అమెరికా విధించిన సుంకాల కారణంగా రష్యా తన ఉక్రెయిన్ యుద్ధ వ్యూహాన్ని వివరించాలని భారత దేశం కోరినట్లు పాశ్చాత్య సైనిక కూటమి నాటో సెక్రటరీ జనరల్ మార్క్ రుట్టే చేసిన వాదనలు “వాస్తవంగా తప్పు, పూర్తిగా నిరాధారం” అంటూ భారత్ మండిపడింది. అటువంటి చర్చలు జరగలేదని స్పష్టం చేస్తూ భవిష్యత్తులో అటువంటి ప్రకటనలు చేసేముందు జాగ్రత్తగా వ్యవహరించాలని నాటో చీఫ్‌కు విదేశాంగ మంత్రిత్వ శాఖ హితవు చెప్పింది. ఈ విషయంపై ప్రధానమంత్రి నరేంద్ర మోదీ రష్యా అధ్యక్షుడు వ్లాదిమిర్ పుతిన్‌తో నేరుగా మాట్లాడారని నాటో చీఫ్ చేసిన వాదనను భారతదేశం తీవ్రంగా విమర్శించింది.
“ప్రధానమంత్రి నరేంద్ర మోదీ, అధ్యక్షుడు వ్లాదిమిర్ పుతిన్ మధ్య జరిగినట్లు చెప్పబడుతున్న ఫోన్ సంభాషణకు సంబంధించి నాటో సెక్రటరీ జనరల్ మిస్టర్ మార్క్ రుట్టే చేసిన ప్రకటనను మేము చూశాము. ఈ ప్రకటన వాస్తవంగా తప్పు, పూర్తిగా నిరాధారం. ప్రధానమంత్రి మోదీ ఎప్పుడూ అధ్యక్షుడు పుతిన్‌తో సూచించిన విధంగా మాట్లాడలేదు. అలాంటి సంభాషణ జరగలేదు” అని విదేశాంగ మంత్రిత్వ శాఖ విడుదల చేసిన అధికారిక ప్రకటన తెలిపింది.
గురువారం న్యూయార్క్‌లో జరిగిన ఐరాస జనరల్ అసెంబ్లీ సందర్భంగా ఓ మీడియాతో మాట్లాడుతూ, భారతదేశంపై అమెరికా అధ్యక్షుడు డొనాల్డ్ ట్రంప్ విధించిన సుంకాలు రష్యాపై పెద్ద ప్రభావాన్ని చూపుతున్నాయని రుట్టే తెలిపారు. ఢిల్లీ పుతిన్‌తో ఫోన్‌లో మాట్లాడుతోందని, భారతదేశం సుంకాల బారిన పడుతున్నందున ఉక్రెయిన్‌పై తన వ్యూహాన్ని వివరించమని నరేంద్ర మోదీ ఆయనను నిలదీస్తున్నారని ఆయన చెప్పుకొచ్చారు.
ఈ వాఖ్యలపట్ల తీవ్ర అభ్యంతరం వ్యక్తం చేస్తూ రుట్టే జాగ్రత్తగా ఉండాలని కోరుతూ, నాటో చీఫ్ తన బహిరంగ ప్రకటనలతో మరింత బాధ్యతాయుతంగా ఉంటారని భారతదేశం ఆశిస్తోందని స్పష్టం చేశారు. “నాటో వంటి ముఖ్యమైన సంస్థ నాయకత్వం బహిరంగ ప్రకటనలలో ఎక్కువ బాధ్యత, ఖచ్చితత్వాన్ని ప్రదర్శిస్తుందని మేము ఆశిస్తున్నాము. ప్రధానమంత్రి గురించి తప్పుగా సూచించే లేదా ఎప్పుడూ జరగని సంభాషణలను సూచించే ఊహాజనిత లేదా అజాగ్రత్త వ్యాఖ్యలు ఆమోదయోగ్యం కాదు” అని ఎంఈఏ తేల్చి చెప్పింది.
