భావనారాయణ ఓ కర్మ యోగి.. ఆదర్శ స్వయంసేవక్

 వనవాసీ కళ్యాణాశ్రమం అఖిలభారత అధికారి కె.రామచంద్రయ్య శ్రద్ధాంజలి ఘటిస్తూ సాఠేజీ మార్గదర్శకత్వాన్ని అందిపుచ్చుకుని రాణించిన కొద్దిమంది చురుకైనవారిలో భావనారాయణ ఒకరని చెప్పారు. ఆయన బిఎంఎస్ బాధ్యతల్లో ఉన్నప్పుడు వామపక్షవాదుల చేతుల్లో నలిగిపోయిన తన కార్యకర్తకు భావనారాయణ అండదండలు అందించి రక్షించేవారని చెప్పారు. వారు అనారోగ్యానికి గురై కదలలేని పరిస్థితి వచ్చేవరకూ ప్రతి నిత్యం శాఖకు వెళ్ళి స్ఫూర్తిదాయకమైన జీవితాన్ని గడిపారని తెలిపారు.

విద్యాభారతి దక్షిణమధ్య క్షేత్ర సంఘటనా మంత్రి లింగం సుధాకర్ రెడ్డి ప్రసంగిస్తూ భావనారాయణ ఉన్నత వ్యక్తిత్వాన్ని ఆవిష్కరించారు. వ్యవస్థలో ఇబ్బందులు ఏర్పడినప్పుడు బాధ్యత తీసుకుని స్వంత పనిగా రేయింబవళ్లూ శ్రమించి కార్యసాధకునిగా నిలిచిన వ్యక్తిత్వం ఆయనదని పేర్కొన్నారు. శరీరం సహకరించని రోజుల్లో ఆ స్థితిలోనూ ఏ సంస్థకైనప్పటికీ తాను ఎలా ఉపయోగపడగలననే ఆలోచనతోనే ఉండేవారని తెలిపారు. విద్యాపీఠానికి తమ శ్రీమతికి చెందిన ధనాన్ని ఇచ్చేందుకు ముందుకు వచ్చారని, తన వంత సహకారం అందించేందుకు ఒక ప్లాట్‌ని సైతం అమ్మే ఆలోచన చేశారని భావనారాయణ ఔన్నత్యాన్ని తెలియజేశారు.

ఆర్ఎస్ఎస్ దక్షిణ మధ్య క్షేత్ర ప్రచార  ప్రముఖ్ గొట్టుముక్కల భాస్కర్ మాట్లాడుతూ తుది వరకూ సంఘ కుటుంబంగానే ఉన్న భావనారాయణని అనారోగ్యం సమయంలో కుటుంబం ఎంతగా ప్రేమను అందించిందో వివరించారు. సాఠే గారి ప్రభావంతో సమర్ధవంతుడైన కార్యశీలిగా ఎదిగారని, ఎంత తీరిక లేని పరిస్థితులు ఉన్నప్పటికీ ఆత్మీయ పలుకరింపును ఆయన విడనాడేవారు కాదని ప్రశంసించారు.

ఇంకా స్వర్గీయ భావనారాయణ గారితో కలసి సంఘ్‌లోను, ఎల్ఐసీలోను, బిఎంఎస్‌లోను, కేశవ మెమోరియల్ సంస్థల్లోను పనిచేసిన ఉద్యోగులు, సన్నిహితులు మాట్లాడి తమ ఆత్మీయ అనుభూతులు, అనుభవాలను పంచుకున్నారు. చివరిగా పుష్పాంజలితో శ్రద్ధాంజలి సభ ముగిసింది.