ఘజియాబాద్ కేఎఫ్‌సీ వద్ద హిందూ రక్ష దళ్ నిరసన

ఘజియాబాద్‌లో కాంవర్ యాత్ర సందర్భంగా ఓ వివాదం చెలరేగింది. కేఎఫ్‌సీ రెస్టారెంట్ వద్ద హిందూ రక్షా దళ్ సభ్యులు ఆందోళన చేశారు. ఈ పవిత్ర యాత్ర సమయంలో నాన్-వెజ్ అమ్మకాలు ఆపాలని డిమాండ్ చేశారు. మతపరమైన భావోద్వేగాలు గాయపడుతున్నాయని వారు పేర్కొన్నారు. కాంవర్ మాసం అంటే హిందువులకు ఎంతో పవిత్రం. ఈ కాలంలో శాఖాహారం మాత్రమే తీసుకోవడం సంప్రదాయం. అందుకే ఈ సమయంలో హోటళ్లలో నాన్-వెజ్ విందులు వద్దని వారు కోరారు.

రెస్టారెంట్ యాజమాన్యాలు సహకరించాలని హిందూ రక్షాదళ్ స్పష్టం చేసింది.  స్థానిక అధికారులను కలిసి ఫిర్యాదు చేసినట్లు నేతలు తెలిపారు. కాంవర్ సమయంలో నాన్-వెజ్ ఆహారం విక్రయాలపై నిషేధం వేయాలని కోరారు. హోటళ్లు, రెస్టారెంట్లు అందరూ ఆదేశాలను పాటించాలని డిమాండ్ చేశారు. మతసామరస్యానికి ఇది అవసరమని తెలిపారు.శైవ భక్తుల కోసం ఇది ఓ పవిత్ర యాత్ర. శ్రావణ మాసంలో ఇది ప్రారంభమవుతుంది.

లక్షలాది మంది భక్తులు గంగా నది వద్దకు వెళ్తారు. అక్కడి నుండి పవిత్ర జలాన్ని తీసుకొని, కావడిలో మోస్తూ నడుస్తారు. ఆ నీటిని సమీప శివాలయాలకు తీసుకెళ్లి అభిషేకం చేస్తారు. ఈ యాత్ర ఉత్తరప్రదేశ్, హర్యానా, ఢిల్లీ, బీహార్, జార్ఖండ్ తదితర రాష్ట్రాల్లో నిర్వహించబడుతుంది. కాంవర్ యాత్రలో పాల్గొనే భక్తులు శాఖాహారం మాత్రమే తీసుకుంటారు. అందుకే అక్కడి భోజన కేంద్రాలు కూడా అదే నిబంధనలకు లోబడాలని రక్షాదళ్ విజ్ఞప్తి చేసింది.