మోహన్ లాల్ కు దాదాసాహెబ్ ఫాల్కే పురస్కారం

71వ జాతీయ చలన చిత్ర అవార్డుల ప్రదానోత్సవం దిల్లీలోని విజ్ఞాన్‌ భవన్‌లో మంగళవారం అట్టహాసంగా జరిగింది. విజేతలకు రాష్ట్రపతి ద్రౌపదీ ముర్ము పురస్కారాలతోపాటు ప్రశంసా పత్రాలు అందజేశారు.  భారత చిత్ర పరిశ్రమలో అత్యున్నత పురస్కారంగా భావించే దాదాసాహెబ్‌ ఫాల్కే అవార్డును 2023 ఏడాదికిగాను రాష్ట్రపతి చేతుల మీదుగా మలయాళ నటుడు మోహన్‌లాల్ అందుకున్నారు. 

జాతీయ ఉత్తమ నటుడి అవార్డును షారుక్‌ ఖాన్, విక్రాంత్‌ మైసీ అందుకున్నారు. జవాన్ చిత్రానికిగానూ షారూక్ అవార్డు అందుకోగా 12వ ఫెయిల్‌ చిత్రానికిగానూ విక్రాంత్‌ మెస్సే పురస్కారం అందుకున్నారు. జాతీయ ఉత్తమ నటిగా రాణీ ముఖర్జీ అవార్డును అందుకున్నారు.  మిస్సెస్‌ ఛటర్జీ వర్సెస్‌ నార్వే-హిందీ సినిమాలో నటనకు రాణీ ముఖర్జీకీ ఈ అవార్డు వరించింది. ఉత్తమ ఫీచర్ ఫిల్మ్‌ అవార్డును 12th ఫెయిల్ చిత్ర బృందం అందుకుంది. ఉత్తమ దర్శకుడిగా “ది కేరళ స్టోరీని” తెరకెక్కించిన సుదీప్తో సేన్‌ అవార్డు దక్కించుకున్నారు.

“నేను మలయాళ సినిమా పరిశ్రమకు కృతజ్ఞతలు చెబుతున్నాను. దాదాసాహెబ్ ఫాల్కే అవార్డు నా ఒక్కడిది కాదు. మొత్తం మలయాళం పరిశ్రమకు చెందినది. అందుకే ఈ అవార్డును దానికి అంకితం చేస్తున్నాను. ఈ రోజు నిజం అవుతుందని నేను కలలో కూడా అనుకోలేదు. కానీ ఇది మాయలా ఉంది. కానీ ఇది పవిత్రమైనది. నన్ను ఎంపిక చేసిన జ్యూరీ సభ్యులకు, భారత ప్రభుత్వానికి నా కృతజ్ఞతలు. సినిమా నా ఆత్మకు ప్రతీక. అది నా హృదయ స్పందన”  అని మోహన్ లాల్ ఈ సందర్భంగా తెలిపారు.

దాదాసాహెబ్ ఫాల్కే అవార్డు అందుకున్న అతి పిన్న వయస్కుడిగా (65 ఏళ్లు) మోహన్లాల్ నిలిచారు. అదూర్ గోపాలకృష్ణన్ తర్వాత ఈ అవార్డు గెలుచుకున్న రెండో మలయాళీ కళాకారుడిగా గుర్తింపు పొందారు. ఈ సందర్భంగా మోహన్లాల్ 4 దశాబ్దాల సినీ జీవితాన్ని ఒక దృశ్యరూపంలో ప్రదర్శించారు. మోహన్లాల్ గతంలో పద్మశ్రీ (2001), పద్మభూషణ్ (2019) పురస్కారాలు పొందారు. ఇక ఐదు సార్లు జాతీయ చలనచిత్ర అవార్డులు పొందారు.