ఉప రాష్ట్రపతి అభ్యర్థిగా సీపీ రాధాకృష్ణన్ నామినేషన్

అయితే లోక్​సభ, రాజ్యసభ ఎలక్టోరల్ కాలేజీ ప్రకారం ఎన్డీఏకు సంపూర్ణ బలం ఉంది. కాబట్టి ఉపరాష్ట్రపతిగా రాధాకృష్ణన్ విజయం లాంఛనమే. కానీ ఉప రాష్ట్రపతి ఎన్నికను ఏకగ్రీవం చేయాలని అధికారపక్షం ప్రయత్నాలు చేస్తోంది. కాంగ్రెస్ అధ్యక్షుడు మల్లికార్జున ఖర్గేకు రాజ్​నాథ్ కాల్ చేశారు.  అయితే విపక్ష పార్టీలు కూడా తమ అభ్యర్థిని ఇప్పటికే ప్రకటించాయి. ప్రతిపక్షాల ఉమ్మడి అభ్యర్థిగా జస్టిస్‌ బి.సుదర్శన్‌రెడ్డిని బరిలోకి దించాయి. దీంతో ఎన్నిక అనివార్యంగా కనిపిస్తోంది. 

మాజీ ఉపరాష్ట్రపతి జగదీప్​ ధన్​ఖడ్​ అకస్మాత్తుగా రాజీనామా చేసిన తరుణంలో ఎన్డీఏ తదుపరి అభ్యర్థిగా సీపీ రాధాకృష్ణన్​ ఎంపికయ్యారు.  ఈమేరకు​ బీజేపీ జాతీయ అధ్యక్షుడు జేపీ నడ్డా ఆదివారం వెల్లడించారు. బీజేపీ పార్లమెంటరీ బోర్డు ఏర్పాటు చేసిన సమావేశంలో ప్రధాని మోదీ, అమిత్​షాతో సహా సీనియర్ నాయకులు పాల్గొని ఆ నిర్ణయం తీసుకున్నారు. ఆ తర్వాత పార్లమెంటులోని బాలయోగి ఆడిటోరియంలో మంగళవారం జరిగిన ఎన్టీఏ కూటమి ఎంపీల సమావేశంలో రాధాకృష్ణన్​ను మోదీ పరిచయం చేశారు. 

ఆయన సుదీర్ఘ ప్రజా జీవితాన్ని కొనియాడారు. అనంతరం ఆయనను ప్రధాని, కేంద్ర మంత్రులు సన్మానించారు. మోదీ తన ప్రసంగంలో వివిధ పార్టీలకు, ముఖ్యంగా ప్రతిపక్షాలకు, రాధాకృష్ణన్ ఏకగ్రీవంగా ఎన్నికయ్యేలా చూసుకోవడానికి మద్దతు ఇవ్వాలని విజ్ఞప్తి చేశారు. ఉపరాష్ట్రపతిగా ఆయన ఎన్నిక మొత్తం దేశానికి ఆనందదాయకమైన విషయమని చెప్పారు.

ప్రస్తుతం మహారాష్ట్ర గవర్నర్‌గా పనిచేస్తున్న సిపి రాధాకృష్ణన్, శాసనసభ, పరిపాలనా పాత్రలలో దశాబ్దాల అనుభవం ఉన్న బిజెపి సీనియర్ నాయకుడు. తమిళనాడుకు చెందిన మాజీ ఎంపీ అయిన ఆయన, అట్టడుగు వర్గాలతో సంబంధాలు కలిగి ఉండటం, సామాజిక అభ్యున్నతిపై దృష్టి పెట్టడం ద్వారా ప్రసిద్ధి చెందారు.   కాగా, ఉపరాష్ట్రపతి ఎన్నికలు సెప్టెంబర్​ 9న జరగనున్నాయి. రాజ్యాంగం ప్రకారం ఉప రాష్ట్రపతి పదవీకాలం ఐదు సంవత్సరాలు. పార్లమెంటు ఉభయ సభల ఎంపీలతో కూడిన ఎలక్టోరల్ కాలేజీ ద్వారా ఉపాధ్యక్షుడిని ఎన్నుకుంటారు. రాజ్యాంగంలోని ఆర్టికల్ 64, 68 నిబంధనల ప్రకారం ఎన్నికలు నిర్వహిస్తారు.