్ తండ్రి, దివంగత డాక్టర్ శ్రీకాంత్ పాండే, బక్సర్‌లో పేరున్న వైద్యుడు. ప్రజల డాక్టర్‌గా ఆయనకు మంచి పేరుంది. ఈ వారసత్వం ప్రశాంత్ కిషోర్‌కు రాజకీయ ఆయుధంగా మారింది. తాను వారసత్వ రాజకీయాలకు వ్యతిరేకినని, ప్రజాసేవ చేసిన కుటుంబం నుంచి వచ్చానని ఆయన చెప్పుకుంటారు.

ఆయన ఎన్నికల వ్యూహం కూడా విభిన్నంగా ఉంది. తన పార్టీ అభ్యర్థులుగా రాజకీయ నాయకులను కాకుండా డాక్టర్లు, ప్రొఫెసర్లు, రిటైర్డ్ అధికారుల వంటి విద్యావంతులను, నిపుణులను నిలబెడుతున్నారు. పికె ఈ ఎన్నికల్లో పోటీ చేయడం లేదు. పార్టీని క్షేత్రస్థాయిలో బలోపేతం చేయడంపైనే తన దృష్టి అని ప్రకటించారు. “మాకు 150 సీట్లకు పైగా వస్తాయి, లేదంటే 10 లోపే వస్తాయి. మధ్యేమార్గం లేదు” అని ఆయన ధీమాగా చెబుతున్నారు. ‘ఓటు చీలిపోతుంది’ అనే భయాన్ని ప్రజల నుంచి తొలగించేందుకే ఈ రకమైన ప్రకటనలు చేస్తున్నారు. అయితే క్షేత్రస్థాయిలో పరిస్థితి భిన్నంగా ఉంది.