ఉగ్ర‌వాదాన్ని యుద్ధ వ్యూహాంగా వాడుతున్న పాక్

ఉగ్రవాదుల శవపేటికలపై పాక్‌ జాతీయజెండా కప్పటంతోపాటు సైన్యం సెల్యూట్‌ చేసినట్లు తెలిపారు. అందువల్ల పాక్‌ భూభాగం నుంచి జరుగుతున్న ఉగ్రవాదుల దాడులు పక్కా పథకం ప్రకారం వ్యూహాత్మకంగా చేస్తున్న యుద్ధమని ప్రధాని మోదీ ఆరోపించారు.

“ఉగ్రవాదాన్ని ఇప్పటివరకు పరోక్షయుద్ధం అనేవారం. మే 6 తర్వాత నాటి దృశ్యాలు చూసిన తర్వాత దీన్ని పరోక్షయుద్ధం కాదని అర్థమైంది. అందుకు కారణం ఉంది. ఉగ్రవాదుల 9 స్థావరాలను గుర్తించి కేవలం 22 నిమిషాల్లో ధ్వంసం చేయటం జరిగింది. ఈ సారి కెమెరాలు కూడా ఏర్పాటు చేయటం జరిగింది. ఎందుకంటే మనవారే ఎవరైన సాక్ష్యం అడిగితే ఇవ్వటానికి. ఇప్పుడు మనం సాక్ష్యాలు ఇవ్వాల్సిన అవసరం లేకుండా అక్కడివారే ఇస్తున్నారు” అని ప్రధాని మోదీ పేర్కొన్నారు.

2014లో త‌మ పార్టీ అధికారంలోకి వ‌చ్చిన స‌మ‌యంలో భార‌త దేశం 11వ అతిపెద్ద ఆర్థిక దేశంగా ఉండేద‌ని, కానీ ఇప్పుడు మ‌న దేశం నాలుగ‌వ అతిపెద్ద ఆర్థిక దేశంగా మారింద‌ని ప్రధాని తెలిపారు. ఆర్థిక వ్య‌వ‌స్థ‌ల్లో బ్రిట‌న్‌ను దాటేసిన‌ప్పుడు సంతోషంగా ఫీల‌య్యామ‌ని, ఎందుకంటే ఆ దేశం మ‌న‌ల్ని పాలించింద‌ని, ఎప్పుడు 3వ స్థానానికి వెళ్లాల‌న్న వ‌త్తిడి ఇప్పుడు దేశంపై ఉంద‌ని గుర్తు చేశారు. 

పొరుగు వాళ్లు కూడా సంతోషంగా ఉండాల‌న్న భావ‌న ఉంద‌ని, కానీ మ‌న సామ‌ర్థ్యాన్ని స‌వాల్ చేస్తే, అప్పుడు భార‌త్ హీరోల‌కు నిల‌యంగా మారుతుంద‌ని ప్ర‌ధాని మోదీ తెలిపారు.  1947లో జరిగిన దేశ విభజన గురించి ప్రధాని మోదీ మాట్లాడుతూ “1947లో భారత్​ను మూడు ముక్కలుగా చేశారు. అదే రోజు రాత్రి కశ్మీర్​పై మొదటి ఉగ్రవాద దాడి జరిగింది. ఉగ్రవాదుల సాయంతోనే కశ్మీర్​లోని కొంత భాగాన్ని పాకిస్థాన్ స్వాధీనం చేసుకుంది. సర్దార్ పటేల్ సలహాలను అంగీకరించి, ఆ రోజే ఉగ్రవాదలను చంపిఉంటే భారత్​లో గత 75 సంవత్సరాలుగా కొనసాగుతున్న ఉగ్రవాద కార్యకలాపాలు ఉండేవి కాదు” అని చెప్పారు.