ఇరాన్‌పై ఇజ్రాయిల్ దాడుల పట్ల భారత్ ఆందోళన

పశ్చిమాసియాలో నెలకొన్న యుద్ధ వాతావరణంపై తీవ్ర ఆందోళన చెందుతున్నట్లు భారత్‌ పేర్కొంది. ఈ పరిస్థితిపై విదేశాంగ మంత్రిత్వ శుక్రవారం ఒక ప్రకటన విడుదల చేసింది. ”ఇరాన్‌, ఇజ్రాయిల్‌ మధ్య ఇటీవలి పరిణామాలపై మేము తీవ్ర ఆందోళన చెందుతున్నాము. అణు స్థావరాలపై దాడులకు సంబంధించిన నివేదికలతో సహా అక్కడి పరిస్థితిని మేము నిశితంగా పరిశీలిస్తున్నాము. ఉద్రిక్తతలను తీవ్రతరం చేసే చర్యలకు దూరంగా ఉండాలని భారత్‌ ఇరుదేశాలను కోరుతోంది” అని విదేశాంగ మంత్రిత్వ శాఖ తెలిపింది. 

ఉద్రిక్తతలను పెంచే చర్యలు నివారించాలని భారత్‌ కోరుతున్నట్లు పేర్కొంది. ఉద్రిక్తతలను తగ్గించడానికి, అంతర్లీనంగా సమస్యలను పరిష్కరించేందుకు ఇప్పటికే జరుగుతున్న చర్చలు, దౌత్య మార్గాలను ఉపయోగించుకోవాలని సూచించింది. భారత్‌ రెండు దేశాలతో సన్నిహిత, స్నేహపూర్వక సంబంధాలను కలిగి వుందని, సాధ్యమైన మేర సహాయం అందించేందుకు సిద్ధంగా ఉందని ఎంఇఎ తెలిపింది.

ఇరాన్‌పై ఇజ్రాయెల్‌ వైమానిక దాడులతో మళ్లీ ఉద్రిక్త పరిస్థితులు నెలకొన్నాయి. ఈ నేపథ్యంలో ఈ రెండు దేశాల్లో నివసిస్తున్న భారత పౌరులను ఉద్దేశించి అక్కడి మన ఎంబసీలు అడ్వైజరీలు కీలక సూచనలు చేశాయి. ఎవరూ అవనసర ప్రయాణాలు చేయొద్దని, సురక్షిత ప్రాంతాలకు వెళ్లాలని ఆదేశించాయి.