ఐదేళ్ల తర్వాత చైనీయులకు భారత్‌ టూరిస్టు వీసాలు

కరోనా, గల్వాన్‌ సంఘర్షణల నేపథ్యంలో నిలిపివేసిన చైనీయులకు ఇచ్చే పర్యాటక వీసాలను భారత్ తిరిగి పునరుద్ధరించనుంది. ఇరుదేశాల మధ్య సంబంధాలు మెరుగుపరుచుకునేలా ప్రయత్నాలు జరుగుతున్న నేపథ్యంలో ఈ నిర్ణయం తీసుకుంది. ఫలితంగా దాదాపు ఐదేళ్ల తర్వాత చైనీయులకు భారత్‌ టూరిస్టు వీసాల జారీ ప్రక్రియను పునః ప్రారంభిస్తున్నట్లు చైనాలోని భారత రాయబార కార్యాలయం ప్రకటించింది. 

జులై 24 నుంచి చైనా పౌరులకు టూరిస్టు వీసాలు మంజూరు చేయనున్నట్లు వెల్లడించింది. “2025 జూలై 24 నుంచి చైనా పౌరులు భారత పర్యటక వీసాలకు దరఖాస్తుప చేసుకోవచ్చు. ఇందుకోసం ముందుగా ఆన్​లైన్​లో వీసా అప్లికేషన్​ను నింపి ప్రింట్ చేసుకోవాలి. ఆ తర్వాత వెబ్​ లింక్​తో అపాయింట్​మెంట్​ బుక్​ చేసి భారత్ వీసా అప్లికేషన్ కేంద్రానికి వెళ్లాలి. ఈ సమయంలో తప్పనిసరిగా వారి పాస్​పోర్ట్​, వీసా అప్లికేషన్​ ఫారమ్​, ఇతర పత్రాలు సమర్పించాలి” అని ప్రకటించింది.

2020 ప్రారంభంలో కరోనా మహమ్మారి కారణంగా చైనాలోని వివిధ యూనివర్సిటీల్లో చదువుకుంటున్న సుమారు 22 వేల మంది భారత విద్యార్థులు స్వదేశానికి తిరిగి వచ్చారు. అనంతరం వారు భౌతిక తరగతులకు హాజరయ్యేందుకు అభ్యర్థించినా చైనా వారిని అనుమతించలేదు.  ఈ విషయంపై ఆ దేశానికి భారత ప్రభుత్వం పలుమార్లు విజ్ఞప్తి చేసినప్పటికీ చైనా స్పందించకపోవడంతో ఆ దేశ పౌరులకు జారీ చేసిన టూరిస్ట్‌ వీసాలను సస్పెండ్‌ చేస్తూ నిర్ణయం తీసుకుంది. ఈ మేరకు 2022లో భారత్‌ తరఫున ఇంటర్నేషనల్‌ ఎయిర్‌ ట్రాన్స్‌పోర్ట్ అసోసియేషన్‌ (ఐఏటిఏ) ఓ సర్క్యులర్‌ జారీ చేసింది.