ఆదంపూర్ వైమానిక స్థావరాన్ని సందర్శించిన మోదీ,

ఆదంపుర్ సందర్శనలో త్రిశూల్‌ చిత్రం కలిగిన టోపీ ధరించారు. కాగా, ఈ వైమానిక స్థావరంపై దాడి చేసినట్లు పాకిస్తాన్ దుష్ప్రచారం చేసింది. అక్కడికి వెళ్లి పాక్‌ తప్పుడు ప్రచారాన్ని తిప్పికొట్టారు ప్రధాని మోదీ. ప్రధాని మోదీ ఆదంపూర్ వైమానిక స్థావరంలో ఉన్నప్పుడు, ఎస్-400 వైమానిక రక్షణ వ్యవస్థ, మిగ్-29 జెట్​లు స్పష్టంగా చెక్కుచెదరకుండా కనిపించాయి. 

పహల్గాం ఉగ్రదాడికి ప్రతీకారంగా భారత్ ఆపరేషన్ సిందూర్ చేపట్టి, పాక్​లోని ఉగ్రవాద శిబిరాలను సర్వనాశనం చేయడంతో ప్రతిగా పాకిస్థాన్​ భారత్​లోని ఆదంపూర్ వైమానిక స్థావరాన్ని లక్ష్యంగా చేసుకుని డ్రోన్​లు, క్షిపణులతో దాడులు చేసింది. అయితే భారత వాయుసేన వాటన్నింటినీ నేలకూల్చింది. దీనితో ఏం చేయాలో తెలియక, దిక్కుతోచక, పాక్ అబద్దపు ప్రచారాలు చేయడం మొదలుపెట్టింది. 

రష్యా తయారీ ఎస్​-400ను తాము ధ్వంసం చేశామని చెప్పుకుంటూ కొన్ని నకిలీ వీడియోలు, ఫొటోలు విడుదల చేసింది. అక్కడితో ఆగకుండా ఆదంపూర్ ఎయిర్​బేస్​లో దెబ్బతిన్న ఎస్​-400 ఉపగ్రహ ఛాయా చిత్రం అంటూ ఓ ఫొటోను విడుదల చేసింది. కానీ, ఇక్కడే పాక్ దొరికిపోయింది. పాక్ విడుదల చేసిన ఆ చిత్రంలో క్రెటర్లు, శిథిలాలు, దెబ్బతిన్న పరికరాలు ఏమీ కనిపించలేదు. 

చివరికి పాక్​ ప్రధాని పోస్ట్ చేసిన ఫొటోల్లోనూ ఎస్​-400 ధ్వంసానికి సంబంధించిన వివరాలు ఏమీ కనిపించలేదు. దీనితో పాక్​ అబద్దపు ప్రచారాలు బయటపడి, ప్రపంచం ముందు నవ్వులపాలైంది. ఈ పర్యటన ద్వారా మోదీ రెండు సందేశాలను ప్రపంచానికి స్పష్టం తెలియజేశారు.

1. పాకిస్థాన్ జేఎఫ్​-17 యుద్ధ విమానం నుంచి క్షిపణులు ప్రయోగించి, ఆదంపూర్​లోని ఎస్​-400 వైమానిక రక్షణ వ్యవస్థను ధ్వంసం చేసినట్లు అబద్దపు ప్రచారాలు చేసింది. కానీ మోదీ సందర్శన సమయంలో అక్కడ ఉన్న ఎస్​-400 చెక్కు చెదరకుండా అక్కడే ఉంది. దీని ద్వారా పాక్​ చెంప చెల్లుమనిపించారు మోదీ. 2. భారతదేశ భద్రత గురించి మోదీ సర్కార్​కున్న నిబద్ధతను ప్రపంచానికి చూపించారు.