బెంగాల్‌లో వైద్య విద్యార్థినిపై సామూహిక అత్యాచారం

రాత్రి వేళ విధుల్లో వున్న మహిళా ట్రెయినీ డాక్టరుపై ఆర్‌జి కర్‌ ఆస్పత్రిలో అత్యాచారం, హత్య జరిగిన ఘటన మరిచిపోకముందే పశ్చిమ బెంగాల్‌లో మరో దారుణం చోటుచేసుకుంది. దుర్గాపూర్‌లోని ఐక్యూ మెడికల్‌ కళాశాలలో రెండో సంవత్సరం చదువుతున్న ఒరిస్సాలోని జలేశ్వర్‌కు చెందిన వైద్య విద్యార్ధినిపై అదే కళాశాల క్యాంపస్‌ వెలుపల గుర్తు తెలియని వ్యక్తులు సామూహిక అత్యాచారానికి ఒడిగట్టారు. 

తన స్నేహితుడితో కలిసి డిన్నర్‌కు బయటకు వెళ్లగా శుక్రవారం రాత్రి 10 గంటల సమయంలో ఈ దుర్ఘటన జరిగిందని పోలీసులు తెలిపారు. విద్యార్ధిని కుటుంబ సభ్యులు ఇచ్చిన ఫిర్యాదు ఆధారంగా దర్యాప్తు ప్రారంభించినట్లు తెలిపారు. బాధితురాలి స్నేహితుడితో సహా పలువురిని ప్రశ్నించామని చెప్పారు. ప్రాథమిక దర్యాప్తులో అందిన సమాచారం మేరకు రాత్రి 8-8.30 గంటల సమయంలో విద్యార్థిని తన స్నేహితుడితో కలిసి బయటకు వెళ్లిందని పోలీసు అధికారి వెల్లడించారు.

దుర్గాపూర్‌లోని శివపూర్‌ ఏరియాలో గల ఐక్యూ మెడికల్‌ కాలేజీ గేటుకు సమీపంలో రాత్రి 8.30 గంటల సమయంలో కొంతమంది వ్యక్తులు వారిని అడ్డగించారు. వెంటనే ఆ స్నేహితుడు ఆమెను ఒక్కదాన్ని వదిలేసి వెళ్లిపోయాడు.  ఆ వచ్చినవారు ఆమె ఫోన్‌ను లాక్కుని, కేంపస్‌ వెలుపల దట్టంగా చెట్లు వున్న ప్రాంతంలోకి ఆమెను లాక్కుని వెళ్లి సామూహిక అత్యాచారానికి పాల్పడ్డారు. ఈ సంఘటన గురించి ఎవరికైనా చెబితే తీవ్ర పర్యవసానాలు వుంటాయని వారు హెచ్చరించారని పోలీసు అధికారి వెల్లడించారు. 

మెడికో ఫోన్‌ తిరిగి ఇవ్వాలంటే డబ్బులు ఇవ్వాలని కూడా డిమాండ్‌ చేశారని, రూ. 5 వేలు తీసుకున్నారని తెలిపారు. ఆ తరువాత బాధితురాలిని స్నేహితుడు కాలేజీకి తీసుకెకెళ్ళి ఆసుపత్రిలో చేర్పించారు. ఈ మేరకు విద్యార్థిని స్ట్టేట్‌మెంట్‌ను రికార్డు చేసినట్లు పోలీసులు చెప్పారు.  ‘గత రాత్రే బాధితురాలి ఫ్రెండ్‌తో కూడా మాట్లాడాం. సిసి టివి ఫుటేజీ సేకరించడానికి ప్రయత్నిస్తున్నాం. ఫోరెన్సిక్‌ బృందం సంఘటనా స్థలానికి వెళ్ళి సాక్ష్యాధారాలను సేకరించింది.” అని చెప్పారు.

తమ కుమార్తె స్నేహితుల నుండి ఫోన్‌ రావడంతో శనివారం ఉదయమే తాము దుర్గాపూర్‌ వెళ్లామని, వెంటనే పోలీసులకు ఫిర్యాదు చేశామని ఆమె తల్లిదండ్రులు విలేకర్లకు తెలిపారు. డిన్నర్‌ కోసం తన కుమార్తెతో కలిసి వెళ్లిన యువకుడు అక్కడ నుండి పారిపోయినందున అతడి ప్రమేయం కూడా వుందని అనుమానిస్తున్నామని బాధితురాలి కుటుంబం తెలిపింది. ఆ స్నేహితుడు తన కుమార్తెను తప్పుదారి పట్టించాడని, ఆమెను ఖాళీగా వున్న ప్రదేశానికి తీసుకెళ్లాడని బాధితురాలి తండ్రి పోలీసులకు ఇచ్చిన ఫిర్యాదులో తెలిపారు.