ఆదాయపు పన్ను రిటర్న్‌లు (ఐటిఆర్) దాఖలు చేయడానికి చివరి తేదీని జులై 31, 2025 నుంచి సెప్టెంబర్ 15, 2025 వరకు పొడిగిస్తూ ఆదాయపు పన్ను శాఖ నిర్ణయం తీసుకుంది. ఐటీఆర్ ఫారమ్‌లలో మార్పులు, యుటిలిటీల ఆలస్యం, టీడీఎస్ క్రెడిట్‌ల రిఫ్లెక్షన్స్ వంటి కారణాలతో ఈ నిర్ణయం తీసుకున్నారు. జీతం పొందే ఉద్యోగులతో సహా అందరికీ ఇది ప్రయోజనం చేకూరుస్తుంది. గడువులోగా ఫైల్ చేయకపోతే రూ. 5,000 జరిమానా ఉంటుంది.
కేంద్ర ప్రత్యక్ష పన్నుల బోర్డు (సిబిడిటి) ఈ గడువు పొడిగింపునకు గల కారణాలను స్పష్టంగా వివరించింది. అసెస్‌మెంట్ ఇయర్ 2025-26 కోసం నోటిఫై చేసిన ఐటీఆర్ ఫారమ్‌లలో గణనీయమైన మార్పులు జరిగాయి. వీటి ఉద్దేశం కంప్లయెన్స్ సులభతరం చేయడం, పారదర్శకతను పెంచడం, సరైన వివరాలు ఇచ్చేలా ప్రోత్సహించడం. ఈ మార్పుల కారణంగా సిస్టమ్ డెవలప్‌మెంట్, ఇంటిగ్రేషన్, సంబంధిత యుటిలిటీల టెస్టింగ్ కోసం అదనపు సమయం అవసరం.
ఆదాయపు పన్ను రిటర్న్ లను దాఖలు చేసేందుకు అవసరమైన యుటిలిటీలను (సాఫ్ట్‌వేర్ టూల్స్) ఆదాయపు పన్ను శాఖ ఇంకా విడుదల చేయలేదు. యుటిలిటీలు సిద్ధం కానందున, పన్ను చెల్లింపుదారులు రిటర్న్‌లను ఫైల్ చేయలేకపోతున్నారు. మే 31, 2025 నాటికి దాఖలు చేయాల్సిన టీడీఎస్ (టిడిఎస్) స్టేట్‌మెంట్‌ల నుంచి వచ్చే క్రెడిట్‌లు జూన్ మొదటి వారంలో కనిపించడం ప్రారంభిస్తాయని భావిస్తున్నారు.
ఈ క్రెడిట్‌లు సరిగ్గా కనిపించకపోతే, రిటర్న్‌లు ఫైల్ చేయడానికి తగినంత సమయం లభించదు. ఈ కారణాలన్నింటినీ పరిగణనలోకి తీసుకుని, పన్ను చెల్లింపుదారులకు సున్నితమైన, కచ్చితమైన ఫైలింగ్ అనుభవాన్ని అందించడానికి గడువును పొడిగించాలని సీబీడీటీ నిర్ణయించింది. ఈ మేరకు త్వరలో అధికారిక నోటిఫికేషన్ విడుదల చేయనున్నట్లు ‘ఎక్స్’ (గతంలో ట్విట్టర్) పోస్ట్‌లో ఆదాయపు పన్ను శాఖ ప్రకటించింది.
సాధారణంగా జులై 31న ముగిసే ఐటీఆర్ ఫైలింగ్ గడువు జీతం పొందే ఉద్యోగులతో సహా ఆడిట్ అవసరం లేని పన్ను చెల్లింపుదారులందరికీ వర్తిస్తుంది. ఈ గడువు పొడిగింపుతో, వారికి తమ ఆదాయపు పన్ను రిటర్న్‌లను దాఖలు చేయడానికి అదనంగా 46 రోజులు లభించాయి. ఇది వారికి అన్ని వివరాలను సరిచూసుకోవడానికి, సరైన పన్ను రిటర్న్‌ను సమర్పించడానికి తగినంత సమయాన్ని అందిస్తుంది.
More Stories
ఇకపై నమో భారత్‌ రైళ్లలో పుట్టినరోజులు, పెళ్లిరోజులు
విద్యార్థుల కోసం ‘జెన్-జెడ్’ పోస్టాఫీస్లు
అమెరికా ఆంక్షలతో చమురు అమ్మకాలు ఆపేసిన రిలయన్స్