“గతంలో చెప్పినట్లుగా, భారతదేశ ఇంధన దిగుమతులు భారత వినియోగదారునికి ఊహించదగిన, సరసమైన ఇంధన ఖర్చులు ఉండేందుకై ఉద్దేశించినవి. భారతదేశం తన జాతీయ ప్రయోజనాలను, ఆర్థిక భద్రతను కాపాడుకోవడానికి అవసరమైన అన్ని చర్యలు తీసుకుంటూనే ఉంటుంది” అని ప్రభుత్వం పేర్కొంది.
గత నెలలో, అమెరికా అధ్యక్షుడు డొనాల్డ్ ట్రంప్ భారతీయ వస్తువులపై 25 శాతం పరస్పర సుంకాన్ని, భారతదేశం రష్యా నుండి చమురు దిగుమతులను లక్ష్యంగా చేసుకుని అదనంగా మరో 25 శాతం జరిమానాను ప్రకటించారు. రష్యా ఇంధనాన్ని కొనుగోలు చేయకుండా భారతదేశంను నిరుత్సాహపరచడమే ఈ చర్య లక్ష్యం అని వాషింగ్టన్ తెలిపింది. ఇటువంటి కొనుగోళ్లు పరోక్షంగా ఉక్రెయిన్‌లో మాస్కో యుద్ధానికి ఆర్థిక సహాయం చేస్తాయని వాదించారు.
రష్యా చమురు దిగుమతులను తగ్గించడంలో నాటో సభ్యులు ఏకం కావాలని, చైనాపై కూడా ఇలాంటి సుంకాలను విధించాలని ట్రంప్ కోరారు. అయితే, ఈ చర్యలు అన్యాయమని భారతదేశం విమర్శించింది. ప్రపంచ సరఫరా అంతరాయాలు ఉన్న సమయంలో భారతదేశంలోని 1.4 బిలియన్ పౌరులకు సరసమైన ధరలకు ఇంధనం అందించడంలో రష్యన్ చమురు కీలకమని విదేశాంగ మంత్రిత్వ శాఖ వాదించింది.
భారతదేశం ఎదుర్కొంటున్న రకమైన ఒత్తిళ్లు లేకుండా ఐరోపా యూనియన్, అనేకమంది నాటో సభ్యులు రష్యాతో గణనీయమైన వాణిజ్యాన్ని కొనసాగిస్తున్నారని భారత అధికారులు ఈ సందర్భంగా ఎత్తి చూపారు. దానితో నాటో సభ్యులు రష్యన్ చమురు కొనుగోళ్లను పూర్తిగా నిలిపివేసే విధంగా రష్యాపై “పెద్ద ఆంక్షలు” విధించనున్నట్లు ట్రంప్ సూచించారు. పాక్షిక ఆంక్షలు కూటమిని బలహీనపరుస్తుందని హెచ్చరించారు.
ఘర్షణ ఉన్నప్పటికీ, ట్రంప్, మోదీ ఇద్దరూ తమ వ్యక్తిగత సంబంధాన్ని బహిరంగంగా స్పష్టం చేస్తున్నారు. గత వారం ట్రూత్ సోషల్‌లో ఒక పోస్ట్‌లో, ట్రంప్ మోదీని “చాలా మంచి స్నేహితుడు”గా అభివర్ణించారు. అయితే భారత ప్రధాన మంత్రి చర్చలు “భారత్-యుఎస్ భాగస్వామ్యపు అపరిమిత సామర్థ్యాన్ని అన్‌లాక్ చేస్తాయని” తాను విశ్వసిస్తున్నానని చెప్పారు.
More Stories
‘ఐ లవ్ మహమ్మద్’ వివాదంతో బరేలీలో పెద్ద ఎత్తున అల్లర్లు
పాకిస్థాన్ ప్రధాని డ్రామాలను ఐరాస మరోసారి చూసింది
ఏపీలో యోగ ప్రచార పరిషత్