సరిహద్దు భద్రతా ప్రయత్నాలు అడ్డుకుంటున్న మమతా

మమతా బెనర్జీ నేతృత్వంలోని పశ్చిమ బెంగాల్ ప్రభుత్వం సరిహద్దు భద్రతా ప్రయత్నాలను అడ్డుకుంటున్నదని, అక్రమ వలసదారులకు సహాయం చేస్తున్నదని కేంద్ర హోంమంత్రి అమిత్ షా  ఆరోపించారు. లోక్‌సభలో ఇమ్మిగ్రేషన్, ఫారినర్స్ బిల్లు, 2025పై చర్చ సందర్భంగా మాట్లాడుతూ, మైనారిటీ వర్గాలు భారతదేశంలో అత్యంత సురక్షితమైనవని, ప్రభుత్వం ఎల్లప్పుడూ హింసించబడిన వర్గాలకు ఆశ్రయం కల్పిస్తుందని స్పష్టం చేశారు.

సరిహద్దు ఫెన్సింగ్ ప్రయత్నాలకు బెంగాల్ ప్రభుత్వం సహకరించడం లేదని అమిత్ షా విమర్శించారు, రాష్ట్ర ప్రభుత్వం భూమిని ఇవ్వడానికి నిరాకరించడంతో 450 కి.మీ. ఫెన్సింగ్ పనులు అసంపూర్ణంగా ఉన్నాయని ఆయన తెలిపారు. “ఫెన్సింగ్ పనులు ప్రారంభమైనప్పుడల్లా, అధికార పార్టీ కార్యకర్తలు గూండాయిజం,  మతపరమైన నినాదాల ద్వారా అంతరాయాలు సృష్టిస్తున్నారు” అని ఆయన ఆరోపించారు. 

బంగ్లాదేశ్ చొరబాటుదారులు, రోహింగ్యాలు ఇప్పుడు అస్సాం కాకుండా పశ్చిమ బెంగాల్ ద్వారా భారతదేశంలోకి ప్రవేశిస్తున్నారని కూడా ఆయన పేర్కొన్నారు. “టిఎంసి ప్రభుత్వం చొరబాటుదారులపై దయ చూపుతోంది, వారికి ఆధార్, ఓటరు కార్డులు జారీ చేస్తోంది” అని షా ఆగ్రహం వ్యక్తం చేశారు. పట్టుబడిన చాలా మంది అక్రమ వలసదారులకు 24 పరగణాల జిల్లా నుండి ఆధార్ కార్డులు ఉన్నాయని ఆయన వెల్లడించారు. 

 2026లో బెంగాల్‌లో బిజెపి ప్రభుత్వాన్ని ఏర్పాటు చేసిన తర్వాత, అటువంటి కార్యకలాపాలు నిలిపివేయబడతాయని ఆయన స్పష్టం చేశారు. బిల్లుపై చర్చకు షా సమాధానమిస్తూ, వలసలు జాతీయ భద్రతతో దగ్గరి సంబంధం కలిగి ఉన్నాయని, దేశ సరిహద్దుల్లోకి ప్రవేశించే వారిని పర్యవేక్షించడం చాలా కీలకమని తెలిపారు.

పర్యాటకులు లేదా విద్య, వైద్యం, వ్యాపారం కోసం భారత దేశానికి రావాలనుకునే వారిని స్వాగతించడానికి తమ ప్రభుత్వం సిద్ధంగా ఉందని తెలిపారు. అయితే చొరబాటుదారులకు భారత్‌ ధర్మసత్రం కాదని స్పష్టం చేశారు. దేశానికి ముప్పు కలిగించే వారిపై తీవ్రంగా వ్యవహరిస్తామని హెచ్చరించారు. మరోవైపు భారతదేశాన్ని సందర్శించే ప్రతి విదేశీయుడి గురించి దేశానికి తాజా సమాచారం అందేలా ఇమ్మిగ్రేషన్ బిల్లు నిర్ధారిస్తుందని అమిత్‌ షా తెలిపారు.

“వలస అనేది ఒక ప్రత్యేక సమస్య కాదు. దేశంలోని అనేక సమస్యలు దానితో ముడిపడి ఉన్నాయి. జాతీయ భద్రత దృక్కోణం నుండి, దేశ సరిహద్దుల్లోకి ఎవరు ప్రవేశిస్తారో తెలుసుకోవడం చాలా ముఖ్యం. దేశ భద్రతకు ప్రమాదం కలిగించే వారిపై కూడా మేము నిశితంగా నిఘా ఉంచుతాము” అని ఆయన పేర్కొన్నారు. 

హింసించబడిన వర్గాలకు ఆశ్రయం కల్పించడంలో భారతదేశం యొక్క చారిత్రక పాత్రను ప్రస్తావిస్తూ “భారతదేశం భౌగోళిక-సాంస్కృతిక దేశం, భౌగోళిక- రాజకీయ దేశం కాదు. పర్షియన్లు భారతదేశానికి వచ్చారు. నేడు దేశంలో సురక్షితంగా ఉన్నారు” అని గుర్తు చేశారు. ప్రపంచంలోని అతి చిన్న మైనారిటీ సమాజం భారతదేశంలో మాత్రమే సురక్షితంగా ఉందని స్పష్టం చేశారు. 

యూదులు ఇజ్రాయెల్ నుండి పారిపోయి ఇక్కడే ఉన్నారని చెబుతూ  ప్రధానమంత్రి మోదీ హయాంలో, పొరుగు దేశాల నుండి ఆరు అణచివేతకు గురైన వర్గాల ప్రజలు సిఏఏ ద్వారా దేశంలో ఆశ్రయం పొందుతున్నారని చెప్పారు. భారత దేశపు పెరుగుతున్న ప్రపంచ ఆర్థిక స్థితి, వలసలపై దాని ప్రభావం గురించి కూడా ఆయన ప్రస్తావించగారు.

“గత పదేళ్లలో, భారతదేశం ఐదవ అతిపెద్ద ఆర్థిక వ్యవస్థగా, ప్రపంచంలోని అతిపెద్ద ఆర్థిక వ్యవస్థలలో ఒక ప్రకాశవంతమైన ప్రదేశంగా మారింది. భారతదేశం తయారీ కేంద్రంగా మారింది. ప్రపంచవ్యాప్తంగా ప్రజలు ఇక్కడికి రావడం సహజం. అయితే, వ్యక్తిగత లాభం కోసం ఆశ్రయం కోరుతూ, అస్థిరతకు కారణమయ్యే వారి సంఖ్య కూడా పెరిగింది” అంటూ ఆందోళన వ్యక్తం చేశారు. 

అది రోహింగ్యాలు అయినా లేదా బంగ్లాదేశీయులు అయినా, వారు అశాంతి సృష్టించడానికి భారతదేశానికి వస్తే, వారిపై కఠిన చర్యలు తీసుకుంటామని అమిత్ షా స్పష్టం చేశారు. జాతీయ భద్రతలో రాజీపడబోమని తేల్చి చెప్పారు. దేశ అభివృద్ధికి తోడ్పడటానికి ఎవరైనా ఇక్కడికి వస్తే, వారికి ఎల్లప్పుడూ స్వాగతం పలుకుతామని ఆయన తెలిపారు.