రష్యా చమురు కొనుగోలుకు సంబంధించి భారతదేశం నుండి వస్తువులపై సుంకాలను “గణనీయంగా” పెంచుతామని డొనాల్డ్ ట్రంప్ చేస్తున్న బెదిరింపుల పట్ల భారత ప్రభుత్వం తీవ్ర ఆగ్రహం వ్యక్తం చేసింది. ఉక్రెయిన్ వివాదం చెలరేగిన తర్వాత రష్యా నుండి దిగుమతి చేసుకోవడం ప్రారంభించినప్పుడు, అమెరికా “అటువంటి దిగుమతులను చురుకుగా ప్రోత్సహించింది” అని న్యూఢిల్లీ వాషింగ్టన్‌కు గుర్తు చేసింది.
ముడి చమురు ఎగుమతులపై భారత శుద్ధి కర్మాగారాలను ఏకాకి చేసే ప్రయత్నాలు చేసిన ఐరోపా యూనియన్ వైఖరిపై కూడా భారత్ మండిపడింది. భారతదేశం దిగుమతులు “ప్రపంచ మార్కెట్ పరిస్థితి ద్వారా బలవంతం చేయబడిన అవసరం” అయినప్పటికీ, దానిని విమర్శించే దేశాలు “అటువంటి వాణిజ్యం ఒక ముఖ్యమైన తప్పనిసరి కూడా కానప్పుడు” కూడా “రష్యాతో వాణిజ్యంలో మునిగిపోతున్నాయి” అని విదేశాంగ మంత్రిత్వ శాఖ ఎద్దేవా చేసింది.
ఆ తర్వాత ఈ దేశాలు రష్యాతో కొనసాగిస్తున్న వాణిజ్య ఒప్పందాల జాబితాను భారత్ ఈ సందర్భంగా ప్రస్తావించింది. “2024లో ఐరోపా యూనియన్ రష్యాతో 67.5 బిలియన్ యూరోల వస్తువుల ద్వైపాక్షిక వాణిజ్యాన్ని కలిగి ఉంది. అదనంగా, 2023లో 17.2 బిలియన్ యూరోల సేవల వాణిజ్యాన్ని అంచనా వేసింది. ఇది ఆ సంవత్సరం లేదా ఆ తర్వాత రష్యాతో భారతదేశపు మొత్తం వాణిజ్యం కంటే చాలా ఎక్కువ” అని గుర్తు చేసింది.
“వాస్తవానికి, 2024లో ఐరోపా ఎల్ ఎన్ జి దిగుమతులు రికార్డు స్థాయిలో 16.5 మిలియన్ టన్నులకు చేరుకున్నాయి. ఇది 2022లో గత రికార్డు అయిన 15.21 మిలియన్ టన్నులను అధిగమించింది” అని భారత్ పేర్కొన్నది. “ఐరోపా-రష్యా వాణిజ్యంలో ఇంధనమ్ మాత్రమే కాకుండా, ఎరువులు, మైనింగ్ ఉత్పత్తులు, రసాయనాలు, ఇనుము, ఉక్కు, యంత్రాలు, రవాణా పరికరాలు కూడా ఉన్నాయి” అని భారత అధికారిక ప్రకటనలో పేర్కొన్నది.
భారత ప్రభుత్వం రష్యా నుండి అమెరికా దిగుమతులను కూడా ప్రస్తావించింది. “అమెరికా విషయానికొస్తే, అది రష్యా నుండి తన అణు పరిశ్రమ కోసం యురేనియం హెక్సాఫ్లోరైడ్, తన ఈవి పరిశ్రమ కోసం పల్లాడియం, ఎరువులు, రసాయనాలను దిగుమతి చేసుకుంటూనే ఉంది” అని వివరించింది. రష్యా ముడి చమురును ఉపయోగించుకోవడాన్ని భారత్ సమర్థించుకుంటూ అమెరికా, ఐరోపా యూనియన్ లక్ష్యంగా పెట్టుకున్న విధానాన్ని “అన్యాయం, అసమంజసమైనది” అని విమర్శించింది.
“వివాదం చెలరేగిన తర్వాత సాంప్రదాయ సరఫరాలను ఐరోపాప్‌కు మళ్లించినందున భారతదేశం రష్యా నుండి దిగుమతి చేసుకోవడం ప్రారంభించింది. ఆ సమయంలో అమెరికా ప్రపంచ ఇంధన మార్కెట్ స్థిరత్వాన్ని బలోపేతం చేయడానికి భారతదేశం ఇటువంటి దిగుమతులను చురుకుగా ప్రోత్సహించింది” అని భారత్ గుర్తుచేసింది.
“ఏదైనా ప్రధాన ఆర్థిక వ్యవస్థ మాదిరిగానే, భారతదేశం తన జాతీయ ప్రయోజనాలను, ఆర్థిక భద్రతను కాపాడుకోవడానికి అవసరమైన అన్ని చర్యలు తీసుకుంటుంది” అంటూ భారత్ నిర్మోహాటంగా చెప్పుకొచ్చింది. భారత్ ను బెదిరించే విధంగా అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యల పట్ల ఆగ్రహంగా భారత్ ఈ విధంగా కఠినంగా స్పందించినట్లు స్పష్టం అవుతుంది.
“నేను అమెరికాకు భారతదేశం చెల్లించే సుంకాన్ని గణనీయంగా పెంచుతాను” అని ఆయన ట్రూత్ సోషల్‌లో ట్రంప్ పోస్ట్ చేశారు. రష్యా నుంచి భారీ మొత్తంలో చమురును కొనుగోలు చేయడమే గాక దాన్ని భారీ లాభాలకు బహిరంగ మార్కెట్‌లో అమ్ముతోందని ట్రంప్ ఆరోపించారు. రష్యా సాగిస్తున్న యుద్ధంలో ఎందరు ఉక్రెయిన్ పౌరులు బలవుతున్నారో వారికి(భారత్‌కు) పట్టడం లేదని ఆయన ఆగ్రహం వ్యక్తం చేశారు. ఈ కారణంగానే అమెరికాకు భారత్ చెల్లించే సుంకాన్ని గణనీయంగా పెంచనున్నానని ట్రంప్ హెచ్చరించారు.
ఆగస్టు 7-9 నాటికి మాస్కో ఉక్రెయిన్‌తో శాంతి ఒప్పందాన్ని కుదుర్చుకోకపోతే రష్యన్ చమురు కొనుగోలు చేసే దేశాలపై 100 శాతం వరకు సుంకాలను విధించనున్నట్లు ట్రంప్ బెదిరించారు. అమెరికా అధ్యక్షుడు ఆగస్టు 7 నుండి అమెరికాలోకి ప్రవేశించే భారతీయ వస్తువులపై 25 శాతం దిగుమతి సుంకాన్ని ఇప్పటికే ప్రకటించారు. చారిత్రాత్మకంగా, భారతదేశం తన చమురులో ఎక్కువ భాగాన్ని మధ్యప్రాచ్యం నుండి కొనుగోలు చేసింది. కానీ ఫిబ్రవరి 2022లో ఉక్రెయిన్‌పై పూర్తి స్థాయి దండయాత్రకు నిరసనగా పశ్చిమ దేశాలు దానిని తిరస్కరించిన తర్వాత రష్యా తన చమురును రాయితీ ధరలకు విక్రయించడం ప్రారంభించిన తర్వాత పరిస్థితి మారిపోయింది.
More Stories
నేపాల్ తాత్కాలిక ప్రధానిగా సుశీల కర్కిని ఒప్పించిన ఆర్మీ చీఫ్
పాక్ కు చైనా, ఐరోపా, యుఎఈ, అమెరికాల నిఘా యంత్రాలు
నేపాల్ అలజడులతో చిక్కుకున్న మానసరోవర్ యాత్రికులు