సింధూ నదీజలాలపై హేగ్ కోర్టు తీర్పు తిరస్కరించిన భారత్ 

ఈ తీర్పును భారత విదేశాంగ శాఖ శుక్రవారం రోజే తీవ్ర స్వరంతో తిరస్కరించింది. ది హేగ్‌లో ఉన్న మధ్యవర్తిత్వ శాశ్వత న్యాయస్థానాన్ని తాము ఎన్నడూ గుర్తించనే లేదని తేల్చి చెప్పింది. భారత్‌లోని కిషన్ గంగ, రాత్లే హైడ్రో ఎలక్ట్రిక్ ప్రాజెక్టులపై ఆ కోర్టు జారీ చేసిన సప్లిమెంటల్ అవార్డును తిరస్కరిస్తున్నట్లు స్పష్టం చేసింది. సింధూ నదీజలాల ఒప్పందం అమలును ఆపేయాలని ఏప్రిల్‌లో తాము తీసుకున్న నిర్ణయాన్ని ఎవరూ ప్రభావితం చేయలేరని భారత విదేశాంగ శాఖ పేర్కొంది. 

ఆ విషయంలో తాము వెనక్కి తగ్గేది లేదని తెలిపింది. మధ్యవర్తిత్వ శాశ్వత న్యాయస్థానాన్నే తాము గుర్తించడం లేదని, అలాంటప్పుడు కిషన్ గంగ, రాత్లే హైడ్రో ఎలక్ట్రిక్ ప్రాజెక్టులపై పాక్ అభ్యంతరాలను ఎలా పరిగణనలోకి తీసుకుంటామని భారత్ ప్రశ్నించింది. పాక్ ఉగ్రవాదానికి నిలయంగా మారిందని, ఈ అంశం నుంచి అంతర్జాతీయ సమాజాన్ని, అంతర్జాతీయ వేదికలను పక్కదోవ పట్టించేందుకే మధ్యవర్తిత్వ శాశ్వత న్యాయస్థానాన్ని ఆశ్రయించిందని భారత విదేశాంగ శాఖ విమర్శించింది. 

గత కొన్ని దశాబ్దాలుగా ఇదే విధంగా ప్రపంచ దేశాలను పాక్ మోసగిస్తోందని మండిపడింది. ది హేగ్‌లోని మధ్యవర్తిత్వ శాశ్వత న్యాయస్థానపు రాజ్యాంగ నిబంధనలు సింధూ నదీ జలాల ఒప్పందానికి విరుద్ధంగా ఉన్నాయని, అందుకే అది ఇచ్చే తీర్పులను చట్టవిరుద్ధమైనవిగా పరిగణిస్తామని భారత్ వెల్లడించింది. 1960లో భారత్, పాక్ మధ్య సింధూ నదీజలాల ఒప్పందం కుదిరింది. ఈ ఏడాది ఏప్రిల్ 22న జమ్మూకశ్మీరులోని పహల్గాంలో ఉగ్రదాడి జరిగింది. ఆ మరుసటి రోజే సింధూ నదీజలాల ఒప్పందం అమలును ఆపివేస్తున్నట్లు భారత్ ప్రకటించింది.