అమెరికా అధ్యక్షుడు డొనాల్డ్‌ ట్రంప్‌ విధించిన ప్రతీకార సుంకాలు అమెరికా భవిష్యత్తుపై పెను ప్రభావం చూపుతాయని ప్రముఖ బహుళజాతి ఆర్థిక సేవల సంస్థ జేపీ మోర్గాన్ అంచనా వేసింది. ట్రంప్‌ ప్రతీకార సుంకాలు విధించిన నేపథ్యంలో 1.3 శాతంగా ఉన్న అమెరికా జీడీపీ మైనస్‌ 0.3శాతానికి పడిపోయే ప్రమాదం ఉందని హెచ్చరించింది. ఫలితంగా అగ్రరాజ్యంలో ఈ ఏడాదే ఆర్థికమాంద్యం తలెత్తే ప్రమాదం ఉందని చెప్పింది. 

అమెరికా స్థూల దేశీయోత్పత్తిపై తీవ్ర ప్రభావం చూపే ప్రమాదం ఉందని జేపీ మోర్గాన్‌కు చెందిన ఆర్థికవేత్త మైఖేల్ ఫెరోలి వెల్లడించారు. ప్రపంచ దేశాలపై ట్రంప్‌ విధించిన ప్రతీకార సుంకాలే ఇందుకు ప్రధాన కారణమని, ఆర్థిక మాంద్యంతో అమెరికాలో నిరుద్యోగ రేటు 5.3శాతానికి పెరగనుందని మైఖేల్ ఫెరోలి అంచనా వేశారు. నిరుద్యోగ సమస్య ఏర్పడే ప్రమాదం ఉందని పేర్కొన్నారు. 

బ్యూరో ఆఫ్ లేబర్‌ స్టాటిస్టిక్స్‌ నివేదిక ప్రకారం మార్చిలో నిరుద్యోగ రేటు 4.2శాతంగా ఉన్నట్లు మైఖేల్ ఫెరోలి తెలిపారు. మార్చిలో ఉద్యోగ నియామకాలు బలంగా ఉన్నప్పటికీ కార్పోరేట్‌ మార్జిన్లు, వినియోగదారుల డిమాండ్‌పై ట్రంప్ ప్రతీకార సుంకాల ప్రభావంతో ఉద్యోగ నియామకాలు తగ్గే ప్రమాదం ఉందని ఆర్థికవేత్తల అంచనా. రాబోయే రోజుల్లో నిత్యావసర ధరలు పెరగటం సహా వృద్ధిరేటు మందగిస్తుందని చెప్పారు.

ఆర్థికవ్యవస్థను గాడినపెట్టేందుకు ఫెడరల్‌ రిజర్వు బ్యాంక్‌ వడ్డీరేట్లను తగ్గించే అవకాశం ఉందని ఆర్థికవేత్తలు అంచనా వేస్తున్నారు. ప్రపంచదేశాల నుంచి అమెరికాకు దిగుమతి అయ్యే వస్తువులు 20శాతం కంటే ఎక్కువగానే తగ్గనున్నట్లు మరో ఆర్థికవేత్త జోనాథన్ పింగిల్ అంచనా వేశారు. రాబోయే త్రైమాసికాల్లో అమెరికా జీడీపీలో దిగుమతుల 1986కు ముందు స్థాయిలకు తగ్గే ప్రమాదం ఉందన్నారు.