* కుట్ర వెల్లడి కావడంతో కోర్టు తీర్పుపై నిస్సత్తువుగా కాంగ్రెస్!.. ఓ ముస్లిం అధికారి సంచలన వెల్లడి
2008 మాలేగావ్ పేలుళ్ల కేసులో బిజెపి మాజీ ఎంపి ప్రజ్ఞా సింగ్ ఠాకూర్, లెఫ్టినెంట్ కల్నల్ ప్రసాద్ పురోహిత్ సహా నిందితులందరినీ గురువారం ప్రత్యేక కోర్టు నిర్దోషులుగా విడుదల చేయడంతో, కాంగ్రెస్ పార్టీని లక్ష్యంగా చేసుకోవడానికి బిజెపికి కొత్త ఆయుధం లభించింది. కాంగ్రెస్ పార్టీ “ముస్లిం అనుకూల” పార్టీ అని, మరో మాటలో చెప్పాలంటే “హిందూ వ్యతిరేక” పార్టీ అని అధికార పార్టీ చేస్తున్న ఆరోపణకు వ్యతిరేకంగా ఆ పార్టీ ఇప్పుడు నిస్సత్తువుగా మిగిలిపోయే పరిస్థితి ఏర్పడింది.
మాలేగావ్ తీర్పు తర్వాత కాంగ్రెస్ నాయకత్వం స్పష్టమైన మౌనం పాటించింది. ఈ సందర్భంగా 2008 మాలేగావ్ పేలుళ్ల కేసును దర్యాప్తు చేసిన మహారాష్ట్ర యాంటీ-టెర్రరిజం స్క్వాడ్ (ఏటీఎస్)లో భాగమైన ఒక మాజీ ముస్లిం పోలీసు అధికారి వెల్లడించిన విషయం అప్పట్లో కాంగ్రెస్ కుట్ర ఎంత ఘోరంగా ఉందొ వెల్లడి చేస్తుంది. ఆర్ఎస్ఎస్ సర్ సంఘచాలక్ డా. మోహన్ భగవత్‌ను అరెస్టు చేయమని తనను ఆదేశించారని, అందుకు నిరాకరించడంతో తనను ఎంతగానో వేధించారని చెప్పుకొచ్చారు.
“కాషాయ ఉగ్రవాదం ఉందని నిర్ధారించడమే ఈ ఆదేశం వెనుక ఉద్దేశ్యం” అని ట్రయల్ కోర్టు ఇచ్చిన తీర్పుపై స్పందిస్తూ రిటైర్డ్ ఇన్‌స్పెక్టర్ మెహిబూబ్ ముజావర్ ఆరోపించారు. కోర్టు తీర్పు ఏటీఎస్ చేసిన “నకిలీ పనులను” తొలగించిందని ఆయన సోలాపూర్‌లో పేర్కొన్నారు. ముఖ్యంగా, ఏటీఎస్ ఈ కేసును మొదట దర్యాప్తు చేసినప్పటికీ, తరువాత దానిని జాతీయ దర్యాప్తు సంస్థ (ఎన్ఐఏ) స్వాధీనం చేసుకుంది. “ఈ తీర్పు నకిలీ అధికారి చేసిన నకిలీ దర్యాప్తును బహిర్గతం చేసింది” అని ముజావర్ ఒక సీనియర్ అధికారిని పేర్కొంటూ మండిపడ్డారు.
2008 సెప్టెంబర్ 29న మాలేగావ్‌లో జరిగిన పేలుడులో ఆరుగురు మృతి చెందగా, 101 మంది గాయపడ్డారని, ఆ ఘటనను దర్యాప్తు చేసిన ఏటీఎస్ బృందంలో ఆయన కూడా ఉన్నారని, మోహన్ భగవత్‌ను “వెళ్లి పట్టుకోవాలని” తనను అడిగారని ముజావర్ వెల్లడించారు. “ఏటీఎస్ అప్పుడు ఏ దర్యాప్తు చేసిందో, ఎందుకు చేసిందో నేను చెప్పలేను….కానీ రామ్ కల్సంగ్రా, సందీప్ డాంగే, దిలీప్ పాటిదార్, ఆర్ఎస్ఎస్ అధినేత మోహన్ భగవత్ వంటి వ్యక్తుల గురించి నాకు కొన్ని రహస్య ఆదేశాలు ఇచ్చారు. ఈ ఆదేశాలన్నీ వారిని అనుసరించే విధంగా లేవు” అని ఆయన తెలిపారు. వాస్తవానికి, అవి “భయంకరమైనవి” కావడంతో పాటు తనకు వాస్తవికత తెలుసు కాబట్టి తాను వాటిని అమలు చేయలేదని ముజావర్ స్పష్టం చేశారు.
“మోహన్ భగవత్ లాంటి మహోన్నత వ్యక్తిని పట్టుకోవడం నా సామర్థ్యానికి మించినది. నేను ఆ ఆదేశాలను పాటించకపోవడంతో, నాపై తప్పుడు కేసు నమోదు చేశారు. అది నా 40 సంవత్సరాల కెరీర్‌ను నాశనం చేసింది” అని ఆయన ఆవేదన వ్యక్తం చేశారు. తన వాదనలకు మద్దతుగా తన వద్ద డాక్యుమెంటరీ ఆధారాలు ఉన్నాయని ఆ మాజీ పోలీసు అధికారి చెప్పారు. “కాషాయ ఉగ్రవాదం లేదు. ప్రతిదీ నకిలీది” అని ఆయన ఈ సందర్భంగా తేల్చి చెప్పారు.
అయితే, 2008 మాలేగావ్ పేలుళ్లతో సంబంధం ఉన్న సంస్థ నుంచి ఆర్ఎస్ఎస్ చీఫ్ మోహన్ భగవత్‌కు ప్రాణహాని ఉందని, అప్పటి మహారాష్ట్ర ఎటిఎస్ చీఫ్ హేమంత్ కర్కరే ఈ విషయం గురించి ఆయనకు తెలియజేశారని కాంగ్రెస్ సోమవారం ఆరోపించింది. “2008 బాంబు పేలుళ్ల తర్వాత (మాలేగావ్‌లో) అమరవీరుడైన ఎటిఎస్ అధికారి హేమంత్ కర్కరే మోహన్ భగవత్‌ను కలిసి పేలుళ్లకు పాల్పడిన ఉగ్రవాద సంస్థ నుండి తన ప్రాణహాని ఉందని హెచ్చరించారు. ఆయన హెచ్చరిక తర్వాత భగవత్ భద్రతను పెంచారు” అని ఎఐసిసి ప్రధాన కార్యదర్శి మోహన్ ప్రకాష్ తెలిపారు.
యూపీఏ ప్రభుత్వ హయాంలో వరుసగా జరుగుతున్న ఉగ్రవాద సంఘటనల నుండి ప్రజల దృష్టి మళ్లించడం కోసం 2008 పేలుళ్లకు హిందూత్వ గ్రూపులతో సంబంధాలున్న నిందితులు కారణమని నాటి ప్రభుత్వం పెద్దఎత్తున అభాండాలు ప్రచారం చేసింది. మాలేగావ్‌లో జరిగిన దాడికి కొన్ని రోజుల ముందు బాట్లా హౌస్ ఎన్‌కౌంటర్ జరిగింది. దీనిలో ఇండియన్ ముజాహిదీన్‌తో సంబంధం ఉన్న ఉగ్రవాదులు, దేశవ్యాప్తంగా అనేక సంఘటనలకు పాల్పడిన ఉగ్రవాదులను చంపారు.
రెండు నెలల తర్వాత 26/11 ముంబై ఉగ్రవాద దాడులు దేశం చూసిన అత్యంత దారుణమైన వాటిలో ఒకటి. ప్రభుత్వం దాడులను ఎదుర్కొన్నప్పటికీ, ఆ తర్వాత అనేక మంది కాంగ్రెస్ నాయకులు చేసిన ప్రకటనలు యూపీఏ ప్రభుత్వాన్ని క్లిష్ట పరిస్థితిలో పడేశాయి. కాంగ్రెస్ ప్రధాన కార్యదర్శి దిగ్విజయ సింగ్ భద్రతా సంస్థలు బాట్లా హౌస్ ఎన్‌కౌంటర్‌పై సందేహాలను లేవనెత్తారు, ఇది “నకిలీ” అని ఆరోపించారు.
26/11 ముంబై దాడుల తర్వాత, తాను మహారాష్ట్ర యాంటీ-టెర్రరిజం స్క్వాడ్ చీఫ్ హేమంత్ కర్కరేతో గంటల తరబడి మాట్లాడానని, హిందూ తీవ్రవాదుల నుండి తనకు బెదిరింపులు వస్తున్నాయని కర్కరే తనకు చెప్పాడని ఆయన ఆరోపించారు. 2008 సెప్టెంబర్ 29న జరిగిన మాలేగావ్ పేలుళ్ల దర్యాప్తుకు కర్కరే ఆ సమయంలో నాయకత్వం వహించారు.
2010లో, అప్పటి కేంద్ర హోం మంత్రి పి. చిదంబరం మొదట “కాషాయ ఉగ్రవాదం” అనే పదాన్ని ఉపయోగించారు. డిజిపిలు, ఐజిపిల వార్షిక సమావేశంలో ఆయన మాట్లాడుతూ, “భారతదేశంలోకి ఉగ్రవాదులను చొరబాటు ప్రయత్నాలలో ఎటువంటి అడ్డంకులు లేదు. యువకులు, మహిళలను తీవ్రవాదులను చేసే ప్రయత్నాలలో ఎటువంటి అడ్డంకులు లేదు. అంతేకాకుండా, గతంలో జరిగిన అనేక బాంబు పేలుళ్లలో చిక్కుకున్న కాషాయ ఉగ్రవాదం ఇటీవల బయటపడింది” అంటూ తీవ్రమైన ఆరోపణలు చేశారు.
కాంగ్రెస్ అప్పుడు చిదంబరం వ్యాఖ్యలకు దూరం జరిగి “ఉగ్రవాదానికి నలుపు తప్ప వేరే రంగు లేదు” అని చెప్పింది. అదే సంవత్సరం, వికీలీక్స్ విడుదల చేసిన రహస్య దౌత్య కేబుల్‌లలో ఒకటి, రాహుల్ గాంధీ 2009లో భోజనం సందర్భంగా భారతదేశంలోని అప్పటి అమెరికా రాయబారి తిమోతి రోమర్‌తో “లష్కరే తోయిబా వంటి సంస్థల కంటే దేశంలో పెరుగుతున్న తీవ్రవాద హిందూ గ్రూపులు పెద్ద ముప్పు” అని చెప్పినట్లు ఉటంకించింది. ఇవి ముస్లిం సమాజంతో మతపరమైన ఉద్రిక్తతలు, రాజకీయ ఘర్షణలను సృష్టిస్తాయని పేర్కొన్నారు.
2012లో, అప్పటి కేంద్ర న్యాయ మంత్రి సల్మాన్ ఖుర్షీద్ కూడా బాట్లా హౌస్ ఎన్‌కౌంటర్ చిత్రాలను సోనియా గాంధీకి చూపించినప్పుడు ఆమె “తీవ్రంగా ఏడ్చింది” అని చెప్పినప్పుడు వివాదం రేగింది. 2014 లోక్‌సభ ఎన్నికలకు ముందు, 2013లో జరిగిన కాంగ్రెస్ చింతన్ శిబిరంలో, కేంద్ర హోం మంత్రిగా చిదంబరం వారసుడు సుశీల్‌కుమార్ షిండే ఇలా అన్నారు: “బీజేపీ, ఆర్ఎస్ఎస్ ఉగ్రవాదాన్ని వ్యాప్తి చేయడానికి ఉగ్రవాద శిక్షణా శిబిరాలను నిర్వహిస్తున్నాయని దర్యాప్తు సమయంలో నివేదికలు వచ్చాయి.”
“పాకిస్థాన్ కు వెళ్లే రైలు సంఝౌతా ఎక్స్‌ప్రెస్‌లో, మక్కా మసీదు (హైదరాబాద్‌లోని) వద్ద బాంబులు అమర్చారు. మాలేగావ్‌లో పేలుడు జరిగింది. మనం దాని గురించి తీవ్రంగా ఆలోచించాలి, అప్రమత్తంగా ఉండాలి” అంటూ కాంగ్రెస్ నేతలను హెచ్చరించారు.
ఇటీవల విడుదలైన తన పుస్తకం ఫైవ్ డికేడ్స్ ఇన్ పాలిటిక్స్‌లో షిండే ఇలా వ్రాసారు: “కేంద్ర హోం మంత్రిత్వ శాఖ తయారుచేసిన రహస్య పత్రాలలో ఒకదానిలో నేను ‘కాషాయ ఉగ్రవాదం’ అనే పదాన్ని చూశాను. కానీ భారతీయ జనతా పార్టీ (బిజెపి), దాని సైద్ధాంతిక మూలస్తంభం, రాష్ట్రీయ స్వయంసేవక్ సంఘ్ (ఆర్ఎస్ఎస్) స్పష్టంగా పాల్గొన్నందున ఇది పెద్ద వివాదంగా మారే అవకాశం ఉన్న అంశం. అందువల్ల, బహిరంగంగా వెళ్లే ముందు ఆ ఆరోపణ వాస్తవికతను తనిఖీ చేయడానికి నేను జాగ్రత్తగా ఉన్నాను”.
“ఆ సమయంలో నా మీడియా ప్రకటనలను ఎవరైనా ప్రస్తావిస్తే, నేను జాగ్రత్తగా ‘కాషాయ ఉగ్రవాదం’ అనే పదాన్ని ఎంచుకున్నానని వారు గమనించవచ్చు. మీడియా నుండి ఎవరో ఇది హిందూ ఉగ్రవాదమా లేదా కాషాయ ఉగ్రవాదమా అని అడిగినట్లు నాకు గుర్తుంది. ‘ఇది కాషాయ ఉగ్రవాదం…’ అని నేను బదులిచ్చాను’” అంటూ చెప్పుకొచ్చారు. అయితే, గురువారం మాలేగావ్ తీర్పు గురించి అడిగినప్పుడు, షిండే వ్యాఖ్యానించడానికి నిరాకరించారు.
ఉగ్రవాదాన్ని ఏ మతంతోనూ ముడిపెట్టకూడదని దిగ్విజయ్ సింగ్ తెలిపారు. “మతం ఆధారంగా ఉగ్రవాదం లేదు. ఇస్లామిక్ ఉగ్రవాదం లేదా హిందూ ఉగ్రవాదం లేదు. ప్రతి మతం ప్రేమ, సామరస్యం, సత్యం, అహింసల ఒక రూపం… నా హిందూ ఆత్మంక్వాది హో సక్తా హై, నా ముస్లిం, సిక్కు లేదా క్రైస్తవుడు (ఒక హిందువు ఉగ్రవాది కాలేడు, ముస్లిం, సిక్కు లేదా క్రైస్తవుడు కాలేడు). మతాన్ని ద్వేష ఆయుధంగా ఉపయోగించే వారు కొద్దిమంది మాత్రమే ఉన్నారు. వారు ఉగ్రవాదాన్ని పెంచుతారు” అని చెప్పుకొచ్చారు.
2014లో దాని ఓటమి, పునర్నిర్మాణం కోసం తన పోరాటాల తర్వాత, కాంగ్రెస్ దిద్దుబాటుకు ప్రయత్నించింది. పార్టీలోని ఒక వర్గం హిందువులను చేరుకోవాల్సిన అవసరాన్ని నొక్కి చెప్పింది. హిందువులను దూరం చేసుకోవడం వల్లననే ఓటమి ఎదురైందని ఏకే ఆంటోనీ నివేదిక స్పష్టం చేసింది. రాహుల్ గాంధీ తరచుగా ఆలయాలను సందర్శించడం, “శివ భక్తుడు” అని ప్రకటించుకోవడం చేశారు.
2018లో, సోనియా గాంధీ ఇండియా టుడే కాంక్లేవ్‌లో కాంగ్రెస్ “ముస్లిం పార్టీ” అని ప్రజలను బిజెపి “ఒప్పించగలిగిందని” అంగీకరించారు. రాహుల్ ఆలయ సందర్శనలు బిజెపి హిందూ మతాన్ని ఏకస్వామ్యం చేయకుండా చూసుకోవడానికి చేసిన ప్రయత్నమా? అనే దానిపై ఆమె మాట్లాడుతూ, “అది కొంతవరకు నిజం కావచ్చు. మమ్ములను ఒక మూలలోకి నెట్టివేయడంతో బహుశా నిశ్శబ్దంగా ఆలయానికి వెళ్లడం కంటే దానిపై కొంచెం ఎక్కువ ప్రజా దృష్టి పడేటట్లు చూడటం” అంటూ సమర్ధించుకున్నారు.
కానీ 2008 పేలుళ్లకు చాలా కాలం ముందు, 1980లలో బిజెపి ఆవిర్భావం నుండి, కాంగ్రెస్ హిందూత్వ ప్రశ్నతో పోరాడుతోంది. ఉదాహరణకు, రాజీవ్ గాంధీ ప్రభుత్వం బాబ్రీ మసీదు తాళాలు తెరిచి ఆ ప్రదేశంలో శిలాన్యాలు నిర్వహించడానికి అనుమతిస్తూ తీసుకున్న నిర్ణయాలు, సుప్రీంకోర్టు షా బానో తీర్పును అధిగమించి తీసుకున్న చర్య తర్వాత వచ్చాయి.
షా బానో కేసులో ముస్లిం మతాధికారులకు “లొంగిపోయినందుకు” ప్రభుత్వం అప్రదిష్టను మూటగట్టుకున్న తర్వాత హిందువులను శాంతింపజేసే ప్రయత్నం చేశారు. మళ్ళీ, 1992లో కేంద్రంలో తన పర్యవేక్షణలో బాబ్రీ మసీదు కూల్చివేత జరిగినప్పుడు, కాంగ్రెస్ తన ముస్లిం ఓటు బ్యాంకును కాపాడుకోవడానికి ప్రధానమంత్రి పి.వి. నరసింహారావుపై నింద మోపింది. 2007లో, గాంధీ కుటుంబం 1992లో రాజకీయాల్లో ఉంటే కూల్చివేత జరిగి ఉండేది కాదని రాహుల్ గాంధీ పేర్కొన్నారు. (1991లో రాజీవ్ గాంధీ హత్య తర్వాత వారు వెనుకబడ్డారు).
అయితే, ఇరువర్గాలను సంతోషంగా ఉంచడానికి ఎంతగా ప్రయత్నిస్తే, అంతర్గతంగా “ముస్లిం అనుకూల” అనే బిజెపి ఆరోపణలకు అంతగా తెరతీసింది. 1990ల అల్లకల్లోల పరిస్థితుల తర్వాత, మన్మోహన్ సింగ్ ప్రభుత్వంలో ముస్లింల పరిస్థితిపై సచార్ కమిటీ నివేదికను బిజెపి కాంగ్రెస్ “ముస్లిం సంతృప్తి” విధానాలకు ఉదాహరణగా ఉపయోగించుకుంది. సేతు సముద్రం కాలువ ప్రాజెక్టు విషయంలో కూడా యుపిఎ ప్రభుత్వం ఇబ్బందుల్లో పడింది. బిజెపి ఈ ప్రాజెక్టు వల్ల ప్రాచీన ‘రామ సేతు’కు ముప్పు ఉందని హెచ్చరించింది.
More Stories
చిప్స్ ఐనా, ఓడలైనా స్వావలంబన తప్ప మార్గం లేదు
పాక్‌-సౌదీ రక్షణ ఒప్పందంలో మరిన్ని ముస్లిం దేశాలు
హెచ్‌-1బీ వీసా దరఖాస్తులకు లక్ష డాలర్ల రుసుము