వన్డే, టీ20 ఫార్మాట్లలో అగ్రస్థానంలో భారత్

అంతర్జాతీయ క్రికెట్ మండలి (ఐసీసీ) విడుదల చేసిన తాజా ర్యాంకింగ్స్‌లో భారత క్రికెట్ జట్టు అన్ని ఫార్మాట్లలో కూడా అద్భుతంగా రాణిస్తోంది. వన్డే, టీ20 ఫార్మాట్లలో భారత్ అగ్రస్థానాన్ని ఆక్రమించగా, టెస్ట్ విభాగంలో ఆస్ట్రేలియా అగ్రగామిగా నిలిచింది. వన్డేల్లో భారత్ 124 రేటింగ్‌తో మొదటి స్థానంలో, న్యూజిలాండ్ 109తో రెండో స్థానంలో ఉంది.  టీ20ల్లో భారత్ 271 రేటింగ్‌తో అగ్రస్థానంలో, ఆస్ట్రేలియా 262తో రెండో స్థానంలో ఉంది.

అయితే, టెస్ట్‌ల్లో ఆస్ట్రేలియా 126తో టాప్, ఇంగ్లాండ్ 113తో రెండో స్థానం. సౌతాఫ్రికా (111), భారత్ (105) మూడో, నాలుగో స్థానాల్లో నిలిచాయి. ఆస్ట్రేలియా విధ్వంసకర ఓపెనర్ ట్రావిస్ హెడ్ 856 పాయింట్లతో టాప్‌లో కొనసాగుతున్నాడు. భారత్‌ తరఫున యువ సంచలనం అభిషేక్ శర్మ 829 పాయింట్లతో రెండో స్థానంలో నిలిచాడు. మరో యువ బ్యాటర్ తిలక్ వర్మ 804 పాయింట్లతో మూడో స్థానానికి ఎగబాకాడు.

ఇంగ్లాండ్ ప్లేయర్ ఫిల్ సాల్ట్ ఆటకు దూరంగా ఉండటంతో అతని ర్యాంకు నాలుగో స్థానానికి పడిపోయింది. భారత స్టార్ సూర్యకుమార్ యాదవ్ ఒక స్థానం దిగజారి ఆరో స్థానానికి వెనుకబడగా, అతని స్థానాన్ని జోస్ బట్లర్ (ఇంగ్లాండ్ కెప్టెన్) ఐదో స్థానంగా ఆక్రమించాడు. టీ20 బౌలింగ్ విభాగంలో న్యూజిలాండ్ బౌలర్ జేకబ్ డఫీ అగ్రస్థానంలో ఉండగా, భారత్‌ తరఫున వరుణ్ చక్రవర్తి మూడో స్థానంలో నిలిచాడు. ఆల్‌రౌండర్ల విభాగంలో హార్దిక్ పాండ్యా 252 పాయింట్లతో నెం.1 స్థానంలో ఉన్నాడు.

టెస్ట్ బ్యాటింగ్‌లో జో రూట్ (ఇంగ్లాండ్) 888 పాయింట్లతో అగ్రస్థానంలో ఉన్నాడు. భారత యువ బ్యాట్స్‌మన్ యశస్వి జైస్వాల్ నాలుగో స్థానంలో ఉన్నాడు. టెస్ట్ బౌలింగ్‌లో జస్ప్రీత్ బుమ్రా 908 రేటింగ్‌తో నెం.1 స్థానాన్ని ఆక్రమించాడు. ఆల్‌రౌండర్ల విభాగంలో రవీంద్ర జడేజా అగ్రస్థానాన్ని దక్కించుకున్నాడు. వన్డే బ్యాటింగ్‌లో శుభ్‌మన్ గిల్ 784 పాయింట్లతో అగ్రస్థానంలో ఉన్నాడు.

అతని తర్వాత బాబర్ అజామ్, రోహిత్ శర్మ, విరాట్ కోహ్లీ ఉన్నారు. 7వ స్థానంలో శ్రేయ‌స్ అయ్యార్ కొన‌సాగుతున్నాడు. బౌలింగ్ ర్యాంకింగ్స్‌లో కుల్దీప్ యాదవ్ రెండవ స్థానంలో ఉన్నాడు. ఆల్ రౌండర్ల జాబితాలో రవీంద్ర జడేజా టాప్ 10లో ఉన్నాడు.

కాగా, ఐసిసి మహిళల వన్డే ర్యాంకింగ్స్‌లో భారత స్టార్ క్రికెటర్, వైస్ కెప్టెన్ స్మృతి మంధాన 729 రేటింగ్ పాయింట్లతో రెండో ర్యాంక్‌ను నిలబెట్టుకుంది. ఇక లారా వోల్వార్డ్ (సౌతాఫ్రికా) 738 పాయింట్లతో టాప్ ర్యాంక్‌లోనే కొనసాగుతోంది. మరోవైపు ఇంగ్లండ్‌కు చెందిన నటాలి సివర్‌బ్రంట్ 719 పాయింట్లతో మూడో ర్యాంక్‌లో నిలిచింది. భారత క్రికెటర్లు జెమీమా రోడ్రిగ్స్ 15వ, కెప్టెన్ హర్మన్‌ప్రీత్ కౌర్ 16వ ర్యాంక్‌ను దక్కించుకున్నారు